Lungrila Pathien Thu Vong Inchûk
“Pathien inthuok khum Lekha Thu po pohai hi felna konga inzirtirna ding dâm, inkawkna ding dâm le insiem ṭhatna ding dâmin a ṭangkai ĕm ĕm. Pathien mi taphot chun hre bel hai sien, thil ṭha tinrêng thaw thei dinga inthuom an ni theina dingin.” (2 Tim 3:16-17)
China-a pastor hrietlâr, Wang Ming-dao chu lungina inthok insuo a ni hnung chun, “Kum sawm hni liem tah khan Baibul ka kol naw a. Kum 21 le 24 inkara upa ka ni khan inah sin thaw malamin Pathien Thu ka’n chûk hlak a. Baibul châng tam tak ka baihat hlak a, lungrila ka vong, Baibul chânghai hi pakhat pakhatin an hung inlang a, an mi sukhrat hlak a nih. Hieng Pathien thuhai zâr hi ni naw sien chu kei le mi dang tam tak hnein lo um tâng kan tih”.
Chuong lai huna bok chun China sim tienga um Pastor Lamb, kum tam tak lungina intâng chun, “Baibul sikula ka um laia Baibul châng ka hriethai chu lungina kan tâng sûng hin ka hril non ka hril non hlak a, chu ni naw sien chu invet tâng ka tih” a tih.
Kohranin hnawchêpna le sukdudana hmasuon dinga ei lo insingsat theina dingin Pathien Thu hi ngun thluk taka inchûk le bi a ngai a nih. Kristienhaiin Baibul pumpui hi a tlângpuia ei hriet a ṭul a, Pathienin mihriem ta dinga a thil duong, Baibula inziek hi ei hriet thiem chun Pathien Thu lungrila vong khom a olsam bik a nih.
Baibul study ei thaw hin ieng lungril putin am ei thaw hlak a? Ṭhenkhat chun midang inchûktir sawng ding Baibulah inchûk suok an tum a. Mani mimal ta dinga Pathien ṭhatna le hmangaina inthukzie inchûk suok dingin beisei phot a ṭha ie. Efe 3:17-19-a a’n ziek, Krista hmangaina lienzie, seizie, insângzie le inthûkzie dâm hang hre phot inla, chu hrietnaa inthok chun mihai mamaw phuhrûk pek thei ei tih.
Ei thaw dân ding dang chu inngaitlawmna ṭhangin Baibul hi hang bi phot ei tiu. Baibula hin Pathienin iem a mi hril nuom ning a ta? tia inphahnuoiin hang ngaichâng hlak ei tiu. Baibul-in a thu inhriettir che chauh a tum naw a, nang kha suk danglang (transform) a tum che a nih.
Hnawchepna rambunga hai chun Baibul hi hmu ding a tlawm leiin pastorhai chun hi lekhabu hlu tak, a um sun sunhai hi thlaraua mamaw, tu hai kuoma pek bik ding am a na tiin an buoi hlak. Chuleiin, Baibul châng lungrila a vong (memorise) rawn hrat hrathai kuomah Baibul an pek hlak. Vietnama house church pakhat chun Sam 119 (chang 176 po po) indik thlapa hrilsuok theihai kuoma chauh Baibul an pek hlak a nih.
Inchûk le hmalâkna ding: Baibul châng lungrila vong hin ni khat chu ei hringnuna dingin ṭangkaina a nei ngèi ngèi hlak. Hnawchepna rama um Kristienhai ta dingin Baibul hmu ding a tam naw leiin Pathien Thu an lungrilah an vong hrat theina dingin ṭongṭai pek ei tiu.
By:- Upa Dr. Lalsiemlien Pulamte
