Ṭhahnemngai taka ṭongṭai
“Elija chu eini anga mihriem vê el a nia chu, raw sŭr nawna dingin thrahnemngai takin a trongtrai a, kum thum le thla ruk sung hnuoi chungah ruo hrim a sûr nawh (Jak 5:17)”
Khawvela kohran lien pawl tak enkoltu, Rev. Dr. David Cho chun ṭongṭaina poimawzie a hriet chieng hle a. Korea rama kohran inṭhang hrat tak a enkolnaa hin ni khatah dârkâr nga neka tlawm a ṭongṭai ngai nawh.
Ama chun ṭongṭaina chi tum tum um sien khom ‘task prayer’ (ṭhahnemngai taka ṭongṭaina tiin ei inlet el) hin chuh kuta sinthaw angin ei tha le zung hratna po po sawr kang deu thawin ei ṭhang a ngai a tih. Ei thil mamaw taluo ngaituo zinga din takin le ṭhahnemngai taka ṭongṭai a nih. Chuong anga ṭongṭai ding chun:
- thiltum/ thilhni chieng tak nei ding
- thumal narân / olsam hmang ding
- ei lungrila mi mor theitu po po hmang ding
- a sûn a zâna ṭongṭai, hni tlut tlu
China rama ringtuhai chu khi ang khin an ṭongṭai hlak. Feet 25-a inthûk, hnuoi pûkah an inhmukhawm a, dârkâr 3 Pathien thu an ngaithlâk hnung, ringtu fekhawmhai ṭongṭai dân hieng ang hin a’n ziek a:
An ṭongṭai lai chun an mitthli luong thla chun an hnaptui a zuk fin khawm a, chu chuh an ngaisak ṭhak nawh. An lungril chu Krista hmel tieng nghain buorhnuka an um khom chu an uksak nawh. Unaunu pakhat lem chu minit 45 ngir puma ṭongṭaiin a rongbawlpui le bielpa lungina intâng chu insuo a ni theina dingin Lalpa a hni tlut tlut a. Chu pa chun ni tam tak bu a nghei a, kohranhai rongbawl dân inpuong dingin phût hai sien khom ieng khom a hril suok nuom nawh.
Inchûk ding le ṭongṭaina:
Thil mamaw nasa tak ka nei phâ khi ang khin ṭongṭaina nun nei tum tâng ka tih. Ei ram le hnam ngirhmun ngaituoin khi anga ṭongṭai ei ngai tah. Ka ṭongṭai pha Elijah anga ringna, thaw tlut tlutna nun le lungrila mortu ka nei theina dingin Lalpa mi ṭhangpui rawh.
– Upa Dr. Lalsiemlien Pulamte
