Mission Fields

Ram Thima Rawngbawl dinga Pathienin kawt a hawng dân:

Hmar Christian Fellowship Delhi-in 1991 September thla beiruol a huoihawt chu Pathienin thlarau malsawmna vurin ‘revival’ danglam tak a’n tlung tir a. Chuongchun, Chanchin Ṭha la hre lohai invawina (burden) nasatak piengin personal counseling le Bible tract sem rawngbawlna ṭan a lo nih.

Ni khat chu Vikaspuria pân dukân (kuva dawr) nghaktu pakhat kuomah Bible tract pek a ni a. Bible tract-a Pathien thu chu a tiem zo chun ṭha a ti hle ning a tih, “Kan colony, Shiv Vihara khawm hi Bible tract hi hung sem ro” tiin a hril a. Chu chu Pathien konaah ngaiin, 1992 October thlaa (a tarik hi inchik a lo ni ta naw a) chun (L) Pu Suothang, (L) Pu Lalringai Khawbung le Lalsiesang Zote (tuta Shiv Vihar kohrana pastor sin thawlai zing) hai chu Bible tract sem ding le Pathien thu hril dingin Shiv Viharah an fe ṭan tah a. Pathien remruot ruotin hi ni tak hi an khawsûnga Pradhan (khaw lal) a nau piengchampha an lo lawm a. Pradhan inah lutin Bible tract chu sem ṭan a ni a, ama khawm chun lawm takin a lak a. Pu Suothang chu a lawm êm leiin Pradhan a nau piengchampha lawmpuinain pawisa Cheng 101 a pek nghe nghe a.

HCFD Executive Committee thurêl angin Krismas lawm chu Shiv Viharah December 27, 1992 khan sunzawm a nih. Hi ni hin member ṭhahnem tawk tak le Medical team an ṭhang a, Pathien thu hriltu dinga ruoi (L) Rev. P.K. Robert, ECI kohrana mi chun Pathien thu a hril a. Chu nia inthawk chun Shiv Vihar colony-ah rawngbawlna nei zing zing hlak an tah. Fellowship memberhai laia Hindi ṭawng thiemhai chu ṭawng inlettuah hmangin personal counseling le Bible tract semin rawngbawlna hi sunzawm pei a nih. Hi rawngbawlna ra chu Chanchin Ṭha ei hrilhai, mi pahniin February 14, 1993-a ECI biekinah (Janakpuri) baptisma an changah khan hmu theiin a um.

Shiv Vihar hmun ruoka chun puon in (tent house) keiin naupanghai Sunday School neipui hlak a ni bawk a. Chu chu hung inṭhang lien peiin, sikul puitling (day school), ‘Bethany Convent School’ tia ko chu February 7,1994 khan Pu L.F. Tusing, khânglaia Chairman, HCFD chun a hawng. Hi sikula lo inchûk tah, naupang iemani tawk chu tu hin graduate an lo um ve tah.

A tîr chun Pathiennia inkhawmna ding le naupang lekha inchûktirna dingin mi in hluo a nih. Hmasawnna dinga naupang inchûktirna le Chanchin Ṭha hril chu Pathienin mal mi sawm peiin ei ṭhanghmun khawm a mi lo rem det pek pei a. Chuongchun Pathien remruotin Rev. Koh Haesung hmangin biekin le school-a hmang ding Shiv Viharah hmun inchawk a nih. Chu hmuna chun building bawlin May 7, 1994 khan Rev. Lemnghakin Pathien kuomah inhlanin lawmthu a hril.

Ram thima rawngbawlna hung inṭhanglien peiin hmun/khuo hrang hrangah kohran a hung ngirsuok pei a. Pathien rawn hnungah Bible-a tirkohai thaw dân kha zuiin kohran hung ngirsuokhai chu an khuo/vêng hming pei, entirna dingin Shiv Vihar Kohran, Kakrola Mor Kohran, etc. inputtir an nih. Thlarau le taksaa an inṭhanglienna dinga chun a thei ang angin Hmar Christian Fellowship Delhi chun nu-le-pa chan a la chang zing a nih.

Thlîrthuoka HCFD Mission Fields an lang dân:

i) Delhi Mission Field: visit page

  • Delhi mission field-a biekin nei zât: 2 (Shiv Vihar le Kakrola Mor)
  • Week daya cottage meeting: 2 (Maya Garden le Chanchal Park)
  • Chanchin Ṭha hrilna bîk hmun (Mission focus areas): 12
  • School nei zât: 1 (Bethany Convent School)

ii) U.P. Mission Field: visit page

  • Mission Field Division: 2 (Eastern U.P. le Western U.P.)
  • Inkhawmna hmun nei zât: 2 (Sikhohabad le Surahan Kothi)
  • Week daya cottage meeting:1 (Manshana, Mainpuri)
  • Chanchin Ṭha hrilna bîk hmun (Mission focus areas): 15

HCFD-in missionah a luta inthawka Silver Jubilee (1992-2017) hmang chena khan ringthar mi 1150 vêl baptisma pêk an lo ni tah. Lalpa’n ropuina le chawimawina chang raw se.