Hung ro, ei ram indin thar nawk ei tiu – Pathien rawn zing pumin
An ram le Jerusalem indin thar dinga Israel saltang kirnawkhai hmaṭhuoitu Nehemia khan thei tawpin hma a lak a, an Pathien khom an rawn nasa hle a nih. Lal Artazerzia dawn ding uoiin a pek hma khan, “Voisun la la hin diksakna ngên dinga hi lal hmaa i siehlaw ka ngir ding hi mi’n hlawtlingtir hram rawh” tiin Pathien a hni a. Lalin, “Iem a na i dit chu?” tia a’n biekpui lai zing khom khan Nehemia chu Pathien kuomah a ṭongṭai a. Pathien a rawnna zâra chun Israel ram hang indin thar dinga Nehemia-in phalna a hni chu lal chun a pompek a. Chubakah, Judai ram a tlung chena vênghimna khom a pek a, chun an hmangruo ding thing khom a peksa bok a nih. Pathien hi biek thei tah laklaw hin chu a tiktlaizie mihriem hmangin a suklang hlak a nih.
Jerusalem kul an hei bawl ṭha chun theidatu ding hmelma an hung inlang nghâl a. Sanbalat le Tobia, Babulon lal rama thuneitu le ofisar tak tak hai chun Judahai chu mi rethei an nizie, an inthawi rawnin kul bawlnaah ṭangkaina a nei naw dingzie le an lung rem khom sihal khoma sir chim thei a tih tiin an deusaw tawl a. Chu phing leh Nehemia chun an deusawnahai chu an chungah intlâktir ding dâmin, ram dang mihai inroktir ding dâmin, an bawsietna ngai tha hrim hrim lo ding dâmin, an suolnahai thai bo lo ding dâmin Pathien kuomah a ṭongṭai a.
Jerusalem kul siemṭhat sinin hma a sawn pei lei chun an hmelmahai chun Jerusalem hung bei a, buoina siem tumin ro an phier a. Sienkhom, Judahai chun an Pathien kuomah an ṭongṭai a, anni laka invêngna dingin sûn le zânin vêngtu an sie bok a.
Hmelmahaiin Juda mipui hai kul bawl ṭhat an suksiet thei naw leiin an hotu tak, Nehemia chungah harsatna an hung siem a. Ono phaia intuok khawm dinga fielna voi li lai Nehemia kuomah thu an hung incha chu, “Thil ropui tak ka thaw lai a ni leiin kan hman nawh” tiin a don a. A tawpah, Sanbalat chun Nehemia kuomah lekha thonin, “Judahaiin hel in tum le nang hi an lal ni i tum thu an hril thang a. Hieng thu hin lal kuom a tlung ngêi ding a nih” tia inṭhiin inbiekpui a tum a. Hi thu hi a phuok fawm el a nizie thu Nehemia-in a donna a thon a. A kut sukhratpek pei dingin Pathien kuomah a ṭongṭai a.
Hmelmahai sukchau dinga ṭongṭaina hi Pathien khoma a pom zawng a lo ni awm a. Neh 6:14-a chun, “Aw ka Pathien, Tobia le Sanbalat haiin thil suol an thaw po po hi hre zing la, zawlnei Noadia le ama nu ang boka zawlnei dang mi sukzâm tumtuhai po po khom hre zing tawl rawh” tiin Nehemia-in Pathien a ngên a. A donna ei hmu nghâl a nih. Châng 15-a chun kul bawl chu an zo ta ti thu a’n ziek a. Hmelma an hung inrol ta naw lei ning a tih. Chun, châng 16-a chun an hmelmahai chun an ṭi a, an zâm bok a, an Pathien ṭhangpuina leia kul bawl ṭhat an hlen a nih ti an hriet vong si a ti thu ei hmu nawk a. Pathienin hmelma lungril sukdawiin suol an thaw ding an kuthai chu a thlungpek niin an lang.
Ringtuhai hi ei hringnun kong tin renga hin Pathien kuoma ei ṭongṭai hi a va poimaw de aw. Mi ditsak theitu ding lunginsietna ei mamaw huna dâm, mi sukse theitu dinghai laka vênghimna dâm le hmingsiet thei ding ngirhmuna um châng dâm hin Pathien hi bêl a, a kuomah ṭongṭai mol mol ding ei nih. Pathien rama ei rongbawlna le ei ni tin khawsaknaa hin Pathien leh inrawn pei hi thil ṭha a nih. Ama chu ei sandamna dinga ‘Remruottu Mak’ a ni ang hrimin ni tin hin a remruotna ei poimaw êm êm a nih. Ieng tik lai khoma rawn thei le rawn tlak (rawn a phu ti lem ding) Pathien ei nei hi ei va hamṭha lawm lawm de!
A ziektu: Upa (Dr.) Lalsiemlien Pulamte
