U.P Mission Field

1. Western Uttar Pradesh Mission Field:

A’n ṭan dân:

 A hmaa ei hril lang tah, 1991 September beiruola revival tlung khan HCFD memberhai lai thlarau bohmang invawina innei tirin Shiv Viharah (New Delhi) a’n khât tawka Chanchin Ṭha hril hlak a ni a. Chu chu Jasrajpur (Mainpuri District, Uttar Pradesh) khuoa um, Hindu thiempu pakhat, Mr. Munshilal inti hin a lo ngaithlak hlauh a, ṭha tiin a tawpah baptisma a lak a. Amain a fiel angin HCFD Evangelistic Team chun September 1994 khan Jasrajpur-ah Chanchin Ṭha an va hril ṭan a, thei ang angin hril zawm pei a nih.

March 30, 1997 Shiv Vihara ringthar baptisma changhai lai ṭhang ve, Nangla Mugariah (Mainpuri District, U.P.) mihai chun an khuoah Chanchin Ṭha an hril hlak a. Chu chuh bawzui dingin kum 2000 khan Fellowship chu Nangla Mugariah a lut a. Shiv Vihara baptisma changhai laia ṭhang ve, Nangla Mugariah mi, Shiv Ram (Peter tia a hming thlak pêk) chun a ram chu iemani tawk biek-in hmun dingin a pek a. Chu taka chun 2002 khan biek-in bawl a nih. Thlarau Thienghlim sin thaw zârin kohran an pung hrat hle a. Chu le inruolin a khawsûnga dodaltu an hung suok a, chuonghai chun March 5, 2003 zânin biek-in bawl thar hlawk chu an raw a, a sûnga um ieng khawm lak dawk um hman loin a kâng fai vawng. Chu chauh chu ni loin, ringtharhai chu bawngsa fa le thil dang dangah intumin police case an siem khum a, mi iemani zâtin lock-upah khum an tuok bawk. Hi kohran tharin hieng anga harsatna an tuok chanchin lo hre phâk taphawt lungril a tawk. Pu James Lalrawngbawl Keishing le Pi Lalremsiem hai nupa lungrilah Pathienin sin thawin biek-in an lo rawna hmun ngeiah chun biek-in le quarter thar hlawk an nupa hin an mi bawl pêk a, April 9, 2005 khan chu biek-in chu Pathien kuomah inhlanna le lawmthu hrilna nei a nih. Nangla Mugariah kohran chu hung inṭhanglien peiin kum 9 lai enkawl a ni hnungah, rawngbawlna hlawk lem beisei lei le a ṭul anga ṭhangpui pei lem dingin enkawl mawphurna chu Evan. Peter Shiv Ram kutah April 10, 2009 khan inhlan a nih. Pathien zârin vawisun chen hin chu kohran chu det taka ngirin hma an sawn pei.

Rawngbawlna suklien pei:

April 10, 2009 ni la la hin hi laia rawngbawla um Evan. Pramod Kumar chu Mainpuri District thlang tieng, 40 k.m. vela hlaa um Sikhohabad-ah (Firozabad District, UP) a lut a. Mission field thar ni sien khawm Pathien zârin hun sawtnawteah ringthar inkhawm khawp an hung um nghâl a. Biek-in la um naw sien khawm Pathien remruotna zârin 2018 chen kha sawrkâr sikulah inkhawm theiin an um. Inkhawmna ding in hluo ding hmu el thei an naw bakah hi lai hmuna ei rawngbawlna hi Lalpa’n nasa taka mal a sawm a’n leiin HCFD Executive Committee remruotna chu Pathienin kohran mipuihai ṭawngṭaina le an inpekzona fe thlengin February 2021 khan biek-in hmun (60 ft x 40 ft) ding inchawk a ni tah. Biek-in bawl dingin hma lak ṭan a ni a, Pathien ṭhangpuina le kohran hai ṭhahnemngaina zâra ei bawl thei vat ei beisei a nih. Ripawt nuhnung tak dungzuiin Sikhohabad Kohranah member 214 zet an um tah.

Covid-19 hripui leiin nuom angin rawngbawl thei naw inla khawm Lalpa mi pek, ringthar 24 hai chun September 27, 2020 khan baptisma an chang. Pathien Thlarau sinthaw zawm chu hmu theiin a um a, kum 2021 khawm hripui inlêng leia nuom angin rawngbawl thei naw inla khawm ringthar mi 14 Lalpa’n a mi pekhai chu a remchang hmasa taka baptisma inchangtir dingin lungril ei siem a nih. Nuom angin ei rawngbawltuhai khawlaiah rawngbawlin suok thei naw hai sien khawm hmun hrang hranga inthawk ringnawtu lai ‘Chanchin Ṭha mi hung hril ve ro’ ti kona dawng hlak a nih. Sikhohabad-a inthawka 153 km-a hlaa um, Manjhila (Kanauj District, UP) khuo mihaiin vawi tam an mi ko hnungin June 6, 2021 khan Sikhohabad-a ringthar 6 ṭhuoiin Evan. Pramod Kumar inrawina hnuoiah Chanchin Ṭha va hril an nih.

