COVID-19 le Kristien Sakhuo Series 1
Series I : “Khawvel hriet thei dinga Covid-19 chanchin thedartu, Dr. Li Wenliang kha Kristien a ni am?”
Upa (Dr.) Lalsiemlien Pulamte
China rama Corona Virus Disease –2019, (COVID-19 tia hriet lar tah) hri a’n lêng ti khawvêl hrieta puongsuoktu, Wuhan Central Hospitala sinthaw, Dr. Li Wenliang kha Kristien a nih tiin nasa takin media-ah thedar chum chumin a um a. December 30, 2019 khan ama chun Wuhan South China Seafood Market-a um mi 7, SARS natna invoi an hospitalah siehrang (quarantined) an ni thu membar 150 umna social media pakhat-ah a thedar tah a. Ama vêkin SARS natna chie a ni hmêl naw a, coronavirus chi khat nîng a tih tiin fimkhur dingin a hrilsa bok. Vangduoi thlâk takin covid-19 natna vêk invoiin 7 February, 2020 khan a mi lo boral san tah. Ama zârin China rama covid-19 hripui inlêng chanchin chu khawvel hriet thei dingin a hung indar tah a nih.
Dr. Li a thi thu a hung indar khan, ‘A vanram inah a’n lawi tah’, ‘Lalpa kutah a chawl hadam tah’, ‘Tirko Paula angin ringum takin a mawphurna a tlâk a nih’ ti thu hai a’n dar chum chum nghâl a. Dr. Li kha Kristien ṭha tak ni dinga ringa, ama inpâkna le ama zâra Kristien sakhuoin chawisângna a chang phà hiel ringthuhai hmu ding a tam khop el. Sienkhom Li a tweets hai hei sui chun Kristien ringna (Christian faith) thu a ziekna hmu ding rêng rêng a um nawh. Chun, Wuhana kohran hrang hrang umhaiin an kohran membarhai, hi natna invoihai ṭongṭai pêk dinga ngênna an thaw angin ama kohran ding awm, chuonganga thaw an um bok nawh. Li kha Kristien a nih ti suklang hmasataktu, Christian platform pakhat chun ahnungin Li kha Kristien sakhuoa inhnikna nei ti chuaha hrilin a chanchin ziekna thupui khom “Remembrance of Brother Li’s (a faith seeker) Glorious Return to His Heavenly Home” tiin a thleng hiel tah a nih.
Testimawni ṭha nei hi ringtu le kohran hai ta dinga lawmna tling sien khom ei testimawnihai hi Pathienin ama le ama an chawimawina dingin amamaw chuong kher nawh. Pathien chu ei ṭhang lo khoma a ropui zing a, ama le ama a’n chawimawina dingin hmangruo dang a hau taluo. Mi ropui le hmingthang deu hai zâra ei Pathien hin chawimawina a chang ei ring hlak dâm hi a’n dik naw khop el.