Pathien Lekhabu Thienghlim hih
“Pathien Lekha thua hrillawkna thuhai hi zawlneiin ama ngaidâna a hril fie anga hung tlung a ni ngai nawh ti hre hmasa phot ro. Hrillawkna hrim hrim hi mihriem thu suok a ni ngai naw a, mihriemin Thlarau Thienghlim ṭhuoia Pathiena inthoka suok an puong a ni chauh lem.” (2 Pet 1:20-21)
Singapore-a China mi, Daniel chu a ṭhungnaa inṭhungin People’s Republic of China a va sirnaa a thilhmuhai chu mak tiin a’n ngaituo a. ‘În zinna chu a tawi zawngin hei ripawt ta la’ tia an ngên chun hieng hin a hril a:
“Ina inkhawm hlak kohran (house church) pakhat ka va sirnaa inthokin hei hril ka tih. Membar zaa tiem thei hiel an ni a, chuong hai chun suknomnatna kum têl an lo tuor tah. Hieng ang harsatna boruok kârah ieng tinam hnena in chang theiin kohran membar khom in pung thei a, tia kan don chun thil pathum an mi hril a. A pakhatnaah Pathien Thu zawm, a pahninaah Pathien le inbiek (ṭongṭaina), a pathumnaa chun ringtu unauhai hmangai.
Hi kohran membarhai hin cholkâr tin Bible bung khat lungrilin an vong (memorise) hlak a. Bible tiem ding an nei tlawm leia an lo thaw ṭan a ni a, amiruokchu, tu tieng tieng hin hi hih an thaw leia thlarau malsawmna tam tak an dong a’n hriet leiin an sunzom ta pei a nih.
Baibul hi Pathienin ei kuomah ama a’n puongna a ni bâkah inlaichinna mi neipui a nuomna thu a hrilna a nih. Khawvel ta dinga a thiltum suklangna a ni bok. Baibula hin ei Pathien hi inpuong naw sien chu a ropuizie ei hriet thei naw ding a nih. A’n puongna ropui tak hun chu mihriem taksa puta Isu Krista hnuoiah a hung ṭum a, mihriemhai lai a hung chêng kha a nih. Chu khom chu Baibula inthok bok ei hriet thei a nih.
Setan hin Baibul hi awitlâk lo dinga insuo tumin Kristienhai lai nasa takin ṭhang a lak hlak. Kristienhai Pathien Thutak ringnaa an inhnuoi hi Setan lawmzawng tak a nih. Sienkhom voisûn ni chen hin tukhomin Baibul hi ringtlâk an nawh tia fie thei an um nawh. Mihriem hrietah thutak famkim a la ni zing.
Baibul hi ei ringna, thuring le nun dân innghatna a nih. Kristien tam tak Baibul inchûktirnaa inthok an pêng hmang leia harsatna tuok ei hmu hlak. Chuleiin Pathien Thu bì ngun le inchûk hi Kristien hringnuna thaw ding poimaw a nih. Ringtu’n Pathien Thu inchûktirna ei ringhla, ei hnawl amanih ei hriet thiem naw a, ei fe hmangsan phâ thlarau thilthawtheina ei ìnhmang hlak a nih.
Inchûk le hmalâkna ding: Voisun hin ni tina Pathien Thu inchûk bâkah ka nuna phursuok pei dingin intiem thar ka ta, khawvêla ringtu an mimala Baibul la nei lo, nei nuomhai ta dingin ṭongṭaipêk ka tih.
By: Upa Dr. Lalsiemlien Pulamte
