Hung ro, LALPA kuomah kîr ei tiu – ṭhangpuitu dingin mi dang ei bêl am?

Hos 6:1 a chun ‘Hung ro, LALPA kuomah kîr ei tiu’ tiin Israel hai fielna ei hmu a. Hi thu umzie hriet thiem ding chun Hos 5:10-15 tiem phot a ngai a. Châng 13-a chun Israel haiin anni ṭhangpuitu dingin Assuria lal an bêl a, sienkhom ama chun a sukdam thei nawh. Sienkhom, chuong ang ngirhmuna a um lai chun sukdam theitu hretu Hosea chun LALPA kuoma kîr dingin Israel hai fielna a siem a nih.

Voisun hin thlaraua ei dangcharna le phingṭamna sukre dingin khawvel thilhai dapin ei innghat tum el ta’m aw? Khawvelin a hlutsak hieng varna, hausakna, ropuina le khawvel thil suongum tak tak hai hin lungawina iemani chen mi pe hlak de sien khom an dai sawt naw a, lungawina tluontling a tling zo bok nawh. Khawvel thilhai mi sukdam thei dingin anni leh inzomna ei nei naw tlat si a. Pathien nauhai chu lo petek hlak inla khom ama leh inzomna/ inlaichinna nei ei ni tlat leiin amaah chauh lungawina le damna ei hmu hlak. Mi pakhat nakawr na hin nuhmei tieng daktor pan pan sien khom dam thei chuong naw nih. Nakawr daktor a pan pha phà leh a nakawr na a dam thei chauh ding a nih.

Voisuna ei natnahai hi khawvel thilin a sukdam thei an ni naw a, damna indiktak chu LALPA-ah a um. Ama chu mi sukdam dingin a’n pei zing. Hung ro, LALPA kuomah kîr ei tiu.

Ziektu: Upa (Dr) Lalsiemlien Pulamte

---

---