Chawimawina

Hmar Christian Fellowship Delhi-in ngaihlut chawimawina Pu L. Keivom kuomah a’n hlan
Delhi: 21st of November, 2021

Baibul inlet rongbawlnaa inpe dinga Pathienin naupang te a ni laia inthoka a lo buotsaizie hrein le a kona a chieng china inthokin Pu Lalthlamuong Keivom hin chu rongbawlnaa chun ti tak zeta hma lain kum 2002-a inthok khan ni tin darkar 10-12 sûng Baibul inletin hun a lo hmang hlak a.

Chuongchun, chu rongbawlna ra hmasa tak chu March 28, 2004 khan Thuthlung Thar, Sam & Thuvar inkop tlangzâr a lo ni a, chun October 7, 2007 khan Baibul pumpui tlangzâr nawk a lo nih. Tuta Pathien Lekhabu Thienghlim – Delhi Version edition nuhnung tak, Revised & Second Edition hi August 30, 2015 khan tlangzârin a lo um a.

A Baibul inlet sûnga hi rongbawlna sukse dinga dotu sinthawhai hnebân an ni dân le chu sûng le Baibul sutna (publishing) chena Pathien ṭhuoina kut inlangna tam tak hmu ding a um a, chuonghai chu voisun hin ei inzawt sêng naw ding a nih. Hieng hai hin Baibul inlet dinga a hmathlir hi Pathienin a rongbawlna dinga a pêk lieu lieu a nizie a nam nghet bok a nih.

Baibul inlet zova a um ta chun a sutna (publishing) tieng hi chu midang chanah um ta naw ni’m ti chu mi tam tak ring dân nîng a tih. Sienkhom, hi mawphurna khom hi Pathienin ama liengkovah a’n nghattir ta pei a. Chu chu ama khoma pomin, “Kang rawt khopa a rongbawlnaa ei sahriek bûr ei bun suok pha, a bûr ei sung ruok zât zàt sahriek thara sung siptu Pathien ka nei a nih” tiin a hril a. Chuleiin, Baibul (Delhi Version) inletna le a sutnaa hin Pu Lalthlamuong Keivom hin tha le zung, hun le ngaituona tam tak a sêng bâkah sum le pai hai chen khom an ro naw ti a chieng hle. A tonhriet a hrilna peia chun, “Baibul inlet anga thil sawlum, sienkhom hlimum ni bok si hi ka nuna ka la pal ngai nawh” a ti hiel a.

Baibul (Delhi Version)-a hin kha hmaa ṭongkam ei lo hmang hlak, hang bi chienga thutak le inmil lo, theulawzi zawng khoma bel chieng dawl lo hai chingfel a nih a. Pathien thutak hriet fie nuomhai le ṭong indik le tluong inchûk le hmang tumhai chun an ṭangkaipui hle thu dong a nih. Chun, Hmar ṭong le Zo hnathlak ṭong danga inlettuhaiin rawn takah an hmang thu hai khom hriet a nih. A hung suoka inthoka kum sawm sûnga Hmar ṭonga thu ziek tienga ei hmasawn dân chîk taka bi chun, Delhi Version hin nasa takin hma a ṭhuoi ti inhmai ruol an nawh.

Hnam le ṭong damna dingin ṭongkam indik le tluong hmanga Pathien thutak fie taka inlet hi a poimaw takzet a. Chu chu Delhi Version thiltum le hmathlir a nih. Hnam le ṭong a dam khawsuok naw chun sakhuo a dam khawsuok ngai nawh.

Delhi Version a danglamna dang pakhat chu, Sâm 117 hril loin, Sâm lekhabu danghai po hi, châng tin thu lamrîk pasari annawleh parieta siem vong an nih. Hi hin hla an nina pienken a nam nghet a, ei pi le puhai thawdâna hla phuok dân le khom a’n zûlin hnam thlarau le khom an inpawin ka hriet. Baibula Sâm lekhabu hieng anga inlet hi khawvela la um sun ni mei a tih.

Kohran le hnam ta dinga ro hlutak, Baibul (Delhi Version) inletna le sutnaa hmalatu, HCFD member dittum tak, Pu Lalthlamuong Keivom hi Pathienin hi rongbawlnaa a hmang ti hrietpuina le hlutsaknain Hmar Christian Fellowship Delhi, Executive Committee inṭhung dated 19 October 2021 chun, “Sacrificial Service Award” memento le Thangsuo Puona chawimawina inhlan dingin a lo rêl a, tuhin chu hun poimaw tak chu ei hmang a nih.

Duthusâm ni thei sien chu hi ngaihlut chawimawina hi biekin sûnga ngêi le ama, Pu L. Keivom ngêi khoma a dong thei ding ngirhmunah um sien ei nuom. Sienkhom chu chu a thei naw leiin natna inrik tak a tuor leia a’n enkolna hmun, Max Super Speciality Hospital, Patparganj, New Delhi-ah a kuomah hi chawimawina memento inhlanna le Thangsuo Puon insiltirna hun chu Dr. L. Robert Varte (Secretary) le Upa Lalsiemlien Pulamte (Chairman) haiin an va hmang.

Link: https://www.youtube.com/watch?v=R1cNZnmeWr4

---

---