Krista sipai ralthuom chu (Ef 6:14-17)
Krista Isu sipai, thlarau indonaa thei tawpa ṭhang la ei nih. Khawvel do dân angin râl ei do naw a. Ei hriemhrei hmanghai khom khawvel ralthuom an ni naw a, Setan kulpui ṭhiek theina Pathien ralthuom thilthawthei an ni lem.
Krista sipaiin ei dohai hi mihriem râl ni loin, lalna hai, thuneina hai, hi khawvel inthim chunga roreltuhai le van hmuna thlarau suol umhai chu an ni lem a. Pathien ralthuom kima ei inthuom chun hmelma dàng thei ei ta, ei dàng hnung khoma ei dingchang pei thei ding a nih.
Chu ralthuomhai chu Ef 6:14-17 ahin ei hmuh a. Thutaka ei kawng hrena felna awmphaw chu hak dingin a mi’n fui a. Rom sipai chu korfuolin an inthuom hlak a, chu chu khit det lo chun indonaah a sukhnok hlak leiin kawnghren an hmang hlak. Thlaraua mi lo sukhnok thei le mi keibuoi thei taphot chu thutakin a hrende ding a nih. Felna chu kawngchûn a ta, ringumna kawngzem a tih (Isai 11:5). Awmphaw chun ei lung, chuop le taksa peng poimaw danghai a vênghim hlak. Felna amanih thienghlimna chu Pathien zie poimaw a ni leiin chuong anga inthuom hai chu Setanin tawk harsa a ti hlak.
Remna Chanchin Ṭha chu pheikhokah bun ding le sirsan nghetah hmang dingin a mi hril a. Rom sipai pheikhoka hin hling an inbûk a, chu chun hnuoiah nghet takin a man det hlak. Chanchin Ṭha zârin Pathien leh ei lo inrem nawk tah a. Pathien chu eini tieng a ṭhang tâk leiin ama chu ei hratna le a mi ṭhangpuitu a ni a, chu chu mi suknghettu ei sirsan a hung ni tah.
Misuolpa meithalhlawnhai sukmit theina dingin ringna awmphaw hak dingin a mi tih a. Rom sipai awmphaw hin thalmu chok khom a dangin a sukmit thei a, mihriem pum po po a vênghim thei a nih. Pathien thu le a thutiem hai hi innghat tlak an ninaa hin ei ringna a suknghetin thuawina a ra suok a. Chu chun Setan thalmu meichok thlemnahai a sukmit hlak. Pathien thu tin hi thudik a na, ama bêltuhai ta di’n phaw a nih (Thuv 30:5). Lalpa thutiem a’n khêl ngai nawh, a bêltu di’n phaw a nih (Sam 18:30).
Sandamna chu lukhumah hmang ding a nih. Lukhumin ei lu le ei thluok a mi vênghim pek a. Thluok hmanga ngaituonain sandam inhriet chiengna dâm an ringhlatir tum hlak a. Chu chun ringhlelna le lunghnuolna a’n tlun thei hlak a nih. Isu Kristaa ei sandamna chu Setanin a suksiet thei ṭhak naw a, sienkhom ei thluok ngaituonaah, ‘Hieng lawm lawma sandamna ropui hi nang misuolin i phu chie amani?’ ti ringhlana a mi siempek thei a. 1 Thes 5:8-a chun, “…. Sandam beiseina chu lukhuma hmangin, har fim takin um lem ei tiu” tiin a mi’n fui a nih.
A hmaa ei hril tâk hai po po kha invênghimna (defensive) ding ralthuomhai an ni a. Tuhin, hmelma laka invênghimna le beilêtna (offensive) dinga hmang thei ve ve, Thlarau kawlhnam, Pathien thu chu pai zing dingin a mi’n fui ta a. Thlalera Diabolin Isu Krista a thlem khan Isu’n tharum le a thilthawtheina hmang loin, Pathien thu (‘ti ziek a nih’ ti peiin) hmang lemin Diabol a hne a ni khah. A tawpah Diabolin a law ngaina a hriet ta naw ning a ta, a maksan hlol el a nih. Pathien thu hin thil a lo thaw thei khop el ie. Heb 4:12 a chun “Pathien thu chu a hring a, thil a thaw thei a, kawlhnâm ngei ton ieng ang nek khomin a ngei lem a” tiin Pathien thu thilthawtheizie a mi hril a nih.
A tawp taka ei hril nuom chu ieng huna khom thlaraua ṭongṭai dingin a mi’n fui a nih. Tisain ei ṭongṭai hlak leiin tisa thil, damsung khawsak ngaituona thilhai ei hni rawn thei taluo a nih. Beidong tawpkhawka ei um a, ṭongṭai dân ding ei hriet naw lai khomin Thlarau chun hril ruol loa inrumin a mi ṭongṭai pek lem hlak a nih (Rom 8:26). Màni tading chauh ni loin mi thienghlim po po ta dinga ṭongṭai ding ei nih. Hriet le theinghil infawm ni loin ṭongṭaina hi thaw ṭâl ṭâl ding le bei fan fan ding lem ei nih.
Rambungin a sipaihai ralthuom ṭhaa an thuom thei chun a ngai a muong phà hlak a. Eini, Krista sipaihaiin, ei ralthuomhai hi thilthaw thei tak a ni hrea, thafan tak le inringzo taka Setan râl do dinga inthuomin ke pên suok ei tiu khai. Hnena chu Lalpa ta a ni si leiin hnena hlado insam chauh ei bâk an naw ding maw?
Ziektu: Upa Dr. Lalsiemlien Pulamte
