Hung ro, LALPA kuomah kîr ei tiu – Pa chun ei nina a mi tungding nawk ding a nih
Lk. 15:17-24 hei tiem hmasa phot ei tiu aw. Hi taka hin naupa tlân hmangin a pa kuom tieng a kîr thu le a pain a nina pangngaiah a lo tungding nawk thu ei hmu a. Naupa tlân hmang chun, “Hi taka hin phingṭamin ka thi el ding a ni si a” tiin a’n ngaituo har a. Pa àng sûnga inthok suok a, suol chêna inhoi ei tina hmuna hin ei um zing chun ei thi ngèi ngêi ding a nih. Naupa tlân hmangin, “Tho ka ta, ka pa kuomah feng ka ta” a ti ang hin tho ei tiu a, bu fak sêng lo umna le hmangaina luong liemna hmun, ei pa kuomah kîr ei tiu khai.
A suolzie inhrein naupa tlân hmang chun a pa kuomah thupha a chawi tum a. Chun, a naupaa inbûk tlâk khom a ni ta naw thu a’n hriet a, a beisei sun chu a pa ina hlawfa pakhat ang chauh a lo ni tah. A ro chanpuol po po a chên riral hnung chun a beiseina chu a’n hnuoi nuom sawt khop el!
Naupa tlân hmang khan ama suol leiin a pa khan lo hmu nuom nawng a ta, lo hnawl a ta, chun lo hal zêk bok a tih ti ring mei a tih. A’n naw khoma, a ṭhat a’n suo tawpa khom a hlawfa pakhat dinga a lo pom ṭawk kha a’n beisei a nih. Sienkhom, hla taka a la um laiin a pa chun a lo hmu a (a naupa hung kîr ding a lo thlir zing a ni awm), a lunginsiet èm êm a (a ro chan ding intêl ta sien khom), a tlân a (a muolpho ding dawn loin), a kuo a (hnawl nekin a lo pom), a fawp ngawi ngawi (pa-fa inlaichînna a suklang) a nih. Chuongchun, a siehlawhai kuomah, “Zakuo ṭha tak inhâktir unla, kutsebi inbuntir unla, pheikhok khom inbuntir unla, bawng tuoi thau thatin ruoi ṭhe’ng ei tiu” tiin thu a pek a nih. Hienghai po po hi inneitu, nau nina thuomhnaw le chawimawina inentirna vong an nih.
Pa nàu a nina kha a rochanah ni loin a pa lungrilah a um lem a. A naupain a ro chên zo ta sien la khom nau a nina, a pa lungrilah um ruok kha chu chên zo thei ding ruol le a naupa suolin a sukbo thei ding chi a ni naw a. A naupa’n a’n sîr a, a pa kuomah a kîr a, thupha a chawi khan nau nina kha tungding pekin a um a nih.
Voisuna pa àng sûng maksana suol chên dinga ei umna hmunhai hi ei umna ding hrim an ni naw leiin hi taka hlimna hin tawite takzet chauh a mi sukhlim thei a. Sienkhom, nau nina nei tahai chun ei taksa le thlarauin ei umna ding hrim, ei pa in ei thlakhlain ei ngai ngawi ngawi nawk hlak a nih. Ei damna ding tak chu ama kuomah kîr nawk a nih. Ei Pathien chun ama le ama a’n phat thei naw a, a ringumna a ropui si leiin a mi lunginsietna a tlol ngai nawh.
Pathien ei hmangaina hmasak ei lo bânsan a, amaa inthok hla takah ei lo tlân hmang tah khom ni sien, insîra sima ama kuom tieng ei kîr chun ama leh ei inlaichînna tungding nawk ning a ta, a ina lawmna, hlimna, hnienghnârna le thil ṭha tin rêng ei nei nawk thei ding a nih. Chuleiin, hung ro, LALPA kuomah kîr ei tiu.
Ziektu: Upa Dr. Lalsiemlien Pulamte
