In Nauhai Inchûktir Ro
“Voisuna thupêk ka hrilhai cheu hi lungrilah in vong zing ding a nih. In nauhai taima takin zirtîr unla, ina in um châng amanih, lam in lawn lai amanih, in zâl le tho pha amani khomin hril zing hlak ro (Deut 6:6-7) “
Voisun hin rambung hrang hrangah nu le pa haiin nauhai Pathien Thu inchûktirna kongah khuokhirna nasa tak a um a. China rama chun naupang, i nauhai ngêi ṭhangsain, kum sawm le pariet hnuoi tieng hai, gospel inhriettir hi sorkar dân kal zawng a nih. Middle East-ah Kristien sikul a um naw top a, Kristien naupanghai chu Muslim sikulah inkailui tirin Muslim hotuhaia inthok Koran thu inchûktirna an dong hlak. Chuong chu ni sien khom chulai hmuna Kristien sungkuohai chu sakhuo zalenna hmuna um, Kristien sungkuohai nekin an sakhuo miin Lalpaah an inpumpek lema hmu a ni ve thung.
Hieng ang kohran sukrinuma umhaiin Isu Krista hnung an zui dân le Kristien nun tak tak an khal dân haia inthok inchûk ding umhai hi a hlu hle a nih.
Gerhard Hamm kha Soviet Uniona communism vâng laia ama fethlenga Pathien var suklangtu ringtu ringum pakhat a ni ve a. Ural Tlânga a pa lo hmuna chun a sei lien a. 1929-a communism hung hrat nawka khan a pa chu German thla le Kristien a ni leiin man a ni a, Siberia-ah son hmang a nih. An lo hmun khom sorkârin a lak pêk a.
A nu le a nauhai sawmhni khom chu Siberia tieng insonin an pa rawiin kum tlawmte an umhmun khat thei nawk a. Sienkhom, ni khat chu an pa chu lâkhranga umin a hnungah a umna ram hriet an ta nawh. Biek-in po po khâr a hung ni a, ‘Pathien a um nawh’ ti thuthang (atheistic propaganda) nasa taka puongdar a nih.
Gerhard chu Isu hming leiin naupangtein a pa, an nghatna, a in le a zalenna a chân a. Ni tina pumpel loa a hmasuon chu phingṭam le khawmuol dei a nih. Hienghai ringot khom hi tleirawltein Pathien le a thupêkhai a hnawl theina suonlam a tling tak zet. Sienkhom hieng anga harsatna, inzakna le sukrinumna kâra khom hin a nu chun ni tinin a nauhai leh ṭongṭaina le Baibul tiemna hun a neipui hlak a nih.
Gerhard Hamm chu kum 76 mi a ni, 1999-a a thi khan Krista ta dinga ringum tak tak nauhai a maksan a. A nauhai le an nuhmei/ pasal hai po po Kristien ringum tak tak an ni vong. A tuhai khom Lalpa ta dinga an hringnun inhlân vong an nih. Gerhard a unau sawm le pakuo hai le an nuhmei/ pasal hai le an nauhai chenin Isu hniekhnung an zui a, tam tak hai chun khawvel kil tinah Pathien rongbawlna hrang hrangah an inhmang.
Inchûk le hmalâkna ding: Voisuna sorkâra inthok khuokhirna um ṭhak loa zalenna ei nei hi ei hmang ṭangkai naw ding? Pathien thua nauhai inchûktirna, sukpuitlingna le sawizoinaah ursun takin ṭhang lâng ei tiu. Lalpa, ‘màni inhnawl’ hringnun ka khal a, mihaiin nang an hmu phà a, an zui theina dingin mi ṭhangpui rawh.
By:- Upa Dr. Lalsiemlien Pulamte
