Rongbawl dinga sukdam le siemthar i ni kha aw
Tu kuma ei Sande sikul sabzek Timothe lekhathon thuah ziek ding ka la hau vieua chu, 8-11 October, 2026 Revival Camp-a thlarau le taksa malsawmna ei dong le inzoma thu poimaw pakhat la hung ziek zau lem ka tih.
Mt 12:43-45 thua khan mi pakhat, thlarau tirdakum suoksan hnung, thil dangin a hluo naw leia, kha thlarau tirdakum khan, ama neka suol ngot, thlarau dang pasari hung ṭhuoiin chu taka chun umhmun an khuor thu ei hmu a. Hi hin a mi’n chûktir ṭhenkhat hei suklang ei tih.
A pakhatnaa chun, Thlarau Thienghlim chênchilna ṭhang loa mani insûmtheina le ṭhang lak rakna chaua siemtharna amanih nungchang ṭha lo inthlakthlengna chang chu a tlo sawt ngai nawh. Mihriem theina chun thaw thei chin le thaw pei chin a lo um hlak a. A thei naw pha leh a ngaia bok a kîr nawk a, a châng lem chun a zuol kai lem hlak a nih.
A pahninaa dingin, Pathiena inthok thlarau siemthar le taksa sukdam hai hin ei thlarau le ei taksa siemthara/ sukdama umhai hi Pathien rongbawlna dinga hmang vat vat a va poimaw awm de aw. Lalpa rongbawlna hriemhreia ei inchangtir vat naw chun Setan le a palaihaiin an enhla a, umhmun an khuor el hlak a nih. Hluo lo, phît fai le hre fel diema um, Thlarau Thienghlimin sin a thawna ding hmunah ei inhlan si naw chun, thlarau tirdakum chun chawl hadamna dingin a dit hlak a nih. Thlarau tirdakum chu hmun ei pek tah lak law chun, ama khoma ṭhahnem a ngai a, a neka suol ngot thlarau dang tam deu a hung ṭhuoi lut hlak a nih. Chu phâ chun ei ngirhmun chu a hma nekin a hung se ta lem hlak a nih.
Chuleiin, Pathienin a mi ditsakna zâra thlarau siemtharna chang a, taksa damna hai chen khom dong hai hin rongbawl dinga Pathien mi sukhrat a nih ti hre a, ṭhahnemngai taka thei tawp insuo dingin ei infiel tak meu a nih. Eini ta ding le suol hmangruo dinga damna chang ei ni nawh. Pathienin thilmak thaw thei sien la khom a rongbawlnaa hin chu nang le kei, ditumna ding san um naw inla khom, a mi mamaw a, mi siem tharin a mi sukhrat hlak a nih. Lalpa rongbawltu dinga ditsak, siemthar le sukhrat ei ni hi ei hamṭha hle i ti naw maw? Lalpa hming chu inpakin um raw se. Amen.
Ziektu: Upa Dr. Lalsiemlien Pulamte
