Afghanistana ei ringtu chanpuihai ṭongṭaipui an ngai
“Beiseina chun suklawm sien la chêu, sukdudana chu sel takin tuor unla, ieng lai khomin ṭongṭai ro” (Rom 12:12)
Taliban sipaihaiin in tinah ringtu that ding an zong leiin Afghanistana Kristienhai chu tlângram tieng an tlanse a. Taliban rorêlna turu le hro hrang na a lo inṭan zing an tah.
Afghanistana kohran ṭhuoituhai chun Frontier Alliance International kuomah hieng ang hin an ripawt a:
Taliban hai chun hriet hlak Kristien list an kol a, chuonghai chu that dingin an zong zing a nih. US Embassy hlak a mumal ta si naw leiin ringtuhai ta dingin inhumhimna ding a um nawh. Ramri po po khâr a ni a, chun vuongnaa inzin suk tawp a ni bok. In sanhim dingin tlângram tieng an tlanse a. An innghat theina um sun chu a vênghim theitu Pathien chauh a nih.
Talibanhai chun in tinah lutin nuhmei le naupang an ṭhuoi hmang pei a. Nuhmei naupang kum 12 neka upa nei sungkuo hai chu an inah ‘X’ inchikna târ dingin an phût a, chuong ang nuhmei chu an ṭhuoi hmang pei. Chuong anga thaw naw sungkuo an hmu suok vai chun an sungkuoin an that nghâl pei a. Pasal nei tah nuhmei kum 25 le a chung tieng an hmu chun an pasal an that pek nghâl a, a chungah an nuom tawkin an soisak a, tisa châkna sukpuitlingna suok (sex slave) dingin an zor hlak
An pasal le an pa hai chun an nuhmei le nau nuhmei hai silai an pêk a, Taliban hai an hung pha leh anni chu an lo kap hlum amanih anni le anni an inkap hlum – anni ditthlangnain an sie pek.
A hming suklang lo Afghan kohran ṭhuoitu pakhat chun CBN News kuomah Talibanhaiin an sorkarna thar hi ngaidân le sakhuo pawl hrang hrang inleng theina ding le zà ngai thei tak ni dinga an hril hi khêl let dêr a nih tiin a hril. An thil tum chu Afghan mi-le-saa inthok Kristienhai nuoi bo a nih. Kristien ṭhenkhat chu khawtlânga khom hriet lâr an ni a, chuonghai chu Talibanhai target an ni ngêi ding a nih.
Mi phone an en pêk hlak a, Baibul apps dâm a um chun chu taka chun a phone neitu chu an that nghâl hlak a ni thuhai khom dong a nih. Phone-a Kristien thil rêng rêng um chu thil ṭi thawng um tak a tling phâk. Chun, Talibanhai hin hmun tinah enthlatu an sie bok hlak.
Open Doors USA dungzui chun Afghanistan hi khawvêla Kristienhai ta dinga a ṭitumna hmun a pahnina a nih. US sipaihaiin kum 20 sûng an umchil lai khan a sâng têla tiem Afghan mihai chun Isu Krista an zui a. Tu ruok hin chu khâ vênghimna kha a um ta nawh.
Inchûk le hmalâkna ding: Voisuna khuokhirna um lova Pathien thu ei hril thei le Isu Krista hnung ei zui thei hi nasa taka lawm ding le remchâng inchaw ding ei nih. Khawvel pumpuia Kristienhaiin Afghana ei ringtu chanpuihai an ṭongṭaipuina hi eini khom lo zawm vêng ei tiu. Chu chu an ta dinga an hratna le zâm lova Isu Krista an ṭan ngamna ding a nih.
By:- Upa Dr. Lalsiemlien Pulamte
