Ebenezer
Silver Jubilee Souvenir
Hmar Christian FellowshipDelhi
(1988-2013)
Ebenezer (Kum 25 chen rauh Lalpa’n a mi ṭhangpui)
EDITORIAL
Samuel chun lung a lâk a, Mizpal le Sen karah chun a phun a. ‘Hi chen hi Lalpa’n a mi ṭhangpui a nih’ tiin a hmun hmingah EBENEZER a’n bûk a(1 Samuel 7:12).
Mani theina tlawm sien khawm Lalpa Pathien zârin 4 Thlaram (September), 1988-a inthawk 4 Thlaram, 2013, kum 25 chen rauh Pathienin Israelhai a ṭhuoi angin Hmar Christian Fellowship Delhi khawm a mi lo ṭhuoi tah a. Kum 25 sung hin ei pâwl hming khawm vêl thum lai ei thleng tah. Hmun neiin biekin annawleh office dàm nei ni inla Samuel ang bawkin lung ei phun ve nuom a um a. Lungdaw/lung phun ei ti hi Pathien thu le inhme a nih. Israelhaiin Jordan an kai khan Jordan vadung lailung lai kherah inthawk lung an putsuok a. Vakamah lunghai chu an daw tah a. Chuchu hrietzingna lungdaw a nih. Ieng leia lungdaw/ lungphun hi Pathienin a phût kher am ning a ta? Lung hi thlipui, ruopui, mei le tui khawmin an suksiet thei nawh. Chuleiin, ṭhangtharhai kuomah thucha hriltu dinga Pathienin a ruot ni sien a hawi. Mipui hrietzingna (public memory) hin sâwt a dai ngai nawh. Entirna’n, Israelhaiin Tuipui Sen an kân kha sâwt nawte hnungin Pathien thilthaw an theinghil nghâl a. Bâwngte lim hmaah an bawkhup el. Pathien an theinghil nghâl tina a nih. Hmun ei nei naw leiin lungdaw chu remchangin a’n lang nawh. Chuleiin, ṭhangtharhai kuomah thucha le chanchin hril sâwngtu dingin ‘Ebenezer’ magazine buotsai a nih. Vawisûna Silver Jubilee hmangtu, nu le pahai hi kum 25 dang ei dam da’l thei. Chuleiin, ṭhangtharhai kuomah chanchin hriltu dinga hi magazine hi buotsai a nih. Nunghak, tlangval, tlanglak le nghâklakhai chu kum 25 dang an la dam thei a. Golden Jubilee khawm tlung phâk mei an tih. Annawleh, Silver Jubilee hi ei tawpna khawm a ni thei bawk. Iengkhawm ni sien hratnaw le châuhai Pathienin hi chen a mi lo ṭhuoi tah a nih. Hun neiin nuom angin lekha ziek hman inla khawm iengbar ei law naw ding a ni zing laiin hun ei nei tlawm bâkah duthusamin hmangruo (artikul) ei dit hun charin ei hmu dukdak naw a nih. Chubakah, nuom angin ei hmu sun khawm tuoi nam hman loin a ni angin ei insuo a nih. Dr. Lalsiemlien Pulamte, Chairman-in a bula inthawk a tâwp chen theitawp insuoa hma a lo lâkna zârah Ebenezer hi insuo theia um a nih. A chungah Editorial Board-in lawmthu kan hril. Hi sunga thu um po po hi editor annawleh HCFD ngaidân a ni vawng nawh a, ziektu mawphurna ni lem a tih.
“Pathien hmang thei dingin, Hmar Christian Fellowship Delhi dam sâwt raw seh”.
Download Ebenezer in PDF format
