Pathienin a nauhai a theinghil tà mani?
Aw Lalpa, ieng chen hiel am,
I mi thlathlam ding a na?
I mi theinghil song ding maw?
Ka lakah ieng chen top am,
I hmel i thup ding a na?
Ieng chen top am rimsi a,
Sûn-zân lungril beidong a,
Hmelmahai lu ling khum a,
Nangin i mi sie ding chu? (Sam 13:1-2)
Davida ṭap hla hi voisûna North Korea Kristienhaiin an inṭawmpui ti inla inkhêl kher naw nih. North Korea kohranhai ngirhmun sietzie ei hmu hin an ringna chu fie a ni ngêi ti hmai ruol lo a nih. Kohran chu a rûka inthup ding am, uol au taka hrepuitu ngirhmun a chang ding? Isu Krista hming hi inring taka puong am annawleh midang hriet lo dinga a rûka puong? Isu chu Lal a ni si chun a zuituhai ieng dinga a hung sansuok naw? Ieng leia a zaa tiem mihriem lunginah amanih thina camp ah kum tin an bo hmang?
North Korea-a um Open Doors palai chun an ṭongṭai inkhawm dân hai hieng hin a hril a. Banga intâr an ram ṭhuoituhai thlalak puonin an inkhum a, intlar bielin an dingdiṭhuon a. Hratna le tuorselna dingin kan ṭongṭai hlak. Kan ram chelding dingin Pathien kuomah kan ngên a. ‘Pa, Israelhai kha an suol leiin thlalêr ramah kum 40 in châtvai tir a. Keini ruok chu kum 50 neka sawt hnung khoma hremin kan la um zing si. Ni e, kan suol, nang ruok chu i fel. Kim II-Sung limhai hmaah kan lo kun hlak a, chu hma khom chun Japanhai milim hmaa kan lo kun bok. Mi ngaidam rawh. Pa, lunginsiet takin North Korea-a kohranhai hi mi tungding rawh’.
Hieng anga North Korea ringtuhai lungrila suol inhriet ei hmu hin lungril a na a, Davida ṭap hla khi anni’n an khêksuokpui el hi thil awm tak a nih. Patheinin North Korea-a a nauhai a thienghil tâ’m mani maw? An thlarau hringnun hei dap suok ei tih.
Open Door palai lo thlir dânin North Korea ringtuhai hi an puitling khop el. Ringnawtuhai va paw dân an hriet a, ringtharhai le puitling tah an nauhai inchûktir dân an thiem bok. Kristienhai chun fiea an um hi poi an ti nawh. Pathien lalram ta dinga inpêksuok an inhuom hmak a, fienahai hi insukthiengnaah an ngai.
North Korea Kristienhai chun titak zeta an ṭongṭai chun Pathienin don ngêi a tih ti hi an ring tlat a. Palai hril dân chun, “Open Doors leh project kan thaw pha, ni sari (ni sawm chen dâm) sûng bungheiin kan ṭongṭai phot hlak. Pathienin kan ṭongṭaina a mi don pha chauh project kan ṭan hlak. A châng chun mang hmang dâmin Pathienin thaw ding a mi hril hlak. Chun, a chang leh kan rengin ngaidân inang char kan nei hlak”. Sukrinumna a nasat le inruolin ringtuhai chu a hma nekin an huoisenin an hrat zuol hlak.
Inchûk le hmalâkna ding: Voisun hin Pathienin a nauhai a theinghil ngai rêng rêng nawh ti beiseina ênga hin chawl hadam ei tiu. Kristien inpawlkhawmna (fellowship) le ṭongṭai ruol khawm inhoizie paw ngai lo North Korea-a ringtuhai ṭongṭaipui hlak ei tiu.
By:- Upa Dr. Lalsiemliem Pulamte
