Lalpa kuoma hla sak
“Mi’n huoltu hmêlmahai chungah, Ama chun mi chawi sang a ta, A biekbûkah lawm hla sakin, Hlànbieknahai inhlàn ka ta, LALPA inpâka hla sakin, A ta din rimawi rem ka tih.” (Sâm 27:6)
China ram Zhejiang-a um, medical daktor le Pathien thu hriltu pakhat, unaupa Zhang chun an sorkar-in a khuokhir, Three Self Patriotic Church chu a zom nuom naw leiin man a ni a, kum 18 lâi lunginah intâng tir a nih. Chu sûng chun bu ṭha pek an naw a, vuok khom a tuor ngun. Ama’n hieng ang hin testimawni a nei:
“Kum 18 sûng kha thlaraua chona nasa tak ka tuok bâkah ka beisei ngai lo malsawmna tam tak ka dongna a ni bok. Lungina thuneituhai chun êkkhur inthiel fai dingin an mi ti a. Kuta sinthaw hi ka thaw ngai naw le êkkhur inthiel fai hi intânghaiin thi rina an rin ni sien khom chier loin sin chu ka pom a. Êk khur kan thiel chângin natna hria sip êk ka pal bâkah a rimsie inhnam zing a ṭul. A rim a hei siet theizie chu ei inthiel zo hnung ni thum chen khom êk rim ei la’n nam hlak a nih. Chu lei chun vêngtuhai le ka’n tângpuihaiin mi hnai an nuom ngai nawh. Mihai mi hung hnai phâk nawnaah mani khât chauvin êk le êk rim lai umin thei tawk tawka khêkin Pathien hla sakin ka chawibiek hlak. Vênghimtu hlaka mi khap dingin an mi hung hnai nuom si nawh”.
“Chuong laia ka hla dit le sak ngun chu “Huona chun” ti hi a nih. A phuoktu’n hi hla hi Chinahai êkkhur laia sak dingin a lungril sin hmel nawh! Sienkhom, Pathienin khâng ang lawma hnuoi rinumnan a mi del lai hlimna nasa tak mi pein ama inpâkna hla sak theia ka um kha a ropui ka tih”.
Inchûk le hmalâkna ding: Voisun hin ieng anga rinum ngirhmunah um lang khom Pathien inpâknain hla sak ka tih. “Lalpa, Kristien tânghaiin khuokhir an ni lai khoma nangma inpâka hlimna pe rawh”.
By: Upa Dr. Lalsiemlien Pulamte
