Hung ro, ei ram indinthar ei tiu – ram invoi mi le mi ringum ṭhuoitu ei poimaw
Ram le hnam indintharna sina hmalatu dingin ram le hnam invoi mi le Pathien ṭi mi ṭhuoitu ei poimaw. Nehemia-in saltâng kîr nawkhai ngirhmun sietzie le Jerusalem kul chim se vong le kotkharhai kâng siet vong thu a hriet charin a ṭhung a, a ṭap a. Ni iemani zât bu ngheiin a sûn a, Pathien hmaah a ṭongṭai a nih. Voisuna kohran le hnam ṭhuoituhaiin ei ram le hnam a siet tâkzie hrea lusûn anga lungngai a, ṭap a, Pathien hmaa bu ngheia ṭongṭai ei um am aw? An naw leh, ei ram chanchin ṭha lo ei hriet hin, ‘A va poi de!’ tiin ei dit tawk el am?
Thiempu lal Eliasib le a unau thiempuhai chun an inthok a, Beram Kotpui chu an bawl ṭan a, a kotkharhai an siem ṭha a, kul bang khom bawl peiin an inhlan thienghlim a. Thiempuhai hin mistri sin hi chu ka sin an naw a, tiin an kut an kei nawh. Thil inhmaw thil (emergency) a ni tâk leiin ram indinthar nawkna dinga kut sinthaw khom rin loin inhawk takin an pù a. Eini lai chu midang deuin Pathien rongbawl – thuhril, thuziek, Baibul inlet, etc an hung thaw dêk dêk leh thiempuhaiin, “A kuong lo a hung nor” ei lo tih a. Thiempuhaiin ram le hnam invoiin hma an hung lak leh kuong lo norin ei lo intum nawk a. Ei thaw theina sengah ram le hnam indintharna dingin hma ei lak ding reng a nih.
Sûngkuo lukhaitu, ram optu le hotu danghai chun ram tungdingna dingin rangkachak, tangkaruo le thilpek dang dang an pek a. Ram le hnam invoina hin lungril sûng chau a hluo sip ding an naw a, phal taka thilpekin a suklang ding a nih. Tulaia Manipura Zo hnathlak haiin buoina namênlo ei tuok lai khom hin invoina nei tak tak haiin, pasiet le hausak thu dawn loin, thilpeka ṭhahnemngai ei lo tam fut el. Chuong lai zingin, pethei ding ngirhmuna um si a, kut lo kei ṭut khom ei bo chuong nawh.
Nehemia kha lal kuoma zu semtu a nih. Lalin a ringzo tawpkhawk hai chauin hi ngirhmun hi an chang phâk. Chun, lal mit a tlung a, Jerusalem hang indin thar dinga phalna Nehemia-in lal a hni chu a hlawtling bok a. Tulai sorkar ṭongkam takah, a CR (confidential report) a ṭha hle (outstanding) ring a um. Fe phalpekna chau ni loin a’n zinna lamah humhimna (security) le hmangruo ding thing a peksa bok a. Ṭhuoitu dingin mi ringzo, mi mit tlung le mi ditsak hlaw a va poimaw de. Chu ding chun record nei ṭhat a ṭul. Sum a hleprûk hlak am, nuhmei-pasal kongah hrilsep a kai am, hmingsietna dang a nei am ti ngaituo set set loa mi hriet lar (popularity) le laibung rim innam leia ram le hnam ṭhuoitu ding ei thlang el hlak dam hi ei ram le hnam vekin a thawhla hlak a nih. Lungril le a taka ram le hnam invoina nei mi, hming ṭha, hnam/ ram tungdingna dinga ieng sin khoma a phut thaw rin lo le mi ringum ṭhuoitu chu Pathien khoma a dit le hmang tlaka a ngai hai an nih. Chuong ang mi chun an mawphurna an hlen suok hlak, Pathien khoma a ṭhangpui leiin.
A ziektu: Upa (Dr.) Lalsiemlien Pulamte
