Kohran Upahai: An thaw ding le mawphurna

Blog Page

Kohran upahai mawphurna Baibulin a lo ziek ṭhenkhat hai leh kohranin ei practice ṭhenkhat hai hei tarlang ei tih.

  • Enton tlâka Lalpa beram enkoltu ding an nih: 1 Peter 5:1-3-ah “Nangni laia kohran upahai chu kei, upa ve bok, Krista tuornahai hmutu le ropuina hung inlang ding chang ve beiseitu hin ka’n fui a nih. Nangni laia Pathien beramhai chu enkol ṭha ro. Thaw dinga ti in ni lei ni loin, Pathien dit dan anga nangnia thaw inhawkna leiin thaw unla, sum tienga in inhawmthaw lei ni loin rongbawl nuomna lungril putin enkol ro. In enkolhai chungah insuklal naw unla, an enton tlakin um lem ro” tiin a mi hril a.
    Pathien rama rongbawlna sin hrim hrim hi, a sin thaw el kha a ni ta ngai naw leiin khawvêl thlirna le khawvêl en anga en le thaw el a thei ngai naw a. Hi taka a hril khom hi a bulpui, a’n ṭhutna tak chu, “Krista tuorna hai hmutu le ropuina hung inlang ding chang ve beiseitu hin ka’n fui a nih” a ti hi a nih. Krista tuorna a hmu a, chun a beiseina khom hi khawvela ding chauh a ni naw a, nakie ropuina a la chang ve ngèi ding beiseitu a nih. Chu tak el chu a sukphûrtu (driving force, motivator) a nih. Chu chu in lungrila sie zingin Lalpa beramhai enkol ṭha ro a ti a nih. Chun, in enkolhai chungah insuklal naw unla, an enton tlakin um lem ro” a ti nawk a. An hril a, beram hin metre khat bâka hlâ an hmu thei naw a, berampu a fènanà an zui el hlak a nih. Tui an insil ding khomin berampu kha tuiah a’n chawm thla dum a, beramhai khom chun a hnung zuiin an inchawm thla mur mur el a nih. Milimah ei hmu ta hlak a, kei ka hmu chu berampu khan an hma a ṭhuoi a, beramhai khan an zui dup dup a, beramhai hnunga chun uisathiem am ei ti ding, ui var deu pakhatin a zui ve a, a fe pêng dinghai chu a vêng pei hlak a. Chuleiin, an enton tlâkin um lem ro a ti chun beramhai kha khal loin an hma a ṭhuoi lem ding tina a nih.
  • Damnawhai ṭongṭai pektu ding an nih: Jakob 5:14-15-a chun, “Nangni lai damnaw an um am? Kohran upa inkotir sien la, Lalpa hminga hriek nalin ṭongṭaipek raw se. Ring tlata ṭongṭaina chun damnaw chu sukdam a ta, Lalpan keitho a ta, thil suol a lo thaw tah khom ngaidam a tih” ti ei hmuh. Khâng lai huna khan chu daktor le damdawi-in khom a la um mumal naw lei am a ni ding, nangni lai damnaw in um am? In um chun Kohran Upa inkotir sien, hriek nâlin a ṭongṭaipek ding a nih, ring tlata ṭongṭaina chu Lalpan don a ta damnaw chu sukdam a ni ding a nih a ti el a. Hi thil hi eini lai chu ei chîng der nawh ti thei lem chu a ni naw a, amiruokchu ei uor bêk bêk nawh. Shiv Vihara ei kohranhaiin an uor takzetin ka hriet. Inkhawm zo char hin, “Chu chu, kha kha a na a, mi ṭongṭaipek rawh” an hung ti hlak. Inkhawm ṭin hnungin sawt fû fù hun an la hmang hlak a nih. Thil hrim hrim chu a taka ei chîng phot naw chun a ra um dân um lo a na, hieng thil hi ei uor a ṭul ka ti khop el. Ieng leia ei dam naw châng khomin kohran upahai ei ko bêk naw am ning a ti aw? Ei inphalam lei dâm a ni el dim? Ngampabunga Upa Bieka kha Hmar kohran upa lai chu ko rawn tak a ni el dim ka ti a. Lo sin a thaw hman naw a ni tak el. A ṭongṭaipek a, damna chang an tam èm êm a, tiem tham fut an nih. Ei uor nawk taluo hlak a, thil inhmanghai chen khoma an ko nawk pei a. Damnawhai ṭongṭaipek chu Kohran Upa sin poimaw èm êm Baibulin a mi hril a nih. Kohran membarhai daktor an ni chuh, a ropui de aw!
  • Pathien thu inchûktirtu an nih: Tita 1:9-ah, “Kan thu zirtir ringum tak hi kan inchûktir ang chara nghet taka cheltu a ni bok ding a nih; chuongchun thuring indik inchûktir thei a ta, a kaltuhai khom sel dong thei bok a tih”. 1 Timothe 3:2-a khom, “Chuongchun, kohran ṭhuoitu ding chu dem kai lo, nuhmei pakhat nei, insûm thei, mi thilphal le zirtîr thiem a ni ding a nih” a lo ti ve a nih. Pathien thu tak zirtîrna sin hi kohran upa sin poimaw èm êm pakhat Baibulin a hril chu a nih. Zirtîr thiem a la ti nawk kher a nih. Zirtîr thiem dinga thil poimaw èm êm chu a zirtirhai hriet chieng a nih an ti a. An mawmaw (dose) izira a zirtîr pei ding tina ning a tih.
  • Remna siemtu ding an nih: Jerusalem inkhawmpui ei ti vet kha hre tawl ei ta. Judai rama inthokin mi ṭhenkhat an hung suk a, Mosien dân a pek, ‘Sertan lo chu sandam an ni thei nawh’ ti thu an hung khêkpui a. Buoina nasa tak a um a. Chu phing le Paula le Barnaba le mi ṭhenkhat Jerusalemah an tir a, Chu chungchanga chun Tirkohai le Upahai hang inhmupui dingin an fe a. An hang inhmupui ngêi a, inremna siemin thutlûkna fel tak an siem thu ei hmu a. Chuleiin, Baibulin a hril chu Kohran upahai chu remna siemtu ding le thutlûkna siemtu ding an nizie a hril a nih. Buoina a um chânga to ṭok ṭok kha kohran upa mizie ding anga ngai an tam khop el a ei rama hin. Buoi laia to ṭok ṭok chu pang anhang naw dan tak khom a nih. Sienkhom remna siem ding chun ṭhang lâk fut a ṭul hlak.
  • Enkoltu (administrator) an ni bok a nih: Thilthawhai bung 6-a hin buoina um thu ei hmu a. Ringtu tam tak an hung pung pei a, kha thuthlung thar kohran kha an ropui em em a nih. An thil neihai an inṭawm a, a nei deuhaiin a nei nawhai an mamaw ang peiin an inṭhangpui a. Zân tin bu an kîl tlâng a. Ni tin fak sem thu a, hmeithaihai an ngaisak nawh tiin Grik ṭong hmang Judahai an hung chier a. Peter a ngîr a, “Pathien thua rongbawlna thlathlamin ni tin fak rongbawl kan buoipui hi thil indik a ni nawh. Chuleiin, unauhai nangni laia Thlarau Thienghlim le varnaa sip mi nia in ngai mi pasari thlang suok unla, an kutah hieng sin hi inhlan kan tih, keini ruok chu ṭongṭai le thu rongbawlah inpumpek tlat kan tih” a ta. Kha rongbawlna sin thaw kha upahai mawphurna a nih.
    Tulaia eini ngirhmuna ding chun hi administration thil hi thil tam tak ni tâng a tih. A fe dân tak kha chu Tirkohai khan Pathien thu nasa takin an hril a, a dang thilhai kha upahai khan a ṭul dang phot phot kha an ngaituo pei chu a ni tak a nih.
  • Ei rama Kohran haiin ei thaw danhai: Ei ram tieng mi ṭhenkhat fawna bein “Kohran upahai thaw ding le an mawphurna an hlen dan mi hung hril ta la ka ti a. A mi hung hrilhai chu:- Kohran Upa chu kong iengkimah poimaw èm êm an nih. Kohran hnatlang huna khom hma ṭhuoitu an ni hlak a, an inlang naw chun hril an hlaw nghâl hlak. Damnaw kan hi kohranin an beisei hrim hrim a. Chun kohran ser le sang, hieng thununa pek le laklut hai khom hi an mawphurna a nih. Pastorin Lalpa Zanbu rongbawlna tak thaw sien khom a buotsaitu chu Upahai vong an nih. Chun, an mawphurnaa ziek ni si lo, kohran member hai kantu tak an ni a, an kan naw chun hril an hlaw bok a nih. Rorêlnaa khom upahai hi an poimaw èm êm a nih. Upa ni thei ding chìnhai hi qualification iemani zât ziek a um a, an thaw ding le mawphurna ruok chu kohran inṭhuoina lekhabuah a’n ziek nawh. Amiruokchu ziek ni si lo mawphurna an hau khop el a tih a.

