Pathien Thu Zieka Um Chu
“Thutak zawma in insukthieng tah leiin unauhai khom titak zetin in hmangai tah a, chuleiin lungril po poin inhmangai tuo ro. Chi hmon thei ni loin, chi hmon thei lo, Pathien thu hring le tloa inthoka pieng thar in nih.” (1 Peter 1:22-23)
July 31, 2022 Pathienni ei Chawibiek inkhawma khan HCFD Thuring pakhat – Pathien Thu chu inkhêl thei lo, Pathien inthuok khuma ziek a ni thu ka lo hril tah a. Chu thu bok chu a’n khât tawkin hung ziek pei ka tum a, tiemtuhaiin malsawmna in dong ngèi ka beisei.
Baibul hmu phâk lo, abikin lungina intânghai ta dinga Baibul hi an ṭhangsan (resource) poimaw tak a nih. Kristien hlasakmi, Helen Berhane chun Eritrea-a lungina siem long sûngah Baibul a chawirûk thu a hril a. An ringna inphet nuom lo Kristien nuhmei dang sawm le pariet hai umna longah chun son a nih a. Ama le a nuhmei chanpui danghai hringnunah chu Baibul chun rasuok ṭha tak tak a nei dân thuhai chu a lekhabu, ‘Song of the Nightingale’-a chun a ziek a.
Ama chun “An mi’n tângtirna kan umna chu kan intar khop el a. Sienkhom Kristien pawl pakhat hai lai um theia ka um chu ka lawm a. A’n tâng sawt tak ka ni leiin a hotu takah ka um a. Ka’n tângpuihai chun anni ngaituotu an um ti an hrietin an thla a muong leiin ka theitawpa anni ṭhangpui chu ka tum a. Zingkâr nuhmei upa deuhaiin zun-le-ek an inthierfai sûng chun an puonsilhai chu ka lo thlep pek hlak a. Chun, bûr-le-bel bal le rimsi tak takhai chu sawpfai dingin ka um hnufuol hlak bok”.
“Anni lai tamtakin an pasal le nauhai an ngaituo taluo hlak leiin an lungril lak pengna dingin an sinthaw ding ka riruong pek hlak a. Brekfas siemin kan ni hmang ding kan ṭan hlak a. Chu zovah Baibul thu ngun taka ngaituo le bi dingin hma ka ṭhuoi a, chun hla ka sak pek hlak. Thla khat ka’n tâng hnungin vêngtuhai mandok thei loin Baibul ka pai lut thei hram a. Ieng ang chiein am chu chu ka thaw ka hril nuom naw cheu, asanchu tu chen hin chu thawdan chu an la hmang a, sorkar thuneituhaiin an hriet pal ding inlau a um. Ka hril thei sun chu an leh Baibul hi a chin lem, ṭhe ngain ka siem a, hieng hin ka ta dingin thup a olsam lem. A hma chun ka’n tângpuihai lai ka khâtin Baibul thuhai ka tiem suok hlak a. Tu ruok hin chu ni tinin a pawl pawlin kan rengin kan tiem hlak. Lungina ka hla phuok tharhai dàm ka sak pek hlak” tiin Helen chun a hril.
Inchûk le hmalâkna ding: Ei Pathien thu hi a hringin a mi sukthieng thei a. Chu lei takin mihriem hringnun a siem thar thei a nih. Chu thuruk hrea mihaiin Baibul an nei thei ding a ni phot chun man le hrem ṭi loa an ṭhahnemngaina hi inpak a hlawin a va ropui de! Baibul kawpi khat chauh hmana mi, a pawl pawlin an hringna a tuoi thar pek a. Eini, in khatah Baibul hmang lova intlar khupa sie hlak haiin ei Baibulhai hi ei hmang/sor tlawm taluo hi inngaituo ṭhat a va ṭul de aw.
By:- Upa Dr. Lalsiemlien Pulamte
