Pathien Thu Lungrilah Tu Ding
“Hi Dân Bu hi i bauin sâm zing hlak la, zieka um iengkim chu fimkhur taka a zawm theina dingin a sûn a zânin dawnkhawl hlak rawh. Chuongchun, hmuingilin hung hlawtling i tih.” (Jos 1:8)
Vietnama Kristien ṭhuoituhai inchûktirtu pakhatin hieng ang hin a tonhriet a hril a. Ka’n chûktir ding Pastorhai lai pakhat khoma Baibul an nei naw ti ka hrietsuok a. Pathien thu ka hei hril ṭan chun, anni laia pakhat chun a kut hung pharin, “Unaupa, i thu hril chu Baibula inthok am nangma awm thusuok” tiin a mi’n don a. “Hi hih Pathien Thutak a nih” ka ti le inruolin an lekhabuhai phorin ka thu hril mal tin chu an ziek thlak a. Chu taka inthok chun Baibul châng an lak khawm thei dân um sun chu hieng hin a nih ti ka hriet suok tah a. Ka ṭap nuom el a nih tiin a lungril a tawk thu a hril a.
Ka’n chûktir zom pei lai chun zawna, “Unaupa, i thu hril chu Baibula inthok am nangma awm thusuok” pângngai bok kha a hung inri nawk a. Kei chun, “Tuta ṭum chu keimaa inthok a nih” tiin ka don a. Chu phing le chun an ‘Baibul’ chu sie ṭhain an zieklo bu dang an phor a, ka thuhrilhai chu an ziek thlak mol mol nawk a.
Bu fak hun a hung tlung chun anni laia pastor ṭhuoitu pakhat chu hung ngirin, “Baibul ei hrietnahai ensinna hun ei nei ding a nih” tiin a hung puong a. Kei, Baibul sawm khat chuong neipa leh hieng ṭhuoituhai, Baibul kawpi khat khom nei lo hai Baibul hrietna ieng anga inthlau am ning a ta ti chu ka hriet nuom rûk rieu a. An hotu chun zawna hmasatak, “Obadia 2:4-ah iem a’n ziek?” tiin a hung indon a. Ka lungril chun “Obadia lekhabu Baibulah a um ti chu ka hriet a, hi lekhabu ka tiemna kha a sawt fut tah a, ka don beiseiin mi en ṭhup naw ro aw” ka tih a. Pastorhai chu an innui a, pakhat chun a kut pharin, “Obadia-ah bung khat chauh a um” tiin a hung don a.
Zawna pahnina chu “Nahum 1:7-ah Baibulin iem a mi hril a?” ti a nih. Tlar hmasa taka inṭhung pastor upa deu chun naupang ang taka thafânin, “Lalpa chu a ṭha a, buoi huna himna kul nghet a na, Ama ringzotuhai a ngaisak hlak” tiin Baibul thu chu a hung inzawt a. An ṭhuoitu chun, “I thaw ṭha ie, unaupa. I’n ṭhung thei tah” a hung tih a. Ama chun “Hril zom pei thei ka ti?” tia a hnina chu pompek a ni le inruol chun Nahum lekhabu po po chu indik thlapin a hril suok el a.
Chun, a hnung chun ringtu dang, kum tlawmte chauh Lalpa hnungzui le chun kan inhmelhriet a. Ama’n Pathien thu a’n hnikzie chu Baibula bung 78 zet a baihat tàk thua inthok chun ka hriet thei a.
Inchûk le hmalâkna ding: Vietnam-a ringtuhaiin Pathien thu an inhnik anga inhnik ve thei ding le lungrila Pathien thu tu le inphum nghet tir dinga thei tawka hma lak ṭan ding.
By: Upa Dr. Lalsiemlien Pulamte
