Krista Sipai – Hotu Suklawm Tum Tlat Ding (2 Tim 2:4)
Krista sipaihai hotu le sipaia mi thlangtu chu Krista Isu a nih. A mi thlang el chauh ni loin a thisen mana a mi’n chawkhai ei ni a, Lalpa bawisuok (freedman) le Krista bawi ei ni lem hman hman a nih (1 Kor 7:22-23).
Pathien lalram vênghim ding le Setan râl do dinga a mi thlang, sipai ei nih. Van khuo-le-tui nina chang tahai ta dingin hi hih indona ṭha a tling phâk a, ringnaa ei intlânsiekna ṭha a ni bok a nih. Ram bung sipaihaiin râl an do lai khom hin râl an do dâna khan hotu an suklawm thiem am ti le lawmman dong phâka thaw am an ni ti hriet theina le inkhina a ni bok a. Thlarau rama indona khom chuong ang chu a ni tho a nih.
Hotu suklawm dân chu a mi kona san (purpose of calling) sukpuitling a ni el a nih. 2 Kor 5:9-a chun taksa ina chêng ei la ni amanih ei ni ta naw amanih khomin ama suklawm ei tum tlat a nih tiin a mi’n fui a. Kristain suola inthoka a mi’n tlanna hi ei sui chîk po le ku hin khawvela hringnun ei khal lai le chu hnunga khom ama suklawm zing hi a phu takzet el a nih. Tirko Paula chun, mihriem suklawm tum ni loin, lungril fietu Pathien suklawm dingin thu kan hril lem hlak a nih (2 Thes 2:4) tiin mihriem mitmei vêng a, anni suklawm nekin, ngaituona hretu Pathien suklawm lem ding a ni thu a hril a. A ni ngêi, Pathien rongbawlnaa hin mihriem hotuhai suklawm tumin an mitmei dâm ei vêng châng um hlak a tih. Mihriem mi’n khîna nekin Pathien mi’n khîna hin kongro a suk lem a nih.
Ieng tinam a mi kotu le ei hotu chu suklawm thei ei ta? A mi kona hi a hmasa lem nina le chung hnungna (priority) pek ding a nih. Mawphurna a mi pek le amaah inpumpêk tak tak ding ei nih. Thi chen huoma Krista mi kona san phursuok hi hamṭhatna le chanvo ṭhaah ngai ding a nih. Isu Krista’n, “Tu khom màni nun hum tum chun chân a ta, keima leia nun chânhai chun hum an tih (Mt 10:39) tiin ama ta dinga hringna inhlantu chu hi nuna inthoka a hlawkpui thei ropui tak a ni thu a hril a nih. Hotu suklawmtu sipai chu sipai hlawtling, hotu ditsak hlaw phâk le lawmman dong thei chin an ni hlak. Thlarau rama sipai dinga kotu che Krista Isu suklawm hi ei thil tum tak le mi sukphûrtu ni dingin hma la zom pei ei tiu leh.
Ziektu: Upa (Dr) lalsiemlien Pulamte
