Indona Ṭha Chu Bei La
Paula chun Timothe chu thuring indiklo inchûktir hlaktuhai khap dingin a ngên a. Inchûktirna indik lo umna hmuna chun ringtu ringna lawng chu a koi thei a, kohranah inṭhedarna a pieng thei bok a, chun chanchin ṭha thutak chun hmun a khuor thei ngai nawh. Thuring indik lo thedartuhai chu Krista le Gospel hmelmahai an nih. Hi hmelmahai do le hmasuon hi indona ṭha a nih. Hi indona hi ringna intlansietna ṭha (DV) amanih ringna indona ṭha (NIV) tiin a mi hrilpek bok a.
Ringtu taphotin Setan lalram lien nawna ding le a kulhai sukchim a ni theina dinga ringnaa ṭhang ei lak hi thlarau indona a nih. Chu indonaa chun Pathien tieng ei ṭhang a, ama lalram suklienna dinga hma la ei ni leiin indona ṭha a ni bok a nih. Ringtu tin ta dingin hi indona hi puo tieng le sung tiengah a um a. Pathien hmangaina vor tawp suklangna, a Naupa Isu Krista fe thlenga ei sandamna chanchin ṭha hre thei lo dinga ei kawl le kienga ringnawtuhai laia Setan ṭhanglakna hi indona hmun lien tak a nih. Chu chu ringtuin ngun taka ṭongṭai le misawnari tir suok hi ei ṭhanglak dân ding a nih. Chun, einiah mihriem hlui mizie hmanga Setan ṭhanglakna hin felna hmangruoa hmang tlak lo dingin a mi sukbuoi hlak bok a. Pathien thuin mi tin sukthienghlima um dingin a mi’n fui a. Pathien ta dinga bêl thienghlim le felna hriemhrei ni thei dingin einiah do ding râl ei nei bok a nih.
Hi indona hin chatuon chena kakhawk a nei ding a ni leiin ngai poimaw le do tak taka do a ṭul a nih. Chuleiin, Krista sipaihai chun hnena ei chang theina dingin eini tiengah dil sût taka ngaituona pek, inthununna nei le a tawp khawk rawta bei a ngai a nih. Isu Krista’n a sipai ringum dinga a mi thlang ta si chun indona ṭha hi bei ṭang ṭang ei tiu. Hnena chu ei Lalpa ta a nih. Amen.
By: Upa Dr. Lalsiemlien Pulamte
