Hung ro, ei ram indin thar nawk ei tiu – Pathien hmaah thupha chawi
Nehemia-in Jerusalem kul a chim se vong a, a kotkharhai a kâng siet vong thu le saltâng kir nawkhai ngirhmun a sietzie thu a hrietin a ṭap a, ni iemani zât bu ngheiin Pathien hmaah a ṭongṭai a. A ṭongṭai hin Pathien sansuokna a hni nghâl naw a, thuphachawina’n a ṭan. “I lakah nasa takin kan lo suol ta a, a nih, keima sungkuo ngêi khomin thil suol kan thaw ta a” (Neh 1:6) tiin Mosie hmanga Pathien thupekhai, thusuokhai le dânhai an lo nghatsan thuah Pathien hmaah thupha a chawi a nih.
Thuphachawi hi suol ei nizie inhrietna le inpuongna a nih. Pathien hmaa le mihriem hmaa thupha chawi hi harsa ei ti êm êm hlak. Hi hi Setan sinthaw a ni a, einiah chapona a mi siempek a, “Ka suol a nih, ka thaw suol a nih” ti hi ei rin bêk bêk el hlak a nih.
Nehemia chun an ram le hnamin an tlûksietpui san a hriet a, Mosie kuoma Pathien vau lawkna, “Ka lakah in ringum naw chun hnam tin lai the dar ka ti cheu” ti thu kha a hriet suok a. Israel hnamin saltângna le sietna nasa tak tuok sien khom, “In hung inlamlêt a, ka thupekhai in zawm chun, kawl kil tawp chena hnot dara umhai khom ka hming chêngna dinga ka thlang hmuna chun ṭhuoi khawm nawk vong ka ti cheu” tiin sansuokna lampui a siem pek a. Pathien hi a ṭhain ngilneina a va hau lawm lawm de! Hremnaa inthoka suokna lampui ding a siem pei hlak. Chu sansuokna Pathienin a tiem kha hre zing dingin Nehemia-in Pathien lunginsietna a ngên zui nghâl bok a. Hieng anga Nehemia-in a thaw ngamna san chu Pathien kuomah thupha a chawi lei a nih. Thuphachawina a um phot naw chun ngaidamna a um thei nawh. Ngaidamna boin sansuokna le tungdingna a um thei bok nawh.
Ṭhuoitu chauh thuphachawina hi a hun tawk naw a, mipui suol inpuongna a ṭul ve a nih. Ṭhuoitu thil ṭha thaw hin mipui enton ding le thaw ding awm lampui a kawkhmu hlak. Nehemia bung 9-a khan mipuiin suol an inpuong ei hmuh a. Bu ngheiin, saiip silin, luah pilvut an phul a, an suolnahai le an pi le puhai ritlona lakah thupha an chawi a. Chu zova chun Pathien chu an chawibiek a nih.
Tulaia ei ramin namenloa buoina ei tuok hi mimal pakhat le hnam pakhat ei intum el thei a. Amiruokchu, ei ram, Kristien ram tia ei hrila hin, khawtlâng nun, kohran kalchawi dân le mimal khawsak dân ei suichîk chun Kristien ei nina hi hriet thei ding a tlawm tah in ti naw maw? Chuleiin, Pathien mit ei lo tlung ta naw a ni chun, thupha chawi chu ei thaw mak maw ding a lo ni tah. “Kei, ka sûng hai le kan hnamin suol kan lo thaw a, thupha kan hung chawi a nih” tia Pathien kuomah ei tlu lut hi ei ram le hnam tungding nawkna dinga kalbi poimaw hmasa a nih.
A ziektu: Upa (Dr.) Lalsiemlien Pulamte
