Ringnaa intlânsiekna ṭha bei ṭâng ṭâng (1 Tim 6:12)
Ringnaa intlânsiekna ṭha ti hi Sap Baibulah ‘the good fight of faith’ tiin an inlet a. Intlânsiekna hi indona, inbeina amanih kalna ti khoma hrilfie thei a nih. Ringnaa intlânsiekna amanih indona chu Setan a lalram le thilthaw beilêtna dinga thlarau indona a nih. Chu taka chun, Krista Isu sipai taphot an ṭhang ve ngêi ngêi hlak. Ei dohai hi taksa le thisen put mihriem râl an ni naw a; lalna hai, thuneina hai, hi khawvel inthim chunga roreltuhai le van hmuna thlarau suol umhai an ni lem a nih.
Chu indona ṭha chu bei dingin ringna le sie le ṭha hrietna fim tak vong tlat a poimaw a. Intlânsieknaa lawmman la dinga thawtu inkhêlmi le hmelma beitu sipai chun inthununna, teireipeina le ngil taka ngaituona a nei a ngai a. Tirko Paula chun, “Chuleiin, pan chieng tak neiin ka tlân a, boruok hnektu ang mei meiin ka hnek ngai nawh” (1 Kor 9:26) a tih. A taksa chu a hnek chor chor a, a bawiah a siem hlak thu khom ei hmu a. Intlânsieknaa ṭhanghai chu kong iengkimah inthununna khauh tak hnuoiah an inbuotsai hlak a nih. Hi intlânsiekna/ indona hi màni sûnga le ram thim hmunah a tlung ve ve a.
Hi indona hnena zâra Setan kul sukchim tâkna hmuna chun Pathien lalram tungdingin a um pei a nih. Van khuo-le-tui hai ta dingin lawmna hlado insam vong vong theina a nih. Chulei tak chun intlânsiekna ṭha le indona ṭha a tling phâk a nih. Inkhêlmi khomin a hmaa lawmman le chawimawina um chu beiseiin a taksa le lungril a’n thununin nasa takin a praktis hlak. Chuleiin, chu intlânsieknaa ei ṭhàng chun, thaw mei mei chi a ni naw a, bei tak tak le bei ṭâng ṭâng ding chi lem a nih.
Tirko Paula bokin, “Indona hriemhrei kan hmanghai hi khawvel ralthuom a ni naw a, Pathien ralthuom thilthawthei chu a ni lem” tiin a hril a. Vêl nawk pha ei ralthuom ding ei hril ding a nih. Thilthaw thei ve èm êm, Setan hne theina a ni tlat leiin thafan a um ta khop el.
Ziektu: Upa Dr Lalsiemlien Pulamte
