Krista Sipai Ei Nih (2 Tim 2:3)
Krista sipai ei nih. Thlarau rama sipai dinga mi thlangtu chu Krista Isu a nih. Krista lalram vênghim ding le inzau/ suklien chu ei sin tak a nih.
“Khawlai ram sipai am i nuom tak a?” tiin mi’n don hai sien chu Amerika sipai tîng ka tih. Asan chu Amerika ram, hi khawvela ram hausa, khawsak inhoina hmun, ram thilthawthei tak, a sipaihai râl thuomin an thuom ṭha le a ram hi khawvelin a en chung a ni leiin. Voisuna sipai ei nina Pathien ram hi chu a khai khin thei ding awm umin ka hriet nawh. Hi ram hi chu chatuon dai ding, thuneina le thilthawtheina po po nei, ieng ang hmelma khoma a hne lo ding ram a nih.
Sipai chu indo dinga inpei a ṭul a, ei umna hmun chu indona hmun a nih. Indona chu ei sûng tieng le puo tienga um a nih. Thlarau Thienghlim chênchil ni tah inla khom einiah mihriem hlui hin ram a hluo tum nasa hlak. Inhnekpui ding le ei hne pei ding, mihriem hlui mizie einia hin a la um zing a. Tirko Paula khom kha a buoi a ni khah. Eden huona mihriem tlûkna kha a nghong a lo nasa ngêi de aw. Ringtu/ Krista sipai taphot sûngah Setan chêng ta loa Thlarau Thienghlim a chêng hnung khom hin hi mihriem hlui hin a mi la sukbuoi thei zing a, do tham a tling a nih. Chun, puo tieng, ramthima Chanchin Ṭha la hrelohai laia hmalak ding le do ding ei nei bok. Indona ei hmasuon zing hi indona puitling a ni leiin sipai puitling a phût ve thung tlat a nih.
Ei dohai hi mihriem râl ni loin khawvel inthim chunga rorêltuhai le van hmuna thlarau suol umhai an ni leiin ei ralthuom hmang ding – thutak, felna, remna Chanchin Ṭha, ringna, sandamna, Pathien thu le thlaraua ṭongṭaina hai (hieng hai hi hun dangah la chip chier ei tih) chun ei inthuom a poimaw bèk bêk a nih.
Sipai chu an nun hmang dânin (lifestyle) a zir a ṭul a. Duty-a um ding, silai hmang dân inchûk zing le mani taksa khom insawizo zing ding a nih. Puo tieng inlangah (uniform) khom sipai ei nih hriet thei nghâl dinga inthuom ding ei nih. Chun, mihaiin an mi lo thlir le an mi’n biekpui khoma ei hoiher le lungril put dâna khom sipai ei nizie an hriet thei nghâl ding a nih.
Sipai hi ei nina a ni leiin sipai zie ei nei a ṭul a. Miziea ei nei ding poimaw èm êm hai chu ringumna, rinum tuor inhuom, hotu thuawi theina, màni inthunun theina, hmelma hriet chieng theina le a dang dang um a tih.
Hieng zawnahai hmangin lungrilah ngaituo zom ei tiu. Voisun hin Krista Isu sipai i nih ti i’n hriet chieng ta’m? Miin an hei thlir che hin Krista Isu sipai i nih ti an pom thei ding che am? Krista sipai i nina i suklang thei nawna, i bâknahai ieng iem an na?
Ziektu: Upa (Dr.) lalsiemlien Pulamte
