Krista Sipai – Ringum Ding Ei Nih (2 Tim 2:3)
Ringumna hi nunphung ropui/ insâng (noble) deu el a ni a. Mi ringum hai chu mi huoisen, mi filor, mi inpakum, chawimawina dong phâk an ni hlak.
Krista Isu’n sipai dinga a mi konaa hin ei sinthaw ding hi a ropuiin a poimaw leiin le a mi kotu khom inzaum tak a ni leiin einiah ringumna a mi phût tlat a nih. Chun, ei sinthaw hi hmelma, Setanin ram nasa taka lak tuma a beina hmun poimaw (strategic) a ni leiin chu dotu dinghaiah ringumna a phût nasa nawk zuol a nih.
Khawvel sorkâr khoma a ram vênghimna amanih ram ṭhuoitu poimaw taluo (VVIP) vênghimna dingin sipai naran a hmang nuom naw a, sipai ṭha zuol bik commando hai a sor hlak. Sipai, thiemna nei ṭha bik bâkah an ringumzie fie tah (tested) a hmang hlak a nih.
Voisuna Krista sipai ringum dinga thlanghai hin ei nina/ umna hmun poimawzie (strategic importance) hi ei uksak ta naw mani ding, mi ringum ei vangin a’n lang tah. Kohran nawlpui khom hin ei umsan poimaw èm êm hi ei lo theinghil tà mani ding, Krista sipai ringum ding, mi ei sersuok zo ta naw niin a’n lang. Pathien nekin pawl ram hin ei lungril a lo hluosip zo tah nîng a tih.
Manipur buoinaa inthok inchûk ding a um. Ei ram le ei mi hai chân el thei ding ngirhmun derthawngah ei um ei inhriet a, chu chuh dangtu le humhimtu dingin ram le hnam ta dinga mi ringum le màni hringna chen khom chân ngam ding, pasal ṭha an hung suok el a nih. Sahrângin pasal ṭha a ko suok hlak an tih. Voisuna, ringtuhai kalchawinaa khom hin ei ngirhmun hi ngaitha naw inla chu Krista pasal ṭha ei suok rawn ding vei leh! Ringtu damsan le kohran hai umsan hi ei ngainep leiin suknomnatna le rinumna hmasuon ngam Krista sipai ringum ei invâi an ta awm ie. Setanin ram a lak pei hin ei lungril sukna sien, Krista pasal ṭha mi ko suokpek sien nuom a um ie.
Krista ta dinga ringumna chun Krista ta dingin a ṭhangna a’n phet ngai naw a, a nghet tlat a, ringtlak a ni a, a teirei pei a, thu an awi ṭha a, màni ta dingin a hring ngai naw a, Pathien a hmangai top el a, a tuorsel bok a. Ei sandamna dinga Isu Krista’n ringum taka a lam hung hraw kha ei enton ding ṭha tak a nih. Ei Lalpa Isu Krista hmana ei ta dingin thi chenin a ringum a, nang le keiin teh, a ta dingin ei ringum ve thung naw ding maw? Isu’n “Tu khom màni hringna hum tum chun chân a ta, tu khom keima leia hringna chân ruok chun hum a tih” (Mt 16:25). Manipur ei buoinaa pasal ṭha haiin hringna an pek kha ram ta dinga an ringumzie an suklangna vortawp a nih. Tu khoma an ringumna an ringhla ta ngai nawh.
Ziektu: Upa (Dr.) Lalsiemlien Pulamte