Ka pa kha vâl upa kum 40 zet a ni a, chun kohran upa khom sawt tak a ni bok a. Vâl upa a ni lei am a ni ding, kohran upa a ni lei am a ni ding chu ka hriet bîk naw a, kan khuo sungah damnaw inrik deu kan nei châng chu a um ṭok ṭok thei naw a ni tak hlak. Zâna a va pan a, zingkâr inhma takin zingkâr ṭongṭai zoin a hung kan nawk ngei ngei hlak a nih. Ka nu’n, “I pa hi chu damnaw inrik an um pha chu a monga hawl ang el a nih” a ti hlak.

Thukharna: Kim lo taka ei hung hrilhaia inthok hin, kohran upa chu Lalpa beramhai ṭha taka enkoltu (by example), kohran laia buoina a um châng khoma remna siemtu, kohran hai ta dinga ṭongṭaia râldotu (prayer warrior), damnawhai ṭongṭaipektu, kohran membarhai daktor an ni tak zet. Kohran inenkolnaa ngirhmun poimaw tak cheltu le Pathien thu tak inchûktirtu – kohran banpui an ni tak zet el. Hieng ang kohran upa hi Lalpa kuoma ngên tham tak zet a nih. Chuleiin, Lalpa kuomah lungril le titak zetin ngên mol mol ei tiu.

By: Pastor Lalditsak Inbuon

Loading