Hung ro, ei ram indinthar nawk ei tiu – Lungrila invoina nei

Nehemia hin Jerusalem siet chungchang thu hi a lo hriet nel nuol tah ring a um a. Hriet chieng nawk zuol a nuom ning a ta, Juda rama inthoka hung kîrhai kuomah Jerusalem chanchin le Babulona saltâng, Juda unau kîr nawk hai chanchin an don a. An ngirhmun sietzie thu, Jerusalem kul a chim le a kotkharhai a kâng siet vong thu a hrietin Nehemia chu a ṭhung a, a ṭap a, ni iemani zât bu ngheia sûnin, van Pathien hmaah a ṭongṭai a. A ṭongṭainaa chun, “I mi Israel hai ta dinga sûn le zâna i kuoma i siehlaw ka hung ṭongṭai hi mi zuk thlir la” tiin Pathien a hnih a. Chun, Jerusalem chanchin a lo indon hun (Kislov thla) le lal dawn ding uoiin lal a va pêk hun (Nisan thla) inkâr hi thla li a tla a. Chuleiin, Nehemia-in bu ngheia a ṭongṭai hun sûng ding chu thla li vel ni thei dingin a um. Lungrila invoina hin teireipeina a siem nawk thung a. 1904 kuma Wales rama thlaraua hartharna ropui tak hung tlung khom kha Evan Roberts-in kum 13 sûng veng veng a ṭongṭaina ra a nih. Chu zâr pei chun eini rawiin 1910 khan Senvon-ah Chanchin Ṭha ei lo dong phà a nih. Voisuna ram le hnam ei invoina hin nisa tlâk a nghak zo da’l di’m maw?

Hieng anga Nehemia-in a’n voi lei khan a sinthawa khom khan pângngai a aw naw ti hmu theiin a um a. Lungngai hmel a put a, Lal chun, “Damnawna nei si loin i hmel a va hang ngui ngêi de! ….. lungzîngna i nei a ni hih” tiin Nehemia kuomah a hril hiel a. Lungrila a thil pai chun a hmel a sukdanglam thei a nih. Ram le hnam ei invoina hin ei hmel put a sukdanglam phâk am le?

Lal Artezerzia leh an inbiek peinaa chun Nehemia-in Juda rama fe phal pêk ding le khuo chu hang indin thar nawk dingin lal kuomah hnina a siem a nih. Jerusalem siet chu lungrilin a’n voi hle chu a nih, a sin thawna, lal in inhoi êm êm chu suoksan a’n huom a. Mani comfort zone-ah um zing a tum naw a, a poimaw chun suoksan a’n huom a nih. Chubâkah, kul hang bawl ṭhat chu ama, lal ina uoiin semtu chun rem hrietna (planning skill) le sinthaw dan (mistri sin) khom hre bok naw nih. Sienkhom, a ṭul tah leiin chuonghai khom chu a’n huom vong a nih. A lungrilin a tur nasa hle leiin, “Hieng ang sin hi chu ka thaw ding ni lo a” a ti dêr nawh. Eini lai ni sien chuh, “I kuong lo i hung nor a nih” tiin ṭhenkhatin lo baukhat rawi naw ni hai am. Lalpa’n a rong bawl dinga mawphurna a mi peka ei hriet hi chu lungrila invoi tak tak a, phur suok el lem hi a lo va ṭha awm de eh. Chun, a mi tirtu Pathien chun a phursuokna dingin a mi’n thuom pei bok ding a nih ti ring ngam a poimaw bok a nih.

Nehemia hin Pathienah an ram le hnam damna a um ti a hriet tlat a. Chun, Pathien leh Jerusalem inlaichînna thuruk a hrietsa bok a nih. Jerusalema tempul tungdingna le a kulhai bawl ṭhat khan Pathien chu anni laia chêng nawkin a ram le hnamin damna ding le tungding nawk theina thuruk a um a ni ti a hriet kar leiin Jerusalem kul chimhai bawl ṭhat kha lungrilin a’n voi bêk bêk a nih.

Nehemia chanchina inthok hin ei ram le hnam siemṭhatna ding hin lungrila invoi tak tak hai chauin hlawtlingna lampui an hraw ti a mi sukchieng pek a. Chuleiin, ‘ram le hnam indinthar ei tiu’ tituhai lungrila hin chona mi pe thar pek sien la, chun, “Ieng chen am in huom a?” ti zawna don thei bok inla nuom a um takzet a nih.

A ziektu: Upa (Dr.) Lalsiemlien Pulamte