Retheihai Chunga Kohran Mawphurna – Tiktlai Taka Somdawlna Rongbawl
“Tuin amanih khawvel hausakna neiin a unau tlasam hmu sien, ama chu lainat si naw sien, Pathien hmangaina chu ieng tin am amaah um thei a ta? Nau dittakhai, ṭongbau le thu chaua inhmangai loin, thilthaw le a takin ni lem raw se (1 Joh 3:17-18)”
23 January 2022 khan HCFD inkhawmnaah khi a chunga thupui hmangin sermon ka lo pek tah a. Ei lungrilah ngaituo non inla ka nuom leiin a thu tlângpuihai hieng ang hin ka hung lak tawi a.
Baibul mi’n chûktir dân iem a na? Thuthlung Hluia chun kum thum a’n voi zâtin chu kuma an tharsuok po poa sawma pakhat la khawm dingin Israel mihai thupek an nih. Chuong chun an khuoa um Levi-hai, ram dang mihai, pa nei lohai le hmeithaihai chun khop takin an fak thei ding a nih. Hi thilpek hi ‘thilpek thienghlim’ tia hriet a ni bok. Chuong anga an thaw chun Pathienin an ram hluo mal a sawm ding thu khom hmu a nih. Chun, busik huna khom hnawm sir rawta mi chen chen sik lo ding le grep huonah grep ṭo le a ra ṭil khom rut lo dingin a tih. Chuong hai chu mi retheihai le ram dang mihai ta dingin hla lem ro a tih. Chun, Sabath kum le Jubili kuma khom leibat ngaidama rethei leia in le lo an lo chânhai khom an chang kîr nawk vong ding thu khom ei hmuh.
Thuthlung Tharah ieng tin am ei hmu a? Isu Krista’n Laltak chanchin a hrilnaa chun ‘Ka Pa vochuomhai, hung unla, khawvel siem tîra inthoka in ta dinga ram buotsai chu chang ro. Ka phing a ṭâmin nangnin fak ding in mi pĕk a; ka dang a chârin dawn ding in mi pĕk a; ……..’ la ti’ng a tih. . . . . Laltak chun, ‘Thu dik ka hril chêu hi, hieng ka unauhai laia chîn tak pakhat chunga in thaw chu ka chunga in thaw a nih’ tiin la don a tih. Rethei ei ṭhangpuihai hi Isu Krista’n ama ei ṭhangpui ang charah a lo ngai ve a nih.
Tirko Paula khomin Korinth kohran hai kha tiktlai ding le mi somdawl dingin a’n fui a – somdawlna thilpêka khom hin mi khûm ngei dingin ṭhahnem ngai ro; hieng hi thupêk anga ka hung hril an nawh, in hmangaina chu a tak ngèi a nizie fiena dinga thilpêk tienga mi danghai ṭhahnemngaizie thu ka hung hril a nih; chuongchun in insawk tuo ding annawm; in somdawlna thilpêk hin mi thienglimhai mamaw a phuhrûkpêk chauh ni loin, Pathien kuoma lawmthu hrilna khom nasa takin sukpung bok a tih; an ta ding le mi dang po po ta dinga in tiktlaiziehai a suklang a, chu chun Pathien inchawimawitir ngêi a tih tiin.
Makedonia rama kohranhai enton dingin Tirko Paula’n a mi’n fui. Rinumna nasa taka fie an ni zing pum khomin an lawmna a luong liem a, rethei mong tol ni siin an tik a tlâi êm êm a. Anni lungril puok suok ngatin, nei thinglung khawngin an pêk a, an tlin baka tam daih an pĕk ti ka hrietpui. Mi thienghlimhai somdawlna ding rongbawlnaa hin ṭhang ve an hni rak a ……..anni ngei chu Lalpa kuomah an inhlan phot a. Anni hin an tlin angin an pêk (proportionate) a, chu bâk chu màni inpêkzo dàn angin (sacrificial) le lungrila puok suok angin (voluntary/ freewill) an pek a nih.
Haiti ram hi an hnufuol êm êm a, kum 2020 khan GDP per capita US$ 2925 a nei phâk chauh a, LAC bielah a pasie tak a nih. Kha kum bok khan UN Human Development Index inkhinaa rambung 189 laiah 170-na a ni phak chauh a nih. Hi rama kohran hai chu hieng anga pasie hle ni hai sien khom Pathienni tûk inkhawm zâtin ‘rethei zuol ta dinga thawlawm’ an dawl hlak chuh!
Kohran hai hi Kristaa pumkhat ei nih. I Kor bung 12 sûnga hin taksa hi pumkhat ni sien khom bung tum tuma inthoka siem a na; bung hrang hrang inpengtuoin taksa pumkhat a siem ang hin Kristaa chun pumkhat ei nih tiin a mi hril pek a. Chuleiin, mit hin kut kuomah, “Ka mamaw naw che” a ti thei nawh; lu khomin ke kuomah “Ka mamaw naw che” a ti thei bok nawh. … chuongchun, taksaa hin inlâk hranna um loa bung tum tumhai hi lungruol taka an inngaisak tlâng theina dingin a chuktuo a nih. Bung pakhatin a tuor chun bung dang po poin an tuor vong a, bung pakhat chawimawia a um chun bung dang po poin an lawm ve vong a nih.
Pentikos huna ringtu hmasahai khawsak dâna khan inchûk ding a um a. Tirkohai inchûktirnaa chun inpumpêkin, bei khoia fa tlâng le ṭongṭaiin an inpawl khawm hlak a. Ringtuhai po po chu an chĕng khawm a, iengkim an inṭawm a. An in le lo le an thil neihai an zor a, an mamaw ang peiin an insem tlăng a. Hieng ang hin an khawsa tung pei thu ei hmu nawa chu an ngirhmun dungzuiin inhmangaituo le insomdawltuoin an khawsa a nih.
Ei Lalpa Isu Krista’n, khawvela a hung lai khan ei enton ding a mi maksan pêk. Innei lawmna huna an mamaw em em tui uoiin an chang tir a. Natna le hrivoi hrang hrang – mitdel, phâr, zeng, ṭong thei lo, nuhmei thipût, khawsik insâng, invûng, nasêt, nakawr sât thlak, khawhri soisak, etc. neihai a sukdam a. Mipui 5000 le 4000 a hrai tlai a, mithi a keitho bok a nih. Thlarau sandam ei ni theina dinga Isu Krista kha hnuoia hung ni sien khom, taksa khawsaknaa (cultural, social and economic welfare) harsatna chi dang dang mihriemin a tuokhai a ngai poimawin a kut a’n rol hlak a nih. Eini khom ei unauhaiin harsatna an tuok hin ei kut ei kei ding an nawh.
Ei kohran khom thlarau bohmang san dinga rongbawlna nasa taka ei nei lai zing hin retheihai somdawl theina rongbawlna kot Pathienin a mi hong pek a. Hi kongah mawphurna ei nei ti hre zingin Pathien thu ei hril tâk le ei hung tarlang nawk hi hmangin Thlarau Thienghlimin einiah sin thawin Good Samaritan Fund-ah hei pe diet diet dingin Pathien hmingin ei inngen non a nih.
By:- Upa (Dr.) Lalsiemlien Pulamte
