Ka thla, Pathien chawibiek rawh
“Aw ka hringna, Lalpa inpak la; Ka sûnga um po po hai, a hming thienghlim chu inpak ro! Aw ka hringna, Lalpa chu inpak la, A thilthaw ṭhat po po chu theinghil naw” (Sâm 103:1-2 BFW).
Kâr khat sûng inzawm zata sin ei hang thaw zo hin chu ni khat bêk chawl hadam ei thlâkhla ve thei hle. Chu ni chu Pathienni a lo ni hlak! Ei ruol, tam tak chun hadam deuin ina le hmun hrang hranga hai hi ni hi chawlin inhawi takin hun an hmang hlak. Eini ruok chu in hrefai ding le puon sawp ding nei hnêr hnur inla khawm Pathienni inkhawma Praise & Worship ṭhuoi dingin ei inlum hai ei suoksan a ṭul hlak. A châng hin chu ei ruol, mawphurna nei ve lo, ina um ṭawk ṭawk hai dâm ei inhnar thei hle. Miha’n vawi khat khat chu Praise & Worship ṭhuoi hi mi hang sawk ve hai sien la ei ti châng khawm a tam. Chuong ang lungril ei put huna ei ngaituo dinga pawimaw chu “Pathienin ieng thaw dinga a mi siem am ka na?” ti hi a nih. Ama chawibiek dinga siem ei nih ti inhrietna hin ei ruol danghai, ei inhnar ta ngai nawh. Pathienin mihriem hi a san insângtak uma a siem ei nih. Hringna thuok a mi pek hin zawnghai ang mei meia siem ei ni nawh ti hi a sukchieng hle. Khawvel miha’n oxygen an hîp lut. Eini ruok chun Pathien thuok ei hiplut ve thung. Pathienin hratna a mi pekna san hi teh, ieng thawna ding chiea a mi pêk am ning a ta? Ama chawibiekna dinga ei hratna ei hang hmang hin thaw ding tak thaw ei nih. Thawṭannia inthawk Inrinni chen ei sinhai thaw thei dinga hratna mi petu chu ama a nih. Krista zâra iengkim thaw thei dinga mi siemtu chun Pathienniah ama ei chawibiek theina dingin hrisêlna le hratna khawm a mi pek sa vawng. Ama chawibiek dinga siem ei ni leiin ei taksain a pei naw châng khawmin, “Pathien inpâk dinga siem ka nih” tia màni le màni inhrilhriet zing ding ei nih. Aw, Worship Team, hung ro, Lalpa inpâk ei tiu!
By: Tv. Paozamuan
