Chanchin ṭha lo kâra khom beiseina a um

“Van khi hi hnuoi nêk daia,
Insâng lem a ni angin,
Nangma lampui nêk daiin,
Ka lampui a’n sàng lem a,
I ngaituona nêk daiin,
Ka ngaituona a’n sàng lem.” (Isai 55:9)

Khawvêla thil tlunga inthokin Pathien thiltum hriet thei ni hlak sien nuom a um in ti? Chanchin ṭha naw tak tak hai hin mi suk lungngai hlak sien khom anniah hin a sûngril takah Pathien thil tum a lo um ve hlak a nih. Pathien chun “I ngaituona nêk daiin, ka ngaituona a’n sàng lem” (Isai 55:9) a tih a. Tirko Paula khomin “Kristaa a lo ruot lawk ang taka ama ditzawng anga thaw a tum thurûk chu a mi’n hriettir a” (Efe 1:9) a lo ti ve.

China ei ngaituo chun June 1989 lai khan mipui roinrêlna dit pawl lamhraw ṭhalai mi 5000 hai chu China sipaihai kaphlum le laipui tlânthei (tank) chîl hlum an nih. A thihai tuorpui thu chanchinbua hai a chuong têr tuor el a nih. Kha inthatna rapthlak taka inthok khan ni danga la hriet ngai lo, Chinaa inchûklaihai tam tak chu Isu Krista tieng an nghat pha thu hriet a nih. Hi thu ruok hi chu chanchinbuah hmu ding a um nawh. Sienkhom Pathien sinthaw ruok chu a chawl nawh.

Afghanistan ei en nawk chun Soviet Union chun hi rambung hi 1980 khan a va rûn a, khawvela mihai lungsen chu chanchinbua hai hmu ding a tam. Kabula misawnari pakhat chun, “Russiahai thilthaw kha an dik naw ngèi el. Sienkhom Islam inṭhuoina hnuoia um nêk khan Russiahai mi opna hnuoiah Chanchin Ṭha puongdar a olsam lem” tiin a hril a. Khawvel hriet loin Pathienin a lalram chu a rûkin a lo inzau zing a nih.

Sudan chungchang hei ngaituong ei ti leh. 1980 bawr lai khan a ram khawphêka mipui intuolthatna rapthlak tak a tlung a. Sienkhom, hi harsatna hin maktaduoi hnia tam Dinka hnam, ni danga Chanchin ṭha lo hnawl hlak hai chun, Pathien an hnai phà a. Kum 1993 chen khan 80% hai chu Kristien an hung ni tah.

Khuokhir thei naw khopa inlang harsatna tlung sien khom Pathien chun a rûkin sin a thaw zing hlak. Chinaa intuolthatna a tlungna hmunah revival a tlung a. Rambung dangin Afghanistan an rûn lai Chanchin ṭha hrilna ding lampui a’n hong a. Sudana indona leia mi maktaduoi têl an thi lai lalram thar indinin a um a. Voisuna i mimal, khawtlâng, hnam, rambung amanih khawvel huopa harsatna a tlung lai khom hin Pathien chun a control zing a, iemani thil ṭha a’n suok tir hlak a nih. Chuleiin, Pathien khuokhirna hmuna hin lo beidong hlak inla khom beiseina a um hlak a nih.

Inchûk le hmalâkna ding: Voisun hin chanchin ṭha lo hre lang khom chu taka chun Pathienin sin a thaw zing a nih ti ka chieng. Khawvêla thil rapthlak tlungnaa khom hin thil ṭha a’n suok tir thei leiin ka thla suk muong ka tih.

– Upa Dr. Lalsiemlien Pulamte