Krista Sipai Ringum – Rinum Tuor Inhuom (2 Tim 2:3)
Sipai ringum chu rinumna hmasuon sien khom a tlânse ngai naw a, rinumna tuor inhuomin ṭhanghmun a khaw hlak. Mi ringum naw chu rinumna hmaah an tlanse hlak a, mi an inphatsan hlak. Sipai hi hlimhlop chên ding le inhoitirnaa nun hmang dinga lâk an ni naw a, indona hmuna um ding le chu hmuna thil tlung ngèi ngêi ding hieng rinumna, vangduoina, phingṭam dangchâr, ṭitumna, thlaphângna, beidongna le thina chen tuok inhuom dinga thlang le inpe an nih.
Sipai ringum chun rinum tuor ding chan (share) a nei ve a. Rinum tuor ding chan hre chienghai chun thafan takin an tuor hlak. Tienlai thurosie-a inthok ei hriet dânin, Peter chun martar a ni tawmin, Isu anga krawsa khai kâng kha a phùin a’n hriet naw leiin, “Kei chu a letlingin krawsah mi khai kâng ro” a tih an ti chuh. Pathien thuruk hmu chiengtuhai le a Chanchin Ṭha invoi tak taktuhai chun Krista ta dinga rinum tuor hi an va ngam pap pap de aw. Krista tuorna inṭawmpuiin an inngai a nih. Hmutheilo thil chu an hmu tlat a nih. Mosie khoma Aigupta ram hausakna po po hnawlin le Faraw lungsen ṭi loin Aigupta ram chu a suoksan a, Hmutheilo (Pathien) chu a hmu leiin sel takin a tuor a, lawmman a dong ding chu a thlir tlat a (Heb 11:26-27). Isu Krista khoma a hmaa hlimna lo hmuoktu ding lei chun, muolphona chu ngainêpin, krawsah sel takin a tuor a (Heb 12:2). Hnuoi rama sipai hai hmana chul nawk el ding, hnuoi lawmman le chawimawina hmu beiseiin an hringna chen chân inhuomin an bei a. Eini, chatuon dai ding thil le Pathien lalram ta dinga rongbawl hai hin ei bei nasat lem lem a awm naw maw?
Rom lekhathona chun Tirko Paula’n, “Rinum ei tuor khomin ei lawm pei a nih” tiin a hril a. Asan dinga a hrilhai chu rimsikna chun tuorselna a siem a, tuorselna chun nungchang nghet a siem a, nungchang nghet chun beiseina a siem a nih (Rom 5:3-5). Chu beiseina chun lunghnuolin a mi siem ngai nawh. Ei thlamuongna khom a pung a, mihai khomin sel tak le thlamuong takin rinum an tuor phà thei bok a nih. Sipai khom an hotuin thaw ding sin harsa/ rinum (mission) a pek hi an ringumna fiena ding dàm a ni nuom vieu hlak. Mission hlen suoktuhai chu chawimawiin an um hlak. Fiena tuoka ngir nghet tlattu chu a hamṭha, fiena a tuor muolsuo pha …… hringna lallukhum chu a chang ding a ni si a (Jak 1:12).
Tirko Paula chun “Krista sipai ringum angin rinum mi tuorpui ve rawh” tiin Timothe chu a’n fui a. Ama chun Chanchin Ṭha leia rinum a tuor thu dàm, tuolthattu ang ela khaidieta khit a ni thu dàm, lung ina a’n tâng thu dàm, harsatna le sukduna a tuor nasatzie thu dàm, harsatna tuor fan fan a ṭulzie thu dàm le Chanchin Ṭha leia rinum tuor ve inhuom pei dingin a’n fui fan fan a nih.
Voisun hin eini hi teh, Krista Isu sipai ei nina zâra rinum ei tuor hi ieng ang am a ni a? Hun rinum nawk zuolah ieng chen am a ta dingin rinum tuor ei inhuom ding? Hi rinum tuorna hi ei sûng tieng le puo tienga Pathien lalram humna ding le zauna dinga ei tuok zinghai an ni thei a. Nuin a nau neinaah nau hmel lawmum tak beiseia nau hase tuora kam pet meua ṭhang a lak angin thil hmutheilo chu hmua, ‘Tak Chapa’ tiin Setan râl ei donaa hin kam pet meuin ṭhang la nawk zuol ei tiu.
Ziektu: Upa (Dr.) Lalsiemlien Pulamte
