CONSTITUTION

2.1 HCFD Thuring, Danpui le Inṭhuoidan hai pawma, hi Fellowship hung zawmtuhai chu Fellowship membar nithei an tih.

2.2 Fellowship membarhai chu ahnuoia ang hin chi hni um a tih:

(a) Fellowship membar, Delhi-ah sinthawna det/umhmun nghet nei le an sungkuo hai chuh Permanent Membar an nih;

(b) Fellowship membar, Delhi-a kumkhat umtlinglo ding amanih umnghet ding nilo hai chu Temporary Membar an nih.

2.3 Fellowship membar ni nuomtuhai chun ziek ngeiin hnina siem an tih.

2.4 Member nina inban nuomhai chun ziek ngeia inbanna lekha pêng an tih.

3.1 Fellowship enkawla, rêl ṭulhai rêl dingin Executive Committee um a tih.

3.2 Executive Committee mawphurna le sin thaw ding bîk hai chu ahnuoia hai hi an nih:
(a) Fellowship sunga le Department hrang hrang haia buoina umhai relfeltu le thuneina tawp neitu a nih.
(b) Fellowship le a Department-haia sum hnâr siem belsa, sukdanglam le sukbo thuah thuneina nei a tih.
(c) Department thar siem, a umsa sukdanglam, Department sin siem danglam le sukbo thuah thuneina nei a tih.
(d) Fellowship inthlangpui buotsai le vawng dingin Election Presiding Officer, Election Secretary le ṭhangpuitu dang ruot a tih.
(e) Fellowship sûngah inṭhuoidân (rules) a ṭûl dân enin siem a tih.
(f) Fellowship-in a mamaw dân en peiin a ṭûl hunah ordained Upa amanih Pastor amanih thawktu dang nei dân ding relin la thei a tih.
(g) Fellowship le Department tina sum hai kumtawpa enfel dingin Auditors ruot a tih.
(h) Ṭûlna a um chun evangelical kohran hai leh inhrietpui-tuona (recognition)siem a tih. Evangelical kohran pâwl le kohran pâwl bik umlova Kristien rawngbawltu (non-denominational Christian missions) leh a ṭûl dân enin inzawmna (affiliation, co-operation, collaboration) nei thei bawk a tih.
(i) Executive Committee inṭhungnaah membar popo zâtve nêka tam an umnaw chun thutlûkna siem thei naw nih.

3.3 Executive Committee membar:
(a) Executive Committee membar dingin Fellowship permanent membar nilai, mi pasari nêka tlawmlo, mipuiin thlang an tih.
(b) HCFD kohran upa le pastor hai chu Executive Committee-ah membar ni nghâl an tih.
(c) Thalai Pâwla (Deptt. of Music & Youth Affairs) Chairman, Nuhmei Pâwla Chairperson le Naupang Department Superintendent hai chu Executive Committeeah Ex-Officio membar nîng an tih.

3.4 (a) Executive Committee sûnga sin/mawphur-nahai chu ahnuoia ang hin ning a tih:
      (i) Chairman
      (ii) Vice-Chairman
      (iii) Secretary
      (iv) Assistant Secretary
      (v) Finance Secretary (Mission Fund)
      (vi) Finance Secretary (General Fund)
      (vii) Evangelism Secretary
(b) Executive Committee Chairman ding chu HCFD Kohran Upahai laia pakhat Executive Committee-in ruot/thlang a tih. HCFD Chairman ding Upa an lo umnaw ani chun, Executive Committee laia mi, Executive Committee in Chairman dingin thlang/ruot thei a tih.
(c) Executive Committee inthlang zovin Election Presiding Officer-in membar thlang tharhai chu kokhawmin, sin hrang hranga mawphurtu dinghai consensus annawleh secret ballot-in inthlang an tih. Candidate siem ni naw nih. Vote inzât a um chun, a vote inang po candidate-a hmanga siem rem ning a tih. Chu hnunga vote inzât a um nâwk chun Presiding Officer-in thutlûkna siem a tih. Election Presiding Officer-in hma a lâk theinaw ding ani chun thlangtling laia mi ni lo, ama aiaw ding Convenor ruot a tih.
(d) Lo theilo thil ani ngawt naw chun HCFD Executive Committee sûnga chanvo/mawphurna hai hi a thei chenah, term hni bâk chelzawm thei ni naw nih.
(e) Mawphurna/sin siem belsa a ṭûl chun Executive Committee-in siem belsa thei a tih.

