Nang sukthieng dingin Lal Isu’n “Nuom e” tiin a’n pei zing
” Phâr pakhat Isu kuomah a hung a, bokkhupin chibai a bûk a, “Lalpa, i nuom chun i mi sukthieng thei” a ta. Isu chun a hei ban a, a them a, “Nuom e, lo inthieng ta rawh” a ta. Phâr chu a’n thieng ta nghâl a. ” Mathai 8:2-3
Phâr chu mi po po tirdak an nih. An tirdak chauh ni loin an natna kha olsam taka inkai thei nia ngai a ni lei khan mi po poin an tirdak chauh khom ni loin an ṭi, an thîm seng a nih. Phârpa khan Isu chanchin a lo hriet ngèi chu a ni awm. Sienkhom, Isu hung pan ding chu a va harsapek de aw! Mipui tam takin Isu an zui bok sih a. Kha lai huna phârhai chu khuo an lut ding chun inring deuin “Phâr, phâr” tiin an khek ding a nih. Mipui chu an in sengah lut an ta, chu chun khuo a lut thei chauh hlak. Khêk loa khuo a lut a ni chun lunga denghlum thei an nih. Ama ta ding chun khawtlâng dân-le-dun hai chu Lal Isu a hung panna lampui sukharsatu vong an lo nih. Chuleiin, Isu kuom a hung tlung dân hi Baibulin ziek naw sien khom inring deuin a hung khêk malama Isu kuom hung tlung chu a ni ring a um. Chuong ni naw sien a khuo mihai khan an lo dang ngèi ring a um. Ieng khom ni sien, ama ta ding chun Isu kuom hung tlung kha thi-le-thi dam-le-dam ngirhmuna um chu a ni hrim hrim a nih.
Lal Isu kuom a hung tlung ta ngèi a, sienkhom a lungril a rik em em el a nih ti chu a ṭongbaua inthok hin hriet thei a nih. Lal Isu ke bulah bokkhup topin chibai a buka, “Lalpa i nuom chun i mi sukthieng thei” a ti tah a nih. Lal Isu thilthawtheina chu a ring hle a, sienkhom a lungril sawlna tak chu, “Mi danghai ang bok khan Lal Isu khan a lo tirdak ve a ring kha a nih. ‘Isun a lo them nuom dim aw?’, ‘A lo tirdak vieu el dim aw?’ ti tak kha a buoina a nih. Ama a’n siengna nu le pa ngèi khoma an tirdak a, a khuo le venghai khoma an tirdak. An kohran le an kohran ṭhuoituhai ngèi khoma an tirdak a na. Lal Isu khom khan a lo tirdak ve ngei chu ring a um a nih. Chu tak chu a lungril suksawltu a nih.
Ieng tin am Lal Isun a don a? “Nuom e” tiin a don tah a nih. A va lawm awm de aw! Chu chauh khom chu an naw a, Isun a kut ngèiin a hang ban a, a them a nih. A va’n phalam awm de aw! Chuong chun voi le khatin a’n phârna chu a hung bo el ta a. A va hamthra de aw! Mani tisa chakna suol hne loa um, nuhmei tam tak, an nungchangin a zir ta naw leia, biekin pan rin èm êm el tahai, màni society lai khom ṭhang inzakum ti tahai dàm ka ngaituo a, ka ṭongṭaipek chang hin hi lai Baibul thu bok hi ka lungrilah a hung inlang hlak. Chun, damdawi ngolveihai ka ngaituo pha khom hi lai Baibul thu bok hi ka lungrilah a hung inlang nawk hlak. Lal Isu kuom an hung panna lampui ka ngaituo châng chun ka lunginsiet thei em em hlak. Ei community le kohran inṭhuoi dan renga khom hieng ang mihai ta ding hin Pathien hung pan a harsapek thei ngei.
Lal Isu hlak chun a lo tirdak tawl dèr nawh. A va mak ngèi de aw! “Nuom e” a lo ti el sih a. Chu umzie chu a lo welcome tawl hle a nih tina a nih. A kutin a lo them a, an dam hlak a nih. Lal Isun a mi tirdak ka ring a, suol inti êm èma ka pan chun ka ring naw tieng dai a lo nih a. Mi tirdak nekin hmangai takin a mi lo kuo a, ka suolhai a mi ngaidam vong a, chu chauh chu ni loin a rongbawltu dingin a mi ko nawk ta pei a. Manga ka mang phak khom an nawh. Lunginsietna hi a ropui em leiin kohran le khawtlânghai khomin ei hriet suol rop dingzie chu kei ka ton hrieta inthok khomin ka chieng êm èm a nih. Lunginsietna huna hin Lal Isu hi ei ring ang a lo ni naw de aw! Ei suolnahai kha a lawm ni si loin, ei suolnahai leh ama kuom ei va pan chun a mi lo lawm êm èm bok si. A mak de aw! A changtuhai naw chun an hriet thiem tak tak naw ding a ni bok a nih. Ka hringnun ka suikir chang chun Lal Isu hmangaina ropuiin second khat khom a tling dim aw tiin a mi siemthar der el a ni takin ka hriet hlak. I suolnahai po po leh Lal Isu hung pan hrim hrim tam ti chu voisuna ka hung hril nuom tak a nih. Aman ieng tin am a lo biek che a? Ieng thil am a lo hril che a? Intuokpui tak zet pha Lal Isu hi tu’m a ni tak zeta ti chu hung hre tang i tih.
By :- Pastor Lalditsak Inbuon
