Pathien thil thawtheizie hmufie/hrefie/changfie theina ding chun ṭawngṭai râwn a pawimaw.
John Wesley chun, “God does nothing except in response to believing prayer”a lo ti hiel. Hi le inzawmin Bible-a (2 Lalhai 6:15-18) zawlnei Elisa le a siehlaw chanchin a’nthawk inchûk ding pawimaw tak a um. Elisa siehlaw chu zing inhma taka thoa, tuolah a hei dâk vêl chun Israelhai do dinga hung inthawk Aram sipaihaiin sakawr leh tawlailir leh khuo an lo inhuol khup a hmua, a ṭî a nih. Ṭawngṭai tlawm ringtu chun hmêlma sipai, sakawr le tawlailir hai a hmuin, ṭiin a beidawng pui pha hlak. Elisa chun, “Ṭi naw ta la. Anni tienga ṭhang nêkin eini tienga ṭhang an tam lem dai annâwm” a ta. Chuongchun, Elisa chu a ṭawngṭai a, “Lalpa, a hmu theina dingin a mit hung sukvarpêk rawh” a ta. Lalpa chun siehlaw mit chu a sukvarpêk a, a hmu thei ta a, Elisa umna vela tlânghai chu mei tawlailir le sakorin an lo sip hmur a.
Mihriem/Na hrietna chun ei hriet hlak dê ie! Sienkhawm, ei hmu fie thei tak tak nawa, mitdelna khat ei nei tlat hlak. Siehlaw ang bawka ei mithai hih sukvarpêk ngai ei nih. Pathien hratzie le thil thawtheizie hmufie tak tak ding chun ṭawngṭai rawn hi a lo pawimaw ngêi!
Elisa ṭawngṭaina dawnin, Israelhai hmelma Aram sipaihai mit Lalpa’n a sukdel pêk vawng. Hmelma thil thawtheina sukmit theina hmangruo chu ṭawngṭaina bawk a nih. Christmas nia ‘Naupa’ pêka ei um (Isai 9:6) hi chibai bûk ve theilo ding khawpa nawtbuoia umin, suol râl hrâng vêlin, hmangruo chi dang dang hmangin, a mi chîmbuoi châwk hlak. Sienkhawm, ringtu’n râl ei dona hmunah hin “Anni” tienga ṭhang nêkin ‘eini’ tienga ṭhang an tam lem dai a lo nih. Chu chu hmu fie a, hnena chang ding chun ṭawngṭai taimâk a pawimaw. Temple mâksan loa, bu ngheia ṭawngṭaia sûn-zân zawma Pathien be hlaktu Anna (Luka 2:36-38) ang bawka Christmas indik tak hmangtu ei ni seng theina dingin ṭawngṭaina râlthuom hmanga râl do dingin insiem ei tiu.
A ziektu: Pu Rohminglien Songate
