Penticost Thucha
Penticost Day le inzawma ka lungrila Pathien thu hung inlang, a sei deu met khawma, hei suklang vat ka ti ie.
Mihriem hai kuoma Pathien (Triune God) a’n puong dân hin ka lungril a hluo hne hlein ka hriet a. Pathien hin a mihriem siemhai hih a lo va ngaihlu lawm lawm de, a hnawtzui ṭawk ṭawk hlak a nih ti hih ka lungrilah a thar takin a’n lang a.
Thuthlung hlui hun kha ei en chun Pathien chu a mihriem siemhai kuomah chi hrang hrangin a’n puong hlak ti ei hmu a. Kha huna an puong dân hai kha chin tawk nei a nih ti khawm ei hmu thei a. Exo 3:12 le Lev. 26:12 ei tiem chun, “In kuomah um ka ta…” ti ei hmu a. In kuomah ka um (zing) ti ni loin, in kuomah ka la um ding a nih, tiin thu a tiem a ni kha. Thil la hung tlung ding a hrilna ni lemin a’n lang.
Amiruokchuh, mihriemhai kuomah an puong nawh tina chu a ni chuong ṭhak naw a. Pathien kha nasa takin a’n puongin an lâr hlak a nih ti ei hmu thei bawk a. Hmuthei (Epiphany- physical manifestation/revelation of God) ni siin thil dang dang hmangin an lâr lem a nih. Hun/hmun ṭhenkhatah sûmpui le meiin Israel hai a ṭhuoiin an lâr a, a châng leh vantirko hmangin/ angin, Pathien bawma dâm, hmun thienghlim le tempul hai dâm hmangin a’n puong hlak ti ei hmu thei.
Khâng hun lai khan Pathien chu mî a thlangbîk le a hmangbîk tlawmte hai kuoma chau a’n lârin an puong bîk hlakin ei hmu thei bawk a. Hieng, zawlneihai le thiempuhai, lalhai le rorêltuhai, maichâm le inthawina hai dâm hmangin Pathien chu inpuongin, biek pawp amanih inpawlpui thei chau hlak a ni kha. Ama chu Israelhai tadinga venghimtu, sala an intângnaa inthawka ṭhuoisuoktu, humhimtu le thuthlung (covenant) nauhai hum ding le Isu Krista insiengna ding lampui humhim dingin nasa takin sin a thaw ti hmutheiin a um.
Thuthlung tharah ei hang lut chuh – Thuthlung hluia ei Pathien kha ‘Isu Krista mihriemah’ a hung inlang hlawl el ta a nih. A va ropui êm êm de aw! Mosie kuoma, “Nisienlakhawm, ka hmêl chu hmu thei naw ti nih, tu khawm ka hmêl hmu chu an hring ding a ni si naw a” (Exo 33:20) titu kha mihriem hai lai hung chêngin (Joh 1:14), “Thu chuh taksaa hung inchangin (Joh 1:14) “Immanuel – God with us”, “Pathien ei kuomah a um” (Mat 1:23) ei lo ti thei an ta chuh! Lalpa inpâkin um raw seh!
Isu Krista kha taksaa a chêng lai khan Ama khawm mihriem hai ang bawka umna bîk, chêngna bîk, inlangna bîk neia khawsa kha a ni a. Khuo pakhatah a um chun khuo danga khan a um naw pei tina a nih. Mihriemhai kuoma khan chêngin a khawsa ve a, Pathien a nina nasa takin a thilthaw a mihriemnaa khan hmuthei le hriettheiin a suklang a nih. Isu Krista chuh Thlarau Thienghlim hmangin Mari sûngah a hung insieng a nih ti ei hmuh (Mat 1:18, Luk 1:35). Isu Krista – Pathien ni zing sienlakhawm Thlarau Thienghlim sinthaw Amaah ngêi khawm hmu theiin a um a nih.
Thuthlung hlui huna, “In kuomah um ka ta…” tia Pathien thutiem kha Isu Krista chun a hung sukdik ta a nih. Ama chu intlanna sin thaw a, mihriemhai chu suola inthawka intlansuok ding le Pathien chun mihriemhai tuorna, harsatna (sufferings) le hlimna/ lawmna hai a hrietpui êm êm hlak a nih ti hrietthei dingin ama ngeiin a hung tuorin a hung inlang a nih. Thuthlung hlui huna a sinthaw dân le chuh a hung danglam met ni sien a hawi.
