Lungril thar peng ka ti cheu
“Lungril thar peng ka ti cheu a, in sungah thlarau thar sieng ka ta; in lungril, lung anga ngar chu la suokin, pangti anga innem lungril peng ka ti cheu.” [Ezekiel 36:26]
Ezekiel hi zawlnei a ni a, thiempu khom a ni bok a nih. Babulon sala intânghai lai a um ve a, sala intânghai lai kum 22 zet rong a bawl a nih. Thu tam tak hrillawknahai a nei a. A ṭhen chu hriet thiem intak deu deu dâm a um. A thu hril laia mi tlawmte chau zuk hril in la. Pathien thu a kuomah a hung tlung a, “Mihriem naupa, Israel sungkuohai chu an rama an chêng lai khan an um dân le thilthawin a ram chu a sukporche a. Ka mita chun an um dân hi nuhmei thla pal lai anga tirdakum a nih. A ramah thisen insuoa, milemhai bea an insukporche leiin ka hnotsuok tawl el a ni kha. Hnam tin lai ka sukdar a, ram tinah an umdar a; an um dân le thil thaw dân angin an chungah ro ka rêl a nih. An fena taphota hnamhai lai ka hming thienghlim an sukpawi a, mihaiin “Hienghai hi Lalpa mihai an nia chu a rama inthokin a hnotsuok tawl a ni hi” an ti hlak si a. Israelhaiin an fena taphotah ka hming an sukpawi hi ka lai a na a nih.
Israelhai an rama inthoka Lalpan a hnotsuokna san chu a ramah thisen an insuo a, milem pathienhai an biek a Pathien hming an sukpawi lei a nih. Chuongchun hmun tin ram tinahai a sukdar tawl a nih. Khom chun an fena taphotah Pathien hming an sukpawi ta pei bok a nih. An rama inthoka hnotsuok an ni ta hnung, Babulon sala an um hnung khomin an suolhai sima Pathien tieng kir an tum chuong nawh. Chu nekin an fena taphotah Pathien hming thienghlim sukporchetu an ni lem pei ta a.
Pathien lungril an sukna êm êm a nih. Lalpan, “Isaraelhaiin an fena taphot hnamhai laia ka hming thienghlim an sukpawi hi ka lai a na a nih” a ti top el a nih. A thaw dan ding a vang de aw! Pathien iengkim thawthei chun an rengin sukbohmang vong sien, anni neka ṭha lem siem el sien ama ta ding chun a olsam lem dai awm ie…… Sienkhom Lalpa thu zawlnei Ezekiel kuomah a hung tlung nawk a, “Israel sungkuohai kuomah hieng hin hril rawh, “Lalpa Pathien chun hieng hin a tih; Aw nangni Israel sungkuohai, nangni ka lainat cheu lei ni loin, in fena taphot hnamhai laia in sukpawi hlak ka hming thienghlim chu ka lainat lei lemin hieng thilhai hi ka thaw ding a nih” a hung ti ta lem hlau el a. Iem an ta a leh Pathienin a hung thaw ta ding chu? Mihriem ngaituonaa thlir chun huphur a va um ṭel ṭel de aw! An fena taphotah Pathien hming an sukpawi el ta si a. Ka hming ropui tak, hnam danghai laia sukpawia um, nangni ngêiin insukpawi chu a thienghlimzie chu inhmutir ka ti cheu…. Hnam danghai laia inthokin ṭhuoisuok ka ti cheu, Tui fimin buok ka ti cheu a hung inthieng tâng in tih ….. Lungril thar peng ka ti cheu a, in sûngah thlarau thar sieng ka ta; in lungril lung ang chang chu la suokin, pangti anga innem lungril thar peng ka ti cheu….a hung ti lem dai el tah. A va mak ngei de! Lalpan Israelhai a lawm lei ni lo, a lainat lei khom ni lo, ama hming thienghlim a hum tlat nuomna leiin Israel sungkuohai indin thar dingin thu a puong ta bur el a nih. A ropui hem hem de aw!
An fena taphota Pathien hming sukpawituhai kuoma Pathien thutiem hi a va ropui lawm lawm de aw! Vut aia ṭhi hi ti kha a va ni ngei de aw! A san dang a um nawh. Lalpan a hming thienghlim a hum tlat a ṭul lei a nih. Lalpa lunginsietna ropui tak lei a nih. Thil thar tam tak ei dit a um. Kei khom tu lai chu ka car a validity a bo ta leiin car thar ka dit khop el. Sienkhom ieng dang neka mihriemin ei mamaw tak chu lungril thar a nih. Pathien thuin mihriem lungril hi a sie bik rieua a lo tih. Pangti anga innem lungril thar mi pe dingin Lalpan thu a lo tiem ta bur el a nih. Pathien thu tiem chu hlen loin a um ngai naw a, Kristaah lungril thar a mi pek ta hrim a nih.
A hming thienghlim humna ding, a thu tiem hlen ngei a nina dingin mihriem tieng ei mawphurna hril tlak le ring tlak a um ta nawh. Pathien bokin a hung thaw ta lem a nih. Hieng lawma thil ropui Pathienin a mi thawpek hi ieng tin am ei donlêt ding a na? Hieng thil Pathienin a hung thawna ding hin iengkhom ei thaw a ṭhang nawh, ei thaw thei khom a ni bok nawh. Sienkhom hieng lawma hmangaina hi ei lo hnawl el chun a poi bek bek ding a nih. Chatuon kakhawk a nei dai ta ding a nih. Lalpan iengkim a mi thawpek vong a, chu bek chu lawm taka lo laklut bek ei thaw naw chun hril ding a um ta nawh. Thil thlawnpek ropui tak ei dong a, a lak bek chu ei lak naw ding am a ni? A lak bêk khom ei lak nuom naw chun iem hril tâng ei ta?
By:- Pastor Lalditsak Inbuon
