Thaw ro, indin thar ei tiu – Ram le hnam damna Pathienah
“Chuongchun, voisuna thupêk ka pĕk chêu hi fimkhur taka zawm a, LALPA in Pathien chu in lungril po po le in thlarau po poa hmangai a, a rong in bawl chun, a hunbi takah ṭhâl ruo le favang ruo hung tir a ta, bu le bâl le uoiin le oliv hriek inthar in ta, in ranhai tlăn ding in ramah hlo pe’ng a ti chêu a, fain tlai in tih” (Deut 11:13-15)
Israel haiin an va hluo ding ram, Kanân ram khan ra a’n suo ṭeu theina ding chun ruotui a hmu ṭhat a ngai a. Chu ruotui pe theitu chu LALPA Pathien a nih. Israel haiin Pathien thupekhai fimkhur (faithfully) taka an zawma Pathien an hmangai chun a hun bi takah a ramin ruotui a dong ding a nih. Hi taka inchûk ding chu Pathien ei hmangai chun a thupekhai ei zawm a ṭul a nih. Thupek zawmna chun malsawmna a huoi lut ding a nih.
“Kan rama hnuoi a da tah a, ra a’n suo ṭha ta nawh” ei ti hlak a. Hi hi Pathien thupekhai ei zawm nawna le inzom tlat a nih ti ei ngaituo fuk hlak am aw? Ramin/ hnuoiin ra a’n suo theina amani ei fakzongnaa hlawtlingna chu Pathien kuta um a nih.
Khing tieng pangah, Thutak lampui inthoka ei pêt hmang a, pathien dang bea ei hmangai ruok chun ei chungah Lalpa lung sen a ta, ei ramah ruo sûr nawng a ta, hnuoiin ra a’n suo naw ding a nih. Hi hih Pathien thu a ni a, ei ringhlel leia tlung lo ding a ni nawh.
“Ngai ta u, voisun hin in hmaah malsawmna le ṭongsie ka sie: voisuna ka pĕk chêu, LALPA in Pathien thupêkhai hi in zawm chun, malsawmna dong in ta; LALPA in Pathien thupêkhai zawm lo a, in hriet ngai lo pathien danghai be dinga a thupêkhai in pĕtsan ruok chun, ṭongsie phur in tih” (Deut 11:26-28).
Ṭongsie nekin malsawmna thlang lem seng ei tih. Chuleiin, ei ram/ hnam damna dingin Pathien hnai ei tiu a, a thupekhai zawm ei tiu. Kum za khat neka tam Kristien lo ni tah inla khom, Pathien thu zawm dân inchûk thar ei tiu. Chu chuh ei ram le ei hnam a damna dinga ei indin thar dân ding lampui Pathien thuin a mi kawkhmu chu a nih.
A ziektu: Upa Dr. Lalsiemlien Pulamte