Ei fe nawk met chun, Isu Kristain van tienga a lawn hma khan a ṭhuoihruoihai kuomah, “Chun, Pa hnîng ka ta, ama chun Thlamuongtu dang pêng a ti cheu, chatuona in kuoma um dingin; chu chu Thlarau indik tak a nih; khawvêlin chu chu an nei thei nawh, ama an hmu nawh a, an hriet bawk naw leiin. Nangnîn ama chu in hriet, in kuomah a um zing lei le, nangniah a um ding leiin” (Joh 14:16-17) a ti kha ei hmuh. Hitaka Thlarau Thienghlim zet hi chuh Pathien ringtuhai tadingin a thlamuongpui um dân hih ropui tak el a nih. “Ama chuh Thlarau chênchiltu/umchiltu Thlarau Thienghlim, Isu Krista sandamna inhre chienga, changtu taphawt hai sûnga chêng zing ta ding “Indwelling of the Holy Spirit – God in us” a ni tawp el a nih. ‘I kuomah um ka ta… Pathien ei kuomah a um… Pathien einiah a um/chêng’ ti a hung ni tah. Hi hin Isu Kristain Mathai zieka a thutiem kha a hung sukdik a nih (Kol 1:27; Rom 8:9). A va ropui êm êm de aw.
Pathien, mihriem hai kuoma sawtnaw te sûnga inlâra, fea hung kan nawk hlak, Pathien Isu Krista mihriemhai kuoma chêng, hmun/hun bîk neia lo um ta kha tuzet hin chuh a ringtu taphawt hai kuoma chatuon chatuona anniah um zing dingin a hung inpuong an tah. Pathien inpâkin um raw seh.
Chênchiltu Thlarau Thienghlim sinthaw dân khawm hih a hung danglam nawk met ti hmu theiin ei Pathien thuin a mi suklang pek a. Ama ruok hi chu Kristaa hringna neihai sukthienghlim ding le, inchûktir ding dâm, sûngrila inthawka puo tieng sukdanglam, thlamuong a, sukhrat a, thlemnaa inthawka ṭhuoisuok ding dâm le thlaraua mi’n ṭhang lientir a, puitling nun mi’n pantir pei dingin nasa takin sin a thaw a nih. Chu khêla chun Pathien Thlarau Thienghlim chu khawlai hmuna khawm um, iengtik huna khawm, Ama ringtu taphawt haiin Pathien an biek pawp theina thilthawtheina a mi’n hlan a nih. Lalpa inpakin um raw seh! Hmun khat, hun khat le mihriem ṭhenkhat hai chau thlang ta loin Isu Krista’n khawvel po po a’n tlanna zârah, chu tlanna sinthaw chu ringa, pawma dittuhai po po kuomah um zing ta le la um pei ding chu a nih.
Ei Pathien thuin “Pathien Thlarau Thienghlim chu sukbeidawng naw ro, tlanna nia dinga ama ta ngêi in nizie Pathienin a’n chikna chĕu a nih (Ef 4:30) a mi ti a. Isu Krista hung nawk hmakhat/ chatuon chena Pathienin a mi’n chikna chuh Thlarau Thienghlim ngei hih a nih.
Ka unauhai, chu Thlarau Thienghlim chuh nanga khan a chêng ta am? Nanga khan sin a thaw hlak am? A thlak danglam che am? A sukhrat che am? A thlamuong che a? A ṭhuoi che am? ti le hieng ang zawna dang dang ang hi ni tina ei inbichiengna dinga pawimaw takzet a nih.
Pathien Thlarau Thienghlim hlutzie hih tuta ṭuma Penticost Sunday ei hmang hin ka lungrilah a thar êm leiin in hmawtak pumin ka hung ziek thlak deu pur pur a nih. Tiemtuhai po po Lalpa’n in rêngin malsawm cheu raw se.
A ziektu: Pi Daisy Lalneiring Infimate
