Hung ro, LALPA kuomah kîr ei tiu – Pa âng sûng puoah lawmna le hlimna a um nawh
Lk 15:11-16 ei tiem chun naupa tlân hmangin a pa kuomah a rochan a hni thu ei hmu a. Pa hai dam lai zinga rochan hni chu, ‘Pa, thi ta rawh’ tina ang tluk a nih. A pa lakah zalen a nuom a, a khawsaknaa a pa hung inrol ding a dit naw a, a thil thaw tum le nun hmang nuom danah a pa hung inrol a phal naw a, a pa leh inlaichinna le inkungkeina hrim hrim nei ta lo dingin a pa in a suoksan a, ram hla takah a fe tah a nih. Ringtu tam tak chun Pathien thua inkhuokhirna hnuoia um nghok um tiin màni nuom dàna nun hmang a, khawsak nuom ei um hlak hrim a nih.
Naupa tlân hmang chun a nuom ang hrimin ram hla taka chun inhoi chênin a ro chanpuol po po chu a sukriral vong tah a. A duthusâm ang takin a nun hmangin porche tak khoma a khawsa a. Hlimna hmun ni dinga a ngai kha a ta ding chun a nei po po a chênralna hmun chauh a ni lem tah a. Hlimnaa a ngai hlak kha um song loin a bo pek ta a, a nei a chên ral ta si a. Ṭampui tlain a beidongna chu a thuo thuoin a hung inkhum nawk nghâl a. A paa inthok a suok hin a nun porche taka a hmang el khêlah a khawsakna khom a tlabal phà a. Chu hnung khom chun a la har suok nawh.
Plan ‘B’ neiin rem a ruot a. Thaw fu inti deuin chu rama mi pakhat, vok vâi hlak mi a va bêl a. Juda hai ta dingin vok hi sa thieng lo a’n leiin a sa an fak naw a, a vâi khom an vâi bok nawh. Hi naupa tlân hmang ruok hin chu a phîng a ṭam luot leiin vok bua an pek fanghra chun insukkhop ve tak a nuom a. A ngirhmun chu a va’n hnuoi sawt ta de maw. Juda mi a ni, inzaumna khom a humhal zo ta nawh.
Pa âng sûnga inthoka tlân hmanghai hin lawmna sawn a ei bêl hlakhai hi lawmna tak tak le lawmna tluontling an tling zo nawh. Chun, thlaraua le taksaa pasietnain a mi’n khum el bâkah Pathien nau ei ni inzaumna khom ei tungding zo ta ngai naw a nih. Chuong ang ngirhmuna um zing nekin hung ro, LALPA kuomah kîr ei tiu.
Ziektu: Upa (Dr.) Lalsiemliem Pulamte
