Khawvêl hi i ta dingin hemde a ni ve ta’m?
“…. Chu kraws-ah chun ka lakah khawvêl hi hemde a ni tah a, kei khom khawvêl lakah hemde ka ni tah” (Gal 6:14)
Isu Krista hun lâi khawvêla khan kraws kha dam dinga an dit tâk nawhai ṭongsie an inphurna hmun le an thina hmun a nih. Chuleiin, kraws hi hmang tlaklohai hnawlna le sukhlumna hmun a nih ei ti thei bok.
Tirko Paula chun kraws-ah chun ka lakah khawvêl hi hemde a ni tah a tih a. Chuleiin, ringtuhai ta ding chun kraws hi khawvêl hlimhlop chên hai, tisa châkna, thlemna, ropuina tehlem hnot, mihriem thilthaw uongpui le a dang danghai dehawnna, hnawlna, inthi tirna le sukhlumna hmun a nih. Hieng thilhai po po hi hmelma Diabol miziehai le Pathien mi’n hlattirtuhai an nih a, chuonghai chu krawsah muolpho taka ei inhemde tir le ei inthi tir an lo ni tah.
Paula vêkin “Kei khom khawvêl lakah hemde ka ni tah” a ti nawk a. Khawvêl ta dingin ei thi tah. Khawvêl thil ta dingin ei hring ding an ta naw a, ei taksa pênghai tisa suoka dingin ei pêk phal ding an ta nawh. Ei hring chun Krista ta dinga hring lem ding ei lo ni tah.
Krista kraws zâr chun khawvêl lakah hringna thar, nina thar le umna hmun thar a mi siem pek tah. Chu nina thara hrìng le khawsak chu ei thaw ding tak le ei ngirhmun thar a lo ni tah. Chuleiin, Rom 6:13-a “In taksa pênghai khom suol hmangruo dingin suol kuomah pe phal bok naw ro; chuong nêk hmanin, mithi laia inthoka hung hring nawk angin Pathien kuomah inhlan lem unla, in taksa pênghai khom felna hmangruo dingin Pathien kuomah pe lem ta ro” tia infuina ei hmu angin ei taksa hi Pathien hmangruo dingin zing ei tho chara inthokin inhlan hlak ei tiu. Eini hratnaah ei innghat chun harsa tîng ei tih. ‘Ka hrat naw po leh ka hrat a’ tia Tirko Paula’n a hrat naw leia Pathien hratna ringsana hratna a chang thuruk hi Lalpan mi tonhriettir sien tiin ka ditsakna le Lalpa malsawmna kan hlan cheu. Amen.
– Upa Dr. Lalsiemlien Pulamte
