Pathien leh inbiekpaw
“Ṭongṭai fan fan unla, invêng zing unla, lawmthu hril rop ro.” (Kol 4:2)
Vietnam-a communist-hai inlal hun 1970 bawr lai khan Pastor Ha kohran chu kum tlawmte sûngin membar 29-a inthok 5000 an tling hman a. A thuruk an indon chun, Pastor Ha chun, “Ringdan kalhmang pakhat ka zui a – harsatna i nei chun ṭongṭai rawh. Harsatna i nei rawn pei chun ṭongṭai rawn pei rawh”. Hi kohran/ biek-in ahin zîng dar 6-ah ṭongṭaia ṭhang an tam thei khop el. Kohran an pungin an inṭhang lien pei a. An chungah sorkâra inthok boruok rikin del zing hlak sien khom an biek-in bangah thuziek “Ieng kimah lawmthu hril ro” an târ chu tie.
Kum tam tak lunginah a’n tâng hnungin Pastor Ha chun “Ṭongṭaina hi iengkim el a nih ti lunginah ka hriet suok a. Vuongna khaltuin vuongna a vuong suok pui hmaa thil en le siemrêl ṭulhai a en hlak ang hi a nih. Thil thaw ding hmasa tak a hmai pal hlau chun mi tamtak hringna ta dingin sietna rapthlak a tlung thei. Chuong ang bokin thlaraua thil thaw hmasa tak ding chu ṭongṭaina hi a ni a, chu chuh ei ṭhel chun ei mission po po a sukbuoi thei vong a nih.
Vietnama um bok Pastor Cuong, kum 6 lungina intâng khom ṭongṭaina thuah hieng ang hin hril ding a nei ve a. “Ka sinah ka buoi hlak taluo leiin ṭongṭaina hun ding ka nei ngai nawh. Sienkhom lunginah Pathienin ṭongṭaina hun ding a mi pek a, ka lawm hle. Ni tinin darkar 6 ka ṭongṭai hlak. Ka kohran membar tin ta dingin ṭongṭaina hun ka siem thei hlak tah. A hma chun kohran sin thaw hlak lang khom an ta dingin ṭongṭai hun ka nei thei ngai nawh. Ṭongṭaina hin Pathien mi umpuizie ka hriet thei tah. Ei dingthaṭhuona titak zeta Pathien leh ṭongṭaina hun ei hmang chun a donna khom ei hmu nghâlin ei hriet thei a nih.”
Khawvela sakhuo lien hai hin ṭongṭaina a poimawzie an inchûktir a. Buddisthai chun tu khomin an ngaithlak ring naw hai sien khom an ṭongṭaina a non a nonin ursun takin an hril hlak. Hinduhai chun an ṭongṭaina donin um a tih ti ring bêk naw hai sien khom, pathien tam tak an neihai laia pakhat tak chun ngaithlâng a tih ti beiseiin an ṭongṭai hlak. Muslimhai chu ni khatah voi nga an ṭongṭai a. An Allah-in a ngaithlâk beisei hai sien khom, an poimawhai hmu dingin an pathienin a thil riruong tasahai chu an ṭongṭai zâra a thleng an ring chuong nawh.
Buddist, Hindu le Muslim hai chun Kristien sakhuo hi ṭongṭaina um lo ringna niin an ngai a. Asan chu Kristien ṭongṭai an hmu tlawm/ inkhat lei nîng a tih. Chu chu lo ni sienkhom hi hih ei hrietin ei ring – ṭongṭaina ngaithlatu chau ni lo, lawmum taka don hlaktu Pathien hring le thilthaw thei ei nei a nih.
Inchûk le hmalâkna ding: Voisun hin ṭongṭainaa Lalpa Pathien leh inbiekpaw dingin thutlûkna thar siem ka ta, lungina intâng Kristien unauhaiin Pathien umpuina mak tak an chang theina dingin ka ṭongṭai a nih.
– Upa Dr. Lalsiemlien Pulamte
