Hung ro, ei ram indin thar nawk ei tiu – Mi sukse theitu lakah fimkhur ding
Lalpa Pathien chawimawina le ropuina dinga ram le hnam indin thar chu hmelma (Diabol) nà a ver ding a ni leiin chu hmalakna theidatu le sukse tumtu an um ngêi ngêi ding a nih. Nehemia rawia Juda ram indin thar tuma hmalaknaa khom khan dodaltu le sukse tum hmelma an hung inlang nghâl a ni khah. Juda ram indintharna hmelmain an sukbuoi tum dân (Neh 4-6) hei suklang ei tih.
Nuizatbûr le deusawna ṭongkamhai hmangin an hmelmahai chun an hung bei phot a. “Hieng Juda mi rethei le ongrop ruol”, “An inthawi rawn lei ringotin ni khat thilthuin kul bawl zo an inring a ni?” ti le “An lung remhai sihal khoma sir chim vong thei a tih” tiin Judahai khawsak harsat, sakhuona le sinthaw chu an hung deusaw a. Nehemia chun Pathien kuomah, “Suk lungsen che tumin an cho phawk che a ni hi” tiin a ṭongṭai a.
Indintharna sin a fe tluong pei lei chun hmelmahai chun Jerusalem hung bei a, buoina siem tumin ro an phier a. Phierrukna chi hrang hrang – “That fai rip ei ta, an sin chu a chawl a ni el” tiin le an Juda chanpuihai kuomah, “Sîr tina inthokin kan hung bei ding cheu a nih” tiin an hung thaw zing bok a. Anni laka invêngna dingin sûn le zanin vêngtu an sie a. Nehemia chun mipuihai chu a sûng sûngin an kawlhnamhai, an feihai le an thalngulhai chawiin ṭhanghmun a’n khawtir a. Chun, “Lalpa ropui tak le râpum ei nei a, ei Pathien chun mi dopek a tih” tiin mipui hai a thlamuong tawl a. Hmelma lakah inring zingin sin an thaw a. Kul bawl ṭhatna ding hmangruo phurtu khomin kut khing khatin sin an thaw a, khing tiengin hriemhrei an chawi a, kul bawltuhai po po khomin kawlhnam an pai vong bok a.
Jerusalem kul chauh a chim naw a, an khawtlâng inenkolna khom a chim se ve a nih. An unau, retheihai chungah ngilneina an tlasam a, a pung umin sum an inpûktir a, an hmun le lohai an inbândatir a nih. Hi thu leiin mi naranhai (common man) chu an lung a awi naw a. Chuleiin, Nehemia chun hieng anga inlakluipekna thawtu roreltuhai chu a khak a. Ram le lo an lo lakpek tah hai le sum punghai chu pe kîr nawk dinga intiemkamna inneitirin a ching fel a. Hieng ang khawtlânga chîng dân ṭha lo (social evil) intlungtirtu chu hnam sûnga mi, an Juda chipui hai vek an nih. Hnam sûnga inthok khoma hmelma a pieng thei ve tlat. Hieng anga hnam hmelma ei lo ni ve el di’m maw? Inenfie a ṭha ie.
Sanbalat chun, “Judahaiin hèl in tum leia kul in bawl ṭhat thu an thang a”, “Nang hi Judahai lal ni i tum a ni awm a, chu thu puongtu ding zawlnei khom i ruot tah” ti le “Hieng thu hi lal kuom a tlung ngêi ding a nih” tia khêla inhrilsietna hmangin a hung bei nawk a. Inhrilsietna hi awm tak takin a’n lang hlak. Nehemia chun chu thuhai chu a tak a ni nawzie le phuok fawm el an nizie thu a hrilpek a.
A tawpa chun Juda hnam sûnga mi ngêi hmangin suksiet an hung tum a. Thiempu nau pakhat, Semaia chun, “Voizan hin nangma that tumin i hmelmahai an hung ding a na, Tempul sûngah kot inkal khum tlat ei tih” tiin Pathiena inthoka a thil dong ni awm takin Nehemia a hril a. Nehemia kha tempul sûngah lo lut ta sien, tempul a sukporche ning a ta, mipui ngaimaw khom a kai thei ding a nih. Semaia-in Nehemia suol inthawtir a, sukhmingsiet a tum hi Tobia le Sanbalat haiin an ruoi a lo ni a. Pathien tir ni lo, hnam inphatsantu a lo ni zing. Ei insûnga ngêi, ei kohran sûnga ngêi, ei rongbawl chanpuihai lai ngêi, ei hnam sûnga ngêi hin hmelma an lo um thei leiin fimkhur a ṭul nawk zuol a nih. Hnam inphatsantu i lo ni pal hlau chun Nehemia-in, “Thil suol an thaw po po hi hre zing la” tia Pathien kuoma a ṭongṭaina hi pangzat a um i ti naw maw?
Ringtu nun hi lâmzawla hlim chên ei ni naw a, indona hmuna um lem ei nih. Ei hmelma Diabol hi a var a, hmangruo chi dang dang hmangin ei rongbawlna suksiet a tum hlak. Chuleiin, ei fimkhur hle a ṭul a, Pathien râlthuom famkima inthuom a poimaw takzet bok a nih.
A ziektu: Upa (Dr.) Lalsiemlien Pulamte