3.5 Executive Committee hlui le thar charge inhlan dingin Chairman tharin joint meeting ko a tih.

3.6 Executive Committee term (office chel hun sûng) chu kum hnih ning a ta, January-a inthawk inthlangpui nâwk January chen ning a tih.
– Ṭulbîkna a um chun Executive Committee chun term fe lai chu thla thum (3 months) nêka sâwt lovin suksei thei a tih.

3.7 Executive Committee membar dinga thlang nilo, rawngbawlna le inṭhuoina sina mi ditum bîk an um chun, Executive Committee-in membar ni dingin ruot a ta, aṭûl angin mawphurna sin le chanvo pêk thei ning a tih. Chun ruot membar chu thlang membar hai leh nina thuhmun nei an tih. Ruot membar chu pathum nêkin an tam ding an nawh.

3.8 Inthlangpui kâr lakah Executive Committee membar amanih mawphurna cheltu tukhawm ienglei khawma a nina le sin a sunzawm thei naw chun Executive Committee chun a aiawtu ruot a tih. Committee membar nilai, ruot el remchâng an um naw chun Committee membar ding, dân angin ruot hmasain a sin ding chu pêng an tih.

A. EXECUTIVE COMMITTEE

4.1 Election Presiding Officer-in Inthlangna chu vawng a ta, Election Secretary chun ziek le inchik ṭûlhai chu ziekin ṭhangpui a tih.

4.2 Election Presiding Officer sinhai:-
      (a) Inthlang hun sung popo vawngin ṭhuoi a tih.
      (b) Inthlang zo charin result puong nghâl a tih.
      (c) Vote nei naw ni a, vote inzât a um chun pakhat lem lem vote pein thutlûkna siem a tih.
      (d) Election Presiding Officer thutlûkna chu thutâwp nîng a tih.

4.3 Election Secretary sinhai:
      (a) Election Presiding Officer ṭhangpuitu le ziektu a nih.
      (b) Membar thlangtharhai list ziek suokin Convenor annawleh thlangtlinga um Chairman kuomah pesuok a tih.

4.4 Executive Committee inthlangna chu secret ballot-a thlang nîng a tih.

4.5 Executive Committee membar thlangna ah candidate siem ni naw nih.

4.6 Executive Committee membar ni dinga thlang theihai chu permanent membar, kum 25 nêka upa, kohran dân sûnga um, HCFD-ah regular taka sawm-apakhat pe, HCFD Thuring chel mi a ni ngei ding a nih. Kohran/Missiona full time thawktu chu Executive Committee membar dingin thlang thei ni naw nih.

4.7 Executive Committee membar-a thlang remchânglo mi an lo um chun, inthlang hma-a mipui laia puong hman dingin Secretary-in Election Presiding Officer ân hriettir ding a nih. Election Presiding Officer chun inthlanglai, vote pêk hmain mipui inhriettir a tih.

4.8 Executive Committee membar thlangna-a vote neithei hai chu Fellowship membar, kum 18 nêka upa, puitlinga inkhawm/sawnlut tahaiin vote nei thei an tih.

B. KOHRAN UPA

4.9 Executive Committee in Kohran Upa inthlang huoihawttu ding Pastor ruot a tih.

4.10 Ruota um pastor chun ama ṭhangpuitu ding ruot ve thung a tih.

4.11 Kohran Upa ding chun kohran mipui pung khawm vote hmun thuma ṭhea hmun hni bêk a hmu ngei ding a nih.

4.12 Kohran Upa inthlang chu secret ballot a thlang ning a tih.

4.13 Vote tiemzo charin result puong nghâl nîng a tih.

4.14 Candidate siem ninaw niha.

4.15 Kohran Upa dinga thlang thei hai chu: HCFD Permanent membar, kum 25 nêka upa, kohran dân sûnga um, HCFD-ah regular taka sawm-a-pakhat pe, Executive Committee a term hnî bêk ṭhang tah, HCFD Thuring chel mi ani ngei ding a nih. Kohran/Mission a fulltime thawktu chu kohran upa dinga thlang thei ni naw nih. A thei chinah, Bible a upa mizie ding a hrilang(1Timothe 3:1-7) nei mi ani ding a nih.

