Krista Sipai – Khawvel Thil Dangah Inkei Buoi Lo (2 Tim 2:4)
Sipai chu civil mi (sipai ni lo ta phot) leh danglamna an nei a, civil mihai nun dân, lungril thlêk dân le khawsak angin an khawsa ngai nawh. Active service-a um an ni leiin thil dangah inkei buoi hman an ni nawh. Krista sipai chu sipai dinga ko a nina hre zingin a sinah a’n bûr char char ding a nih. Civil mihai khawsak dâna inthok a’n sie kieng a ngai a, khawvel thilhaiin a nun le lungril a sukpengpek a phal ding an nawh.
Indona hmuna um sipai chun indo lai in-le-lo nei dân ding dâm, ruolhai sukhlim dân ding dâm, nauhai khawsak dân ding dâm, màni hming hlutna ding dâm le thil dang dang a ngaituo buoi ngai nawh. Hienghai po po hi ngaituoin sukpuitling tum ta sien chu râl do ding theinghil a ta, a silai hmang tum bok nawng a ta, a thilthaw ding (mission) a hlen naw el chau ni loin râlin a hringna chen an lakpek thei a nih.
Krista sipaihaiin ei sipai nina theinghilin khawvel thil dangah ei inkei buoi leiin sipai sin thaw dingah ei thlûr char char (focus) thei naw a, ei umna ei inhmang a, ei hriet naw kârin ei chau a, ei ralthuom chawihai khom hmang tlak loa siemin, ei nina ei phursuok zo ta ngai naw a nih.
Khawvel thil danga inkei buoi lo Krista sipai chun a hotuin râl do dân ding le hne dân dinga a thupekhai phursuok dân ding chauh a ngaituo hlak. Isu’n, “Tu khom leileta lângkawn chel ta sia hnung tieng ngha chu Pathien rama sinthaw tlâk a ni nawh” a tih (Lk 9:62). Ram sipai dinga lak tah hin a sin uksak dêr loin ama le a sûnghai khawsakna ding chauh ngaituoin invir buoi zing el ta sien chu, sipai dinga latuhai lungril suk beidong a ta, a appointment khom ennonin ṭhiek nawk nuom ngêi an tih.
Tirko Paula rongbawlpui Dema chun tu lai khawvel a ngainat leiin a rongbawlna a maksan thu ei hmu a. Krista sipai ni sia, khawvel thil dangah lungril pek chu mi sukhnoktu le ṭangkai loah mi siemtu a ni hlak. Chuong ang sipai chu bu chi, hlingbuk laia tla ang an nih. Dam sûng khawsak lungkhamna hai, hausakna hai le inhoitirna hai chun a dip a, rà puitling an insuo thei ta nawh (Lk 8:14). Hieng ang ngirhmuna umhai chu an sinthaw a hlawk thei ngai naw a, indona hmuna hmang tlak lo, mi hnotsak le a tawp a tawpah bân chi an ni hlak.
Sipai chun civil mihai um dân le khawsak dân hai (civilian affairs) a lak el chauh ni loin a ngaizawng sin ding khom a ni naw a, chuong naw chun a sinah hlawtling thei naw ni a, chun sipai dinga latu, a pu khom suklawm thei bok naw nih. 1 Jn 2:15-17 khoma khawvel hmangai lo dingin a mi’n fui a ni khah. “Khawvel ruol ṭha ni nuom ta phot chun Pathien hmelmaah a’n siem a nih” tiin Jak 4:4 ah a mi hril a. Indo laia civil mi ngaituona ei put a, an nun ei enton a ni chun chu chuh sipai ei nina mi’n hnawltirtu le sipai sin phursuok thei lo dinga mi dangtu ding a nih.
Heb 12:1-a “Mi sukhnok le kei châi thei suol ta phot chu the thlain, ei hmaa intlânsieknaa hin sel takin tlân ei tiu” tia a mi’n fui angin Krista sipaihai hin khawvel thil dangah inkei buoi loa ei mission ei thlur char char a, thlarau indona hmunah ṭhahnemngai tak le hlawk taka bei ṭâng ṭâng dingin insiem thar ei tiu. Ringtu naran nun ni loin Krista sipai nun khal dinga kohai ei ni lem si a.
Ziektu: Upa (Dr) Lalsiemlien Pulamte
