Pathien Thu Thilthawtheina
Pathien Thutaka innghat ei nizie entirna ṭha tak chu Isu hi a nih. Ama chun Pathien Thu a hrilsawng (quote) hlak. Setanin thlalêrah a thlêm (Mt 4:1-11) khan, ‘ti ziek a nih’ tiin Pathien Thuin a thlêmna tin kha a hnawl thlak pei a nih. A thu inchûktirhai sirsana a hmang khom kha Thuthlung Hluia chanchin le thu inziekhai a ni khah. Hieng anga Isu’n a hung hrilsawng hin Thuthlung Hluia lekhabu tin hi a’n dik ngei a nizie a suk lang bok a nih.
Isu’n a thi le thonawk hnunga Pathien Thu a hmang dân hi ngaisak a hlaw bik a. Emmau khaw lampuia ruol pahni leh an intlon khan “Mosiea inthoka ṭanin zawlnei po poin” tia hrilin Pathien Lekha thua a chanchin an ziekhai chu a hrilfie pek tawl a.
Tirko Thilthaw lekhabua inthok Pathien Thuin kohran hmasaa hmun poimaw a hluozie ei hmu thei a. Pathien Thu hmangin Pentikos (TT 2:16-21) hrilfie a ni a, Isu chu Mesia a nizie inhriettir (2:25-28) a ni a, suknomnatna an thlîr dân (4:23-26) ei hriet thei a, suknomnatna kârah kohran ngirhmun (7:1-53) dâm, Krista thu hril (8:29-35) dâm le ringtu Gentêl hai dongsawng (15:13-21) dân ding dâm ei hmuh.
Thuthlung Thara Kristien tamtak le lekhathon ziektuhai chun an ngirhmun hrilfiena dingin Thuthlung Hluia Pathien Thu an hmang hlak a. Voisun ni chen khom hin evangelical kohran hai lai Thutak inchûktirnaah hmun poimaw tak a la hluo zing a nih.
Korea rama Seoul khawpui puoa chun Korea kohran mârtarhai hrietzingna a ngir a. Chu taka milim hmasa tak chu Wales-mi, R.J. Thomas lim a nih. Ama hin 1866 khan Korea hmar tiengah Baibul chawi lutin a hringna a lo chân pha a. Thomas thattu huon banga intâr Pathien thu inziek chu mi pakhat, mithiem (scholar) naupa hin a lo tiem fuk hlauh a. Chu zâr chun ama chu Kristienah a’n let tah a. Ama hin kum 25 chauh liem hnung chun China Shenyang-ah Scottish misawnari, John Ross-in Korea ṭonga Thuthlung Thar a’n let hmasa tak sina chun a va ṭhangpui a. Puotienga inthoka misawnari Korea-ah an hung lut hmain, hi Baibul inlet hin ra ṭha insuoin Korea rama Protestant-ringtu pawl hmasa tak a hung hringsuok tah a nih. Pathien Thu hi thil thaw thei tak a lo ni ngei el!
Inchûk le hmalâkna ding: Voisun hin Pathien Thu, thilthaw thei tak le hring tak hi ngai hlû’ng ei tiu. “Lalpa, i Thuin thil a thaw thei leiin ka lawm ie. Kan ṭhanga hin North Korea le khawvel hmun hrang hrangah i Thu hin kakhawk ṭha le ropui tak nei thar pei raw seh. Amen” tiin ṭongṭai bok ei tiu.
– Upa Dr. Lalsiemlien Pulamte