4.16 Kohran Upa inthlanga vote nei thei hai: Fellowship membar kum 18 neka upa, puitlinga inkhawm/sawnlut ta hai, kohran dân sûnga um an ni ding a nih.

5.1 Fellowship sum hnâr hai chu a hnuoia hai hi an nih:
      (a) Sawm-a-pakhat.
      (b) Pathienni inkhawm thawlâwm.
      (c) Ringna thutiem.
      (d) Ramthim bâwm
      (e) Mimal thilpêk/pâwl thilpêk
      (f) Executive Committee remtina-a hmuna danghai

5.2 Fellowship chun ahnuoia tarlang haia hin sum hmang a tih:
      (a) Fellowship inrêlbawlna-a sengso.
      (b) Fellowship mamaw thil (assets) inchâwkna.
      (c) Rawngbawla fesuokna thil.
      (d) Department bîk mamaw thil inchâwkna.
      (e) Executive Committee remtina-a hmangna danghai.

5.3 HCFD sum enkawl le vawngtu dingin Finance Secretary (Mission Fund) le Finance Secretary (General Fund) um an tih. Anni hin anni puola sum lûtna le hmangna popo endik thei dingin inchikna siem an tih.

6.1 Lalpa Zânbû le Baptisma service hai hi ordained pastor ṭhuoina hnuoia nei hlak nîng a tih.

6.2 Fellowship Upa le Pastor ordination thuah Executive Committee-in lampui buotsai a tih.

6.3 HCFD in a i thlang ni lo, Ordain tah Pastor/Upa Fellowship a hung lûthai rawngbalwna thuah, Executive Committee in ṭûl ati chun ngaituong atih. An ordination pawm pêk ding (HCFD chanpuola lâklût) thu a ruok chu Mipui inkhawm naah membar inkhawm popo zâtve nêka tamin an remtina lâng atih.

6.4 (a) HCFD membar, Kohran dâna innei ding hai chu HCFD in inneina/inthlâna programme siempek a tih. Kohran dâna innei ding hai chu ringtu ve ve an ni ding a nih.
(b) HCFD membarin pindan annawleh dân chanve hmanga innei a lo nuom chun pi-pu dânin man-le-muol rêl fel phawt an ta, chu hnungah Pastor/Upa/Executive Committee member inah, a remchâng ang hmangin ser le sâng Executive Committee-in buotsai pek a tih. Innei ṭha dinghai hi kohran sûngah lâklût phawt ni bawk an tih.
(c) Kohran dân ang loa nuhmei/pasal nei thuah Executive Committee inhriettir a ni ngawt naw chun Executive Committee inrawl naw nih. Pastor/ Chairman/ Secretary inhriettir a ni ruok chun kohran inrawlin Pastor/Upa kut hmang thei a nih. Chuong ang bawkin, lâklûtna thuah lâklût an nuomzie lekha hung pêng an ta, counselling thawpui an ni hnungah lâklût nîng an tih.
(d) Kohran dang hai thilthaw, hieng kohran dâna innei, dân puo tienga sie, dân sunga lâklût HCFD-in a pawm.

6.5 Inneina, baptisma amanih nau inhlânna certificate pêk thuah HCFD remchâng angin ngaituopek nîng a tih.

6.6 Ram thimah rawngbawltu haiin ser-le-sâng thuah a ṭûl anga kut an thlâk theina dingin Executive Committee-in thuneina (authorization) pe thei an tih.

7.1 Fellowship sûnga Department hrang hrang hai inṭhuoidân ding Dân hai a ṭûlna en peiin Executive Committee-in siem a tih.

7.2 Department Inṭhuoi Dânhai chu aṭûl angin hi Dânpui siemṭhat dân dungzuia siemṭhat thei a nih.

7.3 (1) ṬHALAI PAWL (Department of Youth Affairs & Music):
      (a) Inthlang Dân – HCFD Executive Committee inthlang ruolin Ṭhalai Pâwl committee hi kum hni sûnga ding, thlang hlak nîng a tih (post dungzuia inthlang or Committee membar dinghai thlang chu zoa sin insiem rem);
      (b) Mawphurna sinhai – Chairman, Vice-Chairman, Secretary, Assistant Secretary, Finance Secretary – Mission & General, Music Secretary, Assistant Music Secretary;
      (c) Area Co-ordinator: Vêngbuk tinah Ṭhalai Pâwl kut le ke dingin Area Co-ordinator nei thei an tih.
      (d) Ṭhalai Pâwl Chairman hi HCFD Executive Committee membar ni nghâl ata, Executive Committee rorêlna hai ah ṭhang hlak a tih. (2) NUHMEI PÂWL:
      (a) Inthlang Dân – HCFD Executive Committee inthlang ruolin Nuhmei Pâwl committee hi kum hni sûnga ding, thlang hlak nîng a tih (post dungzuia inthlang or Committee membar dinghai thlang chu zoa sin insiem rem);
      (b) Mawphurna sinhai – Chairperson, Vice-Chairperson, Secretary, Assistant Secretary, Finance Secretary-Mission & General;
      (c) Thlang laia mi ni lo, Nuhmei Pâwl rawngbawlna a mi ṭangkai le ṭhahnemngai mi, pathum chen membar dingin co-op in la lût thei an tih.
       (d) Nuhmei Pâwl Chairperson hi HCFD Executive Committee membar ni nghâl ata, executive rorêlna hai ah ṭhang hlak a tih. (3) NSS:
      (a) Superintendent, Assistant Superintendent le Hotu thlang/Ruot dân: Mipui thlang ni loin, HCFD Executive Committee in hi rawngbawlna a ṭha le awma mi a hriet hai fielin ruot thei a tih. A ṭûl chun châwibiek inkhawm naah mipui lai fielna siem hlak a tih.
      (b) NSS Department a Superintendent, Asst. Superintendent le hotu hai term hi fixed ni naw niha, sienkhawm kum laklaw a tawpsan el ding mi an ninaw ngei ding a nih.

8.1 HCFD Executive committee in kumkhatah vawikhat General Body Meeting (GBM) ko thei a tih.

8.2 Executive Committee in kumkhat sûnga dingin Moderator ruot a tih.

8.3 Moderator dingin HCFD Pastor/Upa/Executive membar laia mi ruot hlak nîng a tih.

8.4 GBM huna hin HCFD Executive committee hmalâkna hai mipui hriet dinga târlang (report) hlak nîng a tih. Rawngbawlna sukhmasâwnna ding lampui hai hril tlângin spiritual fellowship nei hlak ning a tih.

8.5 Membar tu el khawmin GBM a agenda ding pêklût anuom chun, Executive Committee in aruot dân angin pelût thei atih.

8.6 GBM-ah HCFD membar hai chau ṭhang/palaia intir thei a nih. Palaia ṭhang dinghai:-
      (i) Executive Committee membar po.
      (ii) Nuhmei Pâwla Chairperson le Secretary or anni aiaw.
      (iii) Thalai Pâwla Chairman le Secretary or anni aiaw.
      (iv) Naupang Department-a Superintendent le Asstt. Superintendent or anni aiaw.
      (v) HCFD-in a hrietpui Vêngbuk Inkhawma inthawk palai Executive Committee-in a bituk po/zât.
      (vi) HCFD rawngbawltu (workers) HCFD pay roll-a umhai.
       (vii) In khata pa/nu (Head of Family).

9.1 Hi Dânpui sûnga thuhai hi belsa, sukbo, sukdanglam, thlâkthleng le siemṭhat hrim hrim ṭûlna a um chun Executive Committee in ngaituoin Mipui inkhawm popo zâtve nêka tam remtinain siem ṭha thei a tih.

9.2 Fellowship hming thlâk, sukdanglam, etc. rawtna/ṭûlna a um chun Executive Committee-in ngaituo phawt a ta, Committee membar popo zâtve nêka tamin rawtna an pawmnaw/remtinaw chun ngaituo zawm ṭullo nîng a tih. Membar popo zâtve nêka tamin an remti chun rawtna chu mipui inhriettir a tih. Mipui inkhawm po lai vote lain a um po zâtve nêka tam remtinain rawtna chu thutlûknaah ngaiin sukpuitling thei a tih.

10.1 Hi Dânpui sûnga thuhai hrietthiemlo, hrietdân inanglo a um chun Executive Committee-in a umzie hrilfie thei a tih. 10.2 Hi Dânpui umhma-in Executive Committee chun iengpo lo rêlin thu lo sukthlu tah sienkhawm hi Dânpui-a thuhai le inkal a um chun, chu thurêl chu ṭhieka ngai nîng a tih.