Lâm Puma Pathien Chawimawi: Siemtharna Camp-a Ka Testimawni
21-25 October 2022 sûnga Siemtharna Camp ei neia ka changkângpuina pakhat chu Pathien chawibiekna dinga lâm hi a nih. Nidang khan Pathien inpâkna dingin ka kut ka ben a, chun ka kuthai ka phar ve ṭawk hlak. Pathien chawimawina dinga lâm tak hi chu thaw sin ding khoma ka ruot ngai nawh. Nupuihai chanah le ka phâk lo thilah ka sie khom ning a tih.
Amiruokchu, tuta ṭum chu Thlarau Thienghlimin keiah sin thawin misuol le hmelma ka ni lai hmana mi hmangaia, ka sandamna dinga a Naupa Isu Krista mi buotsai pektu Pathien inpâka ama chawimawina ding chun ka taksa po po inhlan a, hei lâmpui hi a phu hlie hliein ka hriet a, ka’n zâpui naw a, inhoi khom ka tih.
Pastor Ditsakin, ‘Hla khom sak loin ei taksa hai Pathien inpâkna dinga inhlanin hei lâm ei tiu’ tia a hung puong khan a tîr chun tùhai thaw dân ang deua khuong thlarau chang ang ning ei tih tiin ka lo intîm deu a. Sienkhom ka ngaituo ṭha nawk a, lungrilin, ‘Lalpa kan pâk che, inpâknan ka lâm a nih’ tia ama kuomah inhlan puma ei hei lâm khan an hoi bêk bêk el a nih. Lal Davida khom kha hlasak um loin a lâm khah.
Pathien thuin (2 Sam 6:16-23) a mi hril dân chun Davida khuoa Lalpa Bawm a lut lai chun Lalpa hmaa Davida chu inchawmin a lâm ei hmuh a. Saula naunu Mikal chun, ‘Voisuna Israel lal chu ….. mi ho tak, inzak nachang hre lo” tiin a deusaw a. Davida ruok chun Lalpa hmaa lâm a nizie le Lalpa hmaah lawm ding a ni hrim thu a hril pek a. A’n dik khop el. Lalpa hmaa hin ama inpâknain muolpho khom inhuomin lâm ding ei nih. Isu Krista mi hne pekna thu hlain ei sak châng lem hin chu hrâng lâmin lâm inla a mawi hlie hlie a nih. Lalpan ei thlarau chauh ni loin ei taksa khom a thisen hlu taka a’n tlan an tâk leiin ei taksa pumpui hi ama ta a ni tah a, felna hmangruoa ei hmang el khêlah, ama inpâkna le chawimawina dinga ei inhlan a, ei lâm hi a phu hlie hlie a nih. Isu Krista ta dinga i taksa inhlan i la rin vieu maw? I ta dinga saruoka krawsa khaikang a ni lai khan Isu an zak nawh.
By:- Upa Dr. Lalsiemlien Pulamte