Chanchin Ṭha hrilna hmun bîkhai:

Western UP-a Chanchin Ṭha hrilna hmun bîkhai (focus areas) chu khuo/ hmun 12 an um a, chuonghai chu Bastemai, Nagla Kila, Rukanpur, Navada, Ghadheiya, Tatarpur, Shisinghpur, Lilma, Railway Colony, Kashi Ram Colony, Badhan le Harganpur an nih. An remchâng ang angin ina le tuolpâra hai Chanchin Ṭha hril an nih. Tu chena hin baptisma chang nuom mi 14 an um a, a remchang hmasa tak hunah nei nîng a tih.

2. Eastern Uttar Pradesh Mission Field:

A’n ṭan dân:

Eastern Uttar Pradesh Ajamgarh District-a um Surahan Kothi khuoa rawngbawlna hi Pathien remruot leu leu, mak taka inṭan a nih. Shiv Vihar (Delhi) Kohran member, unaunu Mrs. Gangga chun a nu, thi hmun suola damnaw, a thi hma ngêia hmu tumin kum 2016 December thla tawp tieng khan Surahan Kothi chu a pan a. Khuo a hàng tlung chun a nu chu biek thei an ta naw a. Chuphing leh Pathien kuomah, “Lalpa, ka nu hi ka la’n biekpui nuom a ni, la suk dam rawh” tiin a ṭawngṭai a. Mak takin a nu chu inbiekpui nawk theiin a hung um a. Gangga ṭawngṭaina leia a nu hung dam suok nawk thu chun an kawl le kieng a dêng tlawk a. Gangga ṭawngṭaipek beiseiin mipui an hung khawm a. Chuonghai chu lo ṭawngṭai pêkin an kuomah Pathien thu a hril ṭan a, mi tam takin taksa damna an chang bâkah Isu Krista chu an Lal le Sandamtua pawm an hung um ta pei a. Evan. Vanlaltlan Amaw le Evan. Pramod Kumar hai chun Gangga ṭawngṭai rawngbawlna chu enfel dingin February 3, 2017 khan Surahan Kothi an pan a. A tîr chun Chanchin Ṭha ngaithla ding le ṭawngṭaina beiseia hung pan hai an tam thei hlak leiin insûnga inkeng lo rakin tuolah hun an hmang el hlak. Chuonga thaw zing chu a remchâng naw ding leiin unaunu Gangga bawk chun a ram chu inkhawmna ding biek-in bawlna dingin a pêk a. Pathien remruot peiin mi ṭhahnemngai Pu John Ruolngul hai sungkuo le HCFD member ṭhenkhat hai hmangin mi 100 vêl inkhawm theina in bawl a nih. Chu taka chun vawisun chen hin inkhawm a la ni a, Chanchin Ṭha hril rawngbawlna chu fe peiin chu lai hmuna ringthar hmasa tak mi 4 hai chun November 19, 2017 khan baptisma an chang. Baptisma prokram nei nuhnung tak, September 29, 2019 khan mi 17 baptis an ni bawk. Ripawt nuhnung tak dungzuiin tuhin member 38 an ni tah.

Tuta a ngirhmun:

Hi lai hmuna um ding rawngbawltu ei tir el thei naw lai a ram mi, ringthar, Mr. Subash chu hung inpein a thei ang anga hmang a nih. Ama hin ringtharhai chu inkhawmpuiin kum 2020 covid-19 hripui leia kharkhip hma chen khan a hun nei remchâng ang angin ringtharhai kanin an inahai a va ṭawngṭai pek hlak. A remchâng ang peiin Delhia inthawk rawngbawltu haiin hang kan hlak an nih. Sienkhawm, hripui leiin nuom angin a hmuna fein Chanchin Ṭha ei hril zawm thei naw hri phawt a nih. 2021 June thla khan unaunu Gangga-in a hang kan a, Pathien zârin ringtuhai an dam chau ni loin hripui kâra khawm biek-ina ṭawngṭai ding an um zing thu a hung hawn. Hi lai hmun umchil thei ding rawngbawltu ṭha Pathienin a mi pêk vat ei beiseiin ei ṭawngṭai zing a nih.

2020 Hripui leia Lockdown hma chena rawngbawlna hmun phâk chinhai (area covered):

  • (i) Surahan Kothi (Biekin delna khuo),
  • (ii) Bhar Gaon,
  • (iii) Goviram,
  • (iv) Nikashipur,
  • (v) Phatoria Gaon (Jaunpur District),
  • (vi) Pooleh Gaon,
  • (vii) Mahorola Gaon,
  • (viii) Phushnagar,
  • (ix) Teipur Goan,
  • (x) Kharieu Gaon,
  • (xi) Shaganj,
  • (xii) Shitara,
  • (xiii) Shidhan Goan,
  • (xiv) Bharona.

Loading