Hung ro, LALPA kuomah kîr ei tiu – Ama hmangai dingin a mi phût (Hos 6:4-6)
Israel nauhai angin Pathien ei hmangaina hi ṭieusum le zîng daidaw ral nawk el ang a lo ni ve el ta’m aw. Hla pakhatin, “A’n lang châng châng” a ti ang deuin Pathien ei mamaw chauh chânga ama ei hmangai chun a pawhleu deu naw maw? Ama chun ieng tik lai khoma ei lungril po poa, ei thlarau po poa, ei ngaituona po poa hmangai dingin thu a mi pek a nih.
Lalpa laka ei ringumnawna le ei inpêk tehlem leiin a rorêlna chu ei chungah tla thei zing a nih. Ama hmangai si loa ama bie/ chawibiek dinga ei inpêkna hai hin ama suklawm thei naw nih. Pathien chun, “Hlânbiekna neka ka dit lem chu hmangaina detindo a na, pumraw thilhlan inhlan nekin Pathien hrietna ka dit lem” a tih. Ei lungril indik si loa Pathien kuomah puo tienga inlang mawi thei, thilhlan, thilpek amanih thawlawm ei pek hin a lawmna a tling zo chuong nawh. Hieng anga ei thaw hin Pathien lungrila a ngaituona ei ṭhel hle ning a tih. Thilpekhai nekin Pathienin eini, ama ei hmangaina hi a dit a nih. Hmangaina inthûk tak le inlaichinna ṭha tak ei nei hi a mi phût a nih. Chu ding chun Pathien lawm tlak hlanbiekna hring le thienghlima ei taksa inhlan dingin a mi ngên a nih.
Chunghnung tak sûngkuoa mi siemtu le ei chatuon pa, Pathien leh inlaichinna inril tak le ditum tak ei nei nawk theina dingin, hung ro, LALPA kuomah kîr ei tiu.
Ziektu: Upa (Dr.) Lalsiemlien Pulamte
