Hung ro, ei ram indin thar nawk ei tiu – Mi tinin chanvo ei nei seng
Ram le hnam indintharna sin chu ṭhuoitu kuta chauh a’n nghat naw a, mi tinin chanvo ei nei seng a nih. Nehemia bung 3-a ei hmu angin, Judahaiin Jerusalem kul an indin thar khom khan thiempu lal sungkuo dâmin, a biel biela ṭhe mipui dâmin, sungkuo kuo dâmin, mimal dâmin, khuo khuoa ṭhe dâmin, sum dawng pawl hrang hrang dâmin, biel optu dâmin, Levi chia mi dâmin, thiempuhai dâmin, màni in zawn seng dâmin, anni chanvo sengah ṭhahnemngai takin hma an lak a.
Juda hnama ngirhmun insânga ngai, thiempuhai le Levi mihai chun kul siemṭhatnaa kut sinthaw khom inzapui loin an hei pu el hi enton tlâk an tling. Tempula rongbawltu chun mistri sin chu thiem le thiem naw thu hril loin, ṭhahnemngai takin a thaw a. “Kei chu hi hi ka sin ding an nawh” tiin an kut an kei nawh. Chun, an bawlna hmun pei chu, an thaw ding awm hrimin, an inhlan thienghlim pei a. A mistri deua kut themthiemhai khom khan, “Thiem naw ti nih” amanih “In kuong lo in hung nor” tiin an lo hnawl naw a, an lo pom ve el chu ning a tih. Kul bawl ṭhatna dinga an ṭhahnemngaina seng kha an inhrietthiemtuo a, an inthuruol bok a, an hlawtling phà a nih.
Kul bawlṭhatuhai khi pawl hrang hrang (all classes of the society) an na, hi hin Juda khawtlâng inenkolna a felzie a suklang. Hnam tungdingna dingin pawl hrang hrangin chanvo an nei ti an inhriet a. Chun, anni hai khi Nehemia-in chanvo a sempek ti thu khom ei hmu naw a, an ṭhahnemngainaa an thaw ni ngêi a tih. Màni sin seng hrea ṭhahnemngai taka thaw hi hlawtlingna lampui a nih.
An sinthawnaa hmang ding thilpek pek chungchânga khom ram optu, hotu danghai le sungkuo lukhaitu iemani zâtin rangkachak, tangkaruo le thiempu zakuo an pek a. Kut sinthaw chauh ni loin thilpeka thaw theihai khoma ṭhahnem an ngai hle a nih. Voisuna ei ngirhmuna hin thuomhnaw inchawk vong a ni ta a, poisa dawl le thawlawm thaw chu ei chanvo a nih. A nei deuhaiin pe rawn met ei ta, a nei tlawmhaiin ei pek tlawm el ding a nih. A tam am a tam naw ta’m, a pek chu ei mawphurna a nih. Chuong anga hnamin a poimaw hun laia kut lo kei chu màni chanvo ngai poimaw lo an nih.
Chun, ram le hnam indintharna hi kuta themthei thil (physical) siemṭhatna khêlah thlarau rama siemtharna (spiritual revival) a poimaw hle a nih. Judahai khan thlaraua insiemthar dinga dangcharna an nei a, màni khuo sengah an inbêngbel hnung chun, an pungkhawm a, Mosie Dânbu tiem dingin Ezra chu an ngên a nih. Dân thu chu a thua hriet ringotin ram le hnam a siemṭha naw ding a nih ti an hriet a, a tak ngêia zawmin, kum tam tak an lo hmang tâk lo, Bawkte Kût an hung hmang ṭan nawk a ni khah (Neh 8:13-18). Kût an hmang hin ra ṭha a’n suo pei ti ei hmuh. Lawmnain an sip a, kût ṭum ṭiek hnung, sawt naw teah mipui chun Pathien hmaah suol inpuongna an nei a nih. Pathien thu, a taka zawm man a ve um de!
Mipuiin ram le hnam tungding nawkna dinga ei chanvo seng ei hriet am? Ṭhahnemngai takin chu chu ei hlen suok am ti màni le màni infieng ei tiu. Mipuiin thlaraua ei dangcharna ei suklang hlak am? Kohran rongbawltuhaiin mipui thlaraua an dangcharna ngaivenin ei sukre pek hlak am? Hmang dinga Pathienin thu a mi pek hai hi ei hrietna sukzauna ding chen chauin am ei dit? A ni naw leh, zawm dingin ei lungril ei pek phal am? A taka Pathien thu zawm mipui chun siemtharna an chang a, chu zâr peiin a ram le hnam khomin a dam phà hlak a nih. Nang, ram le hnam invoitu, nang le nang invoi phot la, a dang chu hung ṭha zui pei a tih. Insukhrat ei tiu a, màni chanvo seng hlen ei tiu leh.
A ziektu: Upa (Dr.) Lalsiemlien Pulamte
