Baibula inthok hratna
“I thu hi ka ke di’n khawnvar, Ka lampui elvartu a nih (Sâm 119:105) “
Eritrea rama chun sakhuo zalênna sorkarin a hneng de a, Eritrean Orthodox Church, Roman Catholic Church, Evangelical Lutheran Church le Islam chauh a phal pêk. Hihai huong sûng ni lova ringtu inhmukhawm hrim hrim chu man thei, soisak thei le an ringna inphat dinga thawlui thei an nih.
Chuleiin Kristien a sâng têl chu man an ni a, police station, thuomhnaw bawm (containers), sipai hmun le lunginah hai khum an nih. Tam tak chuh kum tam hieng anga siea an thu la ngaituo pêk lo khom an um.
Chuonghai lâia ṭhang ve, Isak chun Ethiopia leh an indo ṭuma sipai ṭhenkhata inthok Pathien hmangaina a lo dong a. Chuong sipaihai testimawni chun a lungril a tawk a, Kristienah a’n pêk tah a nih. A kuoma a rûka Baibul pêka um chu phaiphin lai a thup a, an sipai camp puo tieng hun remchang a hmu hunah a rûkin a va tiem hlak. Sienkhom, ni khat chu man dok a ni tah. An soisak a, ni sat inṭeng tuor ding dàmin tuolah an sie hlak. A ringna a’n phat nuom chuong nawh. A ta dingin Pathien hmangaina le Pathien thu a hlu bêk bèk el sih a. A tawpah lunginah an khum a.
Thuomhnaw bawm sûnga khum, Kristien intânghai chu a rûkin Baibul pêk an ni a, a phêka insemin mi tinin Baibul phêk a ṭhen ṭhen an chang seng a. Sienkhom bawm sûng chu a’n thim èm leiin an tiem thei nawh. Boruok suklut ding le bu pêk dinga bawm an hong phâ intânghai chu boruok ṭha hip le bu fa dingin an hung suok nghâl el ngai nawh. Baibul phêk an chawi hai chu varah pharin Baibul chânghai chu an la zuk tiem mol mol a, chuongchun Pathien thuin a sukhrat tawl hlak a nih.
Inchûk le hmalâkna ding: Voisun hin Pathien Thu tiem thei ding le ngaituo thei dinga zalênna ei nei hi hlutsak ei tiu. “Lalpa, Eritrea-a kan unau lungin intânghai i Thlarauin thlamuongna pein i Thuin infui raw seh”.
By: Upa Lalsiemlien Pulamte
