COVID-19 le Kristien Sakhuo Series 2

Series II : “Covid-19 hri inlêng huna ringtuhaiin ei ṭongṭai pêk dinghai”

－Upa (Dr.) Lalsiemlien Pulamte

World Health Organization chun COVID-19 chu khawvêl huopa hripui inlêngin (global pandemic) a lo puong dêr tah a. India ṭhangsain khawvela rambung tam tak chun an ram sûng sengah hi hripui hi an dar zuol nawna dingin nasa takin ṭhang an lâk seng bok a. Damdawi thiemna insâng hle tah sien la khom hi hri invênghimna (vaccine) an la hmu suok naw bâkah hri hi inkâi sawng a ol êm êm thuhai hin mihriem hi Pathien hmaah ei tlawm rong rong el a nih. Sienkhom, eini ringtuhai, iengkim thawthei Pathien hring neituhaiin ei Pa kuomah ei mawmawhai chu ei hni thei. Ṭongṭaina hi ringtuhaiin ei thaw thei nuhnung tak a nilai zingin ei thaw hmasa tak ding a ni vè thung. Ahnuoia hai hi a tlângpuia ei ṭongṭai pêk dinghai an nih:

  1. Damnawhai ta dingin. Sukdamna an chang a, thlarau le taksaa an hrat nawk theina dingin. Annia inthoka hri a’n kai sawng nawna dingin.
  2. Hriin a kai olsam, hieng upa tienghai le natna hrang hrang invoi kop leia mi borsawmhai ta dingin. Mi rethei le damdawia inenkol harsa tihai ta dingin.
  3. A dam le hriin a la kai nawhai ta dingin. Fimkhur taka an khawsak le thu an awi theina dingin.
  4. State le Central sorkarhai ta dingin. Vàr le thiem taka hmalak dân ding an hriet theina dingin. Damnawhai mawmaw tawk medical facilities an riruong theina dingin. Mipuiin fâk le dawn ei tlâksam nawna dingin.
  5. In-le-lo neilo, mi rethei tak tak le sluma chênghai, an chanin a zir hlol naw leia social distancing thurawn khom zui thei lohaiin hri an kài nawna dingin.
  6. Kristien misawnarihai le pastorhai, abîk takin, hripui a zuolna bìk hmuna umhai -mihai kuomah thlamuongna thu an hril a, hmangaina leh a mamawhai laia rongbawlna an nei theina dinga Pathien inthuomna.
  7. Pastor le kohran ṭhuoituhai ta dingin -corporate worship a thei naw lai khoma an beramhai Pathien thu le hlaah an chawm zom pei theina dingin.
  8. Natna danga damnaw, routine checkup le therapy ngai zinghai an natna a zuol nawna ding, an tuorsela a ṭha tieng ngota thil an ngaituo (positive attitude) theina dingin.
  9. Hi hripui le lockdown hin negative economic impact nasa tak a nei ngèi ding a nih a. Industries hrang hrang le sinthawtu haiin harsatna an hmasuon mêka hin an tlâksietnaa inthok suokdokna lampui le remchang dang (opportunities) an hmu theina dingin.
  10. School, college le university inchûklaihaiin a hun taka an inchûkna an zo theina ding, an sin hmu ding a’n hnûk nawna dingin.
  11. Sungkuo tinin an inlaichinna an siem ṭhat phà theina dingin. Pathien um an hrietsuok phà theina ding le Pathien an intuokpuia an hriet nawk zuol theina dingin.
  12. Frontline health workers -doctors, nurses le medical staff danghai ta dingin:-
  • Anni le an sungkuo hai an hrisêl, an himna dingin.
  • Damnaw enkol dân an thiem theina dingin.
  • Lungril phawklêk lo le hadam taka an um theina dingin.
  • An damnaw enkolhai chungah hmangaina le ngilneina an suklang theina dingin.
  • Kristien staff haiin an nungchang le sin an thawdâna inthoka midangin Chanchin Ṭha an hriet phà theina dingin.