Hung ro, ei ram indin thar nawk ei tiu – khawtlânga thawdân indik lo (social evils) do ngam le bânsan ngam
Ram le hnam suksetu pakhat chu thaw dân ding rêng anga ei lo ngai tah, khawtlânga thawdân indik lo (social evils), nunphung ang ela ei fepui hai hi an nih. Hieng ang hi, Pathien thu hmanga ṭhuoitu huoisenin hma a lak naw chun sukbo a harsa ta hlak.
Judahai an rama an kîr nawk khan bu inchawkna ding le lal sie chawi ding an nei naw leiin an in-le-lo hai dàkhamah an sie a, a pung umin sum an pûk a. An dàkhamna le sum an pûkna chu an Juda chanpuihai tho an nih. Retheihai nauhai khom Juda mi bok bawiah an lut dêr tah. Retheihai chun, “Hieng hi kan ngirhmun a ni leiin kan ta dingin chêt ngaina a um ta nawh” tiin an unau Judahai chungah nasa takin an chier a.
An chierna thu Nehemia-in a hriet chun a lung a sen hle a, an mi lûnhai le rorêltuhai kuoma chun, “In unauhai a pung uma sum in inpûktir hin anni chu in sawrde a nih” tiin a khak a. Vantlâng inkhawm a ko a, “Tu hin nangnin in unauhai chu ei intlan nawk ngai dingin bawiah in siem nawk tum a ni hi” a ta. An to chip a, tu khomin hril ding an hriet nawh. Pathien ṭi ding a nizie dâm, an thilthaw an dik nawzie thu dâm le a pung uma sum le bu dâm an unauhai an inpûktir hlak chu bânsan dingin a’n fui a. Chun, in-le-lo le a pung an lo lakpek tah hai pe kîr nawk dingin a ngên bok a. Rorêltuhai chun, “Pe kîr nawk vong kan tih” tiin an intiemkam a.
A hmalaknaa chun Nehemia chu ṭhahnem a ngai a, a titak èm êm bok a nih. A zakaw fuol hmawr chu a thin a, “In thu tiem anga in thaw naw a ni chun in in-le-loa inthokin Pathienin thin thla ve raw se cheu” a ta. Mipui pungkhawm hai khom an titak a, “Amen” tiin LALPA an inpak a, an thutiem angin an thaw bok a.
Voisun hin ei khawtlângah retheihai ei sawrde dân le thil indik lo, thawdân pângngai anga ei lo nei tah, ram le hnam ta dinga an hrisêl naw ti hre zing siin ei topui zing el di’m a ni? Ei khawtlâng, Kristien thuringin a mi ṭhuoina ding hmuna hin awm lo baksaka a pung uma (exorbitant interest rates) poisa inpûktir, mani sin thawna hmuna um lo (absentee Govt. worker), hlaw dok le inphù loa khawsak (lifestyle & properties inappropriate to known income sources), tu hai am a che thei ti suklangna ni thei dinga inlang thlân ṭhut nia ruoiṭhe, mi ngirhmunin a zir naw leia màni ta dinga remchang lo la (economic, social. sexual exploitation), mi ruoia màni sin kum tluonga inthawtir (permanent(?) substitution), beisei lêtna lungrila nei kûka mo man fatu ding le zuor dinga khawsa thei deu deuhai hming ziek tlar duot dâm, hleprûkna chi hrang hrang (all kinds of corruption) le chîng dân indik lo dang dang ei ramah hmu ding a um tah. Kohran rama khom ei fihlim chuong nawh. Kohran inenkolnaah Thlarau Thienghlim ṭhuoina nekin khawvel thiemna ringsana (managerial skills) innghat lem ei ang tah. Hun sawt naw teah lem chu kohranin MBA graduate ruol hi ei la ruoi hmel ie. Thlarau tienga infui lem loa kohran pawl hmingṭhatna dinga kohran membarhai infuipor dâm, an thafânna dinga lawmman le chawimawina siempek dâm, mani posting hmuna um si lo kohran committee membarah ruot, sande sikul kai tam lawmman pek le sande sikul sabjek ṭhuoitua inṭhangtir hai dam hi thawdân pângngaiah ei nei tah.
Nang kohran le khawtlâng ṭhuoitu, i la khêk suok ngam naw a ni? Nehemia angin ngaituo neu neu la chuh khi thil ṭha nawhai khin ram le hnam an faksiet ti hung hrieng i ta, chuongchun, damna dinga thutlûkna poimaw huoisen takin la ngam ve ngêi i tih. Tienlai chu mani sumphuka sahrâng lu târ rawn kha pasal ṭha le huoisen suklangtu a lo ni hlak. Voisun ruok hin chu Pathien thu, a telpuiin miin an zui ta naw hnung khoma, màni khât chauh khom ni sien, a taka zawm ngam le zui ngam, suol do ngam le bânsam ngam hai hi Krista pasal ṭha an nih. Mani khât chaua suol râl do ngam Krista ‘commando’ ei ramin a mamaw tah. A’n dik ni si lo, vantlâng thaw dân, fepui dân le ngaituo zawng, Pathien thu ringsana kal ngam ding chun huoisen a ngai. Lalpaa inthoka hmufietuhai chu an huoisen a, an hmalakna chun ram le hnam siemṭhatna a’n tlun ve thung a nih. Nang kohran le khawtlâng ṭhuoitu, voisun hin Lalpain ei ram le hnam ta dinga ‘Nehemia’ dingin a ruot che an naw ding maw? Ieng tinam chu kona poimaw tak chu don i ta?
A ziektu: Upa (Dr.) Lalsiemlien Pulamte
